ယခုနှစ် ၂၀၂၄ ဇန်နဝါရီမှ ပြီးခဲ့သည့် (၄) လတာ ကာလအတွင်း မွန်ပြည်နယ်၌ လုပ်ကြံပစ်ခတ်သတ်ဖြတ်မှုများကြောင့် (၃၃) ဦးထက်မနည်း သေဆုံးခဲ့ကာ (၆) ဦးထက်မနည်း ထိခိုက်ဒဏ်ရာရရှိခဲ့ကြောင်း သတင်းမှတ်တမ်းများက ဖော်ပြသည်။
ပြီးခဲ့သည့် ဇန်နဝါရီလအတွင်းက လုပ်ကြံပစ်ခတ်သတ်ဖြတ်မှုများကြောင့် အမျိုးသား (၅) ဦး နှင့် အမျိုးသမီး (၂) ဦး သေဆုံးခဲ့ရာ ထိုဖြစ်စဉ်များမှာ ဇန်နဝါရီလ (၄) ရက်နေ့က ကျိုက်ထိုမြို့နယ်၊ မုပ္ပလင်ကျေးရွာ ဈေးပိုင်း၌ ပစ်ခတ်မှုများဖြစ်ပွားခဲ့ရာမှအမျိုးသား (၁) ဦး နှင့် အမျိုးသမီး (၁) တို့မှာ ကျည်ထိမှန်ဒဏ်ရာများဖြင့် သေဆုံးခဲ့ရသည်။
ထို့အတူ ဇန်နဝါရီလ (၅) ရက်နေ့က ရေးမြို့နယ်၊ နှစ်ကရင်ကျေးရွာတွင် အမျိုးသား (၁) ဦး၊ ဇန်နဝါရီလ (၁၈) ရက်နေ့ကလည်း သထုံမြို့နယ် သုဝဏ္ဏဝတီမြို့၊ ပုတိမ်ရိုးကျေးရွာတွင် အမျိုးသား (၁) ဦး၊ ဇန်နဝါရီလ (၂၀) ရက်နေ့ကလည်း ကျိုက်ထိုမြို့နယ် မုပ္ပလင်ကျေးရွာနေ အမျိုးသား (၁) ဦး၊ ဇန်နဝါရီလ (၂၂) ရက်နေ့တွင် ဘီးလင်းမြို့နယ် ဇွဲကလာကျေးရွာနေ အမျိုးသား (၁) ဦးတို့မှာ သေနတ်ဖြင့် ပစ်ခတ်ခံရပြီးသေဆုံးခဲ့ရသည်။
အလားတူ ဇန်နဝါရီလ (၂၂) ရက်နေ့မှာပင် ကျိုက်ထိုမြို့နယ် မုပ္ပလင် – သိမ်ဇရပ် ကားလမ်းတွင် သံဖြူဇရပ်အခြေစိုက် အမှတ် (၃၁၅) အမြောက်တပ်မှ တပ်ရင်းမှူးဖြစ်သူ ဒုတိယဗိုလ်မှူးကြီး ညီညီအောင်၏ ဇနီးဖြစ်သူ ဒေါ်အိမ်ချယ်ရီကျော် အား တော်လှန်ရေးအဖွဲ့များမှ ဖမ်းဆီးရမိခဲ့ပြီးနောက် ၎င်းမှာ သေနတ်လုယူကာပြန်လည်ပစ်ခတ်ခဲ့သည့်အတွက်ကြောင့်ဟုဆိုကာ အသေပစ်ခတ်ခဲ့ရကြောင်း တော်လှန်ရေးအဖွဲ့မှ ထုတ်ပြန်ထားချက်များအရ သိရသည်။
ပြီးခဲ့သည့် ဖေဖေါ်ဝါရီလအတွင်းက မွန်ပြည်နယ်၌ လုပ်ကြံပစ်ခတ်သတ်ဖြတ်မှုများကြောင့် အမျိုးသား (၁) ဦးသေဆုံးကာ အမျိုးသာ (၁) ဦးနှင့် အမျိုးသမီးငယ် (၁) ဦး ကျည်ထိမှန်ဒဏ်ရာရရှိခဲ့ရသည်။
ထိုဖြစ်စဉ်များမှာ ဖေဖေါ်ဝါရီလ (၆) ရက်နေ့ ညပိုင်က ကျိုက်မရောမြို့နယ် ကျွန်းရွာကျေးရွာနေ ဦးထွန်းဦး ဆိုသူနှင့် ၎င်းတို့သမီးဖြစ်သူ မဇင်နန်းဝေ တို့ (၂) ဦးအား အမည်မသိသေနတ်သမား (၁) ဦးမှ သေနတ်ဖြင့် ပစ်ခတ်ခဲ့သည့် ကျည်ဒဏ်ရာရရှိခဲ့ကြောင်း၊ ဖေဖေါ်ဝါရီလ (၂၄) ရက်နေ့ကလည်း သထုံမြို့နယ်၊ ဂေါ့ကျေးရွာအုပ်စု၊ ကော့သန်ကျေးရွာ ရန်ကုန် – မော်လမြိုင်ကားလမ်းတွင် ရွှေသံလွင်ဟိုင်းဝေးကုမ္ပဏီမှ ဝန်ထမ်းတစ်ဦးဖြစ်သူ သထုံမြို့၊ လိပ်အင်းကျေးရွာနေ ကိုစိုးထွန်းနောင် မှာလည်း အမည်မသိသေနတ်သမားမှ ပစ်ခတ်မှုကြောင့် သေဆုံးခဲ့ရသည်။
ပြီးခဲ့သည့် မတ်လအတွင်းကလည်း မွန်ပြည်နယ်၌ လုပ်ကြံပစ်ခတ်သတ်ဖြတ်မှုများကြောင့် ရဟန်း (၁) ပါးအပါအဝင် အမျိုးသား (၁၀) ဦး သေဆုံးခဲ့ပြီး (၁) ဦးထိခိုက်ဒဏ်ရာများရရှိခဲ့သည်။
မတ်လ (၂) ရက်နေ့က ကျိုက်ထိုမြို့နယ် မုက္ခမူကျေးရွာနေ အမျိုးသား (၁) ဦးသည်လည်းကောင်း၊ မတ်လ (၅) ရက်နေ့ကလည်း၊ ကျိုက်ထိုမြို့နယ် ကော့ဘိန်းကျေးရွာနေ အမျိုးသား(၁) ဦးသည်လည်းကောင်း၊ မတ်လ (၁၀) ရက်နေ့က သထုံမြို့နယ် ထောင်မှူးကျေးရွာအုပ်စု၊ မြတ်စင်္ကြာကျေးရွာနေ အမျိုးသား (၁) ဦးသည်လည်းကောင်း၊ မတ်လ (၁၁) ရက်နေ့ကလည်း ရေးမြို့နယ် သောင်ပြင်ကျေးရွာနေ အမျိုးသား (၁) ဦးသည်လည်းကောင်း၊ မတ်လ (၁၇) ရက်နေ့က ရေးမြို့နယ် ကြိုးတံတားကျေးရွာ နှင့် စံပြကျေးရွာကြား ရေး – သံဖြူဇရပ်ကားလမ်းဘေး နှင့် ရေးမြို့နယ် ကြိုးတံတားကျေးရွာတို့တွင် အမျိုးသား (၂) ဦးသည်လည်းကောင်း သေနတ်သမားများ၏ လုပ်ကြံသတ်ဖြတ်မှုကြောင့် သေဆုံးခဲ့ရသည်။
အလားတူ မတ်လ (၂၀) ရက်နေ့ကလည်း သထုံမြို့နယ် ဂေါ့ကျေးရွာနေ အမျိုးသား (၁) ဦး၊ မတ်လ (၂၂) ရက်နေ့က ကျိုက်ထိုမြို့နယ် တောင်သူစုရပ်ကွက်၊ ဘူတာလမ်းနေ အမျိုးသား (၁) ဦး၊ မတ်လ (၂၄) ရက်နေ့က ကျိုက်ထိုမြို့နယ် တောင်ကလေးကျေးရွာအုပ်ချုပ်ရေးမှူးဖြစ်သူ အမျိုးသား (၁) ဦး၊ နှင့် မတ်လ (၂၅) ရက်နေ့က ကျိုက်ထိုမြို့နယ် ကင်မွန်းချောင်းရွာ (ကင်မွန်းစခန်း) တွင် ပစ်ခတ်မှုများဖြစ်ပွားခဲ့ရာ ရဟန်း (၁) ပါး ကျည်ထိမှန်ကာ ပျံလွန်တော်မှုခဲ့ပြီး၊ အမျိုးသား (၁) ဦးမှာ ကျည်ထိမှန်ဒဏ်ရာများရရှိခဲ့ကြောင်း သိရသည်။
မွန်ပြည်နယ် ကျိုက်ထိုမြို့နယ်အတွင်းဖြစ်ပွားခဲ့သည့် လုပ်ကြံပစ်ခတ်မှုများအား ကျိုက်ထိုတော်လှန်ရေးအင်အားစု (KRF) နှင့် ပူးပေါင်းအဖွဲ့များ လုပ်ဆောင်ခဲ့ခြင်းဖြစ်ကြောင်းကို ယင်းအဖွဲ့မှ ထုတ်ပြန်ကြေညာချက်များအရ သိရသည်။
ပြီးခဲ့သည့် ဧပြီလအတွင်းတွင်မူ မွန်ပြည်နယ်၌ လုပ်ကြံပစ်ခတ်သတ်ဖြတ်မှုများပိုမိုဖြစ်ပွားခဲ့ရာ (၁၅) ဦးသေဆုံးခဲ့ကာ (၃) ဦးထိခိုက်ဒဏ်ရာရရှိခဲ့သည်။
၎င်းဖြစ်စဉ်များမှာ ဧပြီလ (၁) ရက်နေ့က ကျိုက်ထိုမြို့၊ ကော့စနိုင်ရပ်ကွက်နေအမျိုးသား (၁) ဦး၊ ဧပြီလ (၂) ရက်နေ့က ကျိုက်ထိုမြို့၊ တောင်သူစုရပ်ကွက်ရှိ မြို့နယ်လျှပ်စစ်ဓါတ်အားခွဲရုံအား လက်နက်ကိုင်များမှ ပစ်ခတ်ခဲ့ရာမှ အမျိုးသမီး (၁) ဦး ဒဏ်ရာရရှိခဲ့ကြောင်း၊ ဧပြီလ (၃) ရက်နေ့က ရေးမြို့နယ် ကော့ဒွတ်ကျေးရွာအုပ်ချုပ်ရေးမှူးဟောင်း၊ ဧပြီလ (၇) ရက်နေ့က မုဒုံမြို့နယ် ကမာဝက်မြို့နေ နိုင်ထိန်ဝင်း (ခ) နိုင်မော့ ဆိုသူအား လက်နက်ကိုင်အဖွဲ့တစ်ဖွဲ့မှာလာရောက်ဖမ်းဆိးစဉ် ပစ်ခတ်မှုများဖြစ်ပွားခဲ့ရာမှ နိုင်ထိန်ဝင်း (ခ) နိုင်မော့ နှင့် ၎င်း၏သားဖြစ်သူ မင်းသိန်းဉာဏ် တို့နှစ်ဦးမှာ သေဆုံးခဲ့ပြီး၊ အခြား သားတစ်ဦးမှ သေနတ်ဒဏ်ရာရရှိခဲ့ပြီး ထွက်ပြေးလွတ်မြောက်ခဲ့ကြောင်း သိရသည်။
ထို့အတူ ဧပြီလ (၁၃) ရက်နေ့က ပေါင်မြို့နယ် သဗြုချောင်းကျေးရွာနေ ပေါင်မြို့နယ် မွန်ညီညွတ်ရေးပါတီဥက္ကဌဖြစ်သူ နိုင်ဘထောက်မှာလည်း အမည်မသိ သေနတ်သမား၏ လုပ်ကြံပစ်ခတ်မှုကြောင့်သေဆုံးခဲ့ရပြီး၊ ဧပြီလ (၁၈) ရက်နေ့ကလည်း ကျိုက်ထိုမြို့၊ မြောက်ပိုင်းရပ်ကွက်၊ ငပိစိလမ်းနေ အမျိုးသား (၁) ဦး၊ ဧပြီလ (၁၈) ရက်နေ့တွင် ဘီးလင်းမြို့နယ် နတ်ကြီးကျေးရွာ အုပ်ချုပ်ရေးမှူးဖြစ်သူ ဦးတင်ငြိမ်း၊ ဧပြီလ (၁၉) ရက်နေ့ကလည်း ကျိုက်ထိုမြို့နယ် ဝါးဒက်ကွင်းကျေးရွာနေ ပြည်သူ့စစ်ခေါင်းဆောင်ဖြစ်သူ ဦးအောင်ဇော်ဦး၊ ဧပြီလ (၂၃) ရက်နေ့က ကျိုက်ထိုမြို့နယ် ကော့ထင်းကျေးရွာအုပ်ချုပ်ရေးမှူးဖြစ်သူ ဦးဝင်းအောင်၊ ဧပြီလ (၂၆) ရက်နေ့က ကျိုက်ထိုမြို့နယ် ကျိုက်ပိကျေးရွာတောင်ပိုင်းနေ အမျိုးသား (၁) ဦးနှင့် ဘီးလင်းမြို့နယ် ယက္ကန်းသည်မကျေးရွာနေ ကျိုက်ထိုမြို့နယ် အင်္ဂဘိုကျေးရွာရှိ အကျဉ်းဦးစီးဌာနပိုင် ရွှေဖြူရော်ဘာကုန်ထုတ်စခန်းတာဝန်ခံလက်ထောက်ညွန်ကြားရေးမှူး ဦစင်းအောင် တို့မှာလည်း လုပ်ကြံပစ်ခတ်သတ်ဖြတ်ခြင်း ခံခဲ့ရကြောင်း သိရသည်။
ထို့အပြင် စစ်ကောင်စီတပ် နှင့် ရဲတပ်ဖွဲ့ဝင်များ၏ ပစ်ခတ်မှုကြောင့်လည်း ပြီးခဲ့သည့် (၄) လတာကာလအတွင်း မွန်ပြည်နယ်အတွင်း၌ (၅) ဦးထက်မနည်းသေဆုံးခဲ့ပြီး (၄) ဦးထက်မနည်း ဒဏ်ရာရရှိခဲ့သည်။
၎င်းအပြင် မတ်လ (၂၅) ရက်နေ့က ကရင်ပြည်နယ်၊ ကော့ကရိတ်မြို့နယ်၊ ကော့ဘိန်းကျေးရွာရှိ စစ်ကောင်စီ၏နယ်မြေရဲစခန်းအား တော်လှန်ရေးပူးပေါင်းတပ်ဖွဲ့များက ဝင်ရောက်တိုက်ခိုက်သိမ်းပိုက်ခဲ့ပြီးနောက်၊ ယင်းဒေသနှင့် ဆက်စပ်နေသည့် မွန်ပြည်နယ် ကျိုက်မရောမြို့နယ်အတွင်းရှိကျေးရွာများတွင် စစ်ကောင်စီမှ စစ်ကြောင်းထိုးခြင်း၊ လက်နက်ကြီးများဖြင့် ပစ်ခတ်ခြင်းအပြင် လေကြောင်းမှ လေယာဉ်ပျံများဖြင့် ဗုံးကြဲတိုက်ခိုက်ခြင်း၊ ရဟတ်ယာဉ်ဖြင့် ပစ်ခတ်တိုက်ခိုက်ခြင်းများကြောင့် ဆရာတော်ကြီးတစ်ပါးအပါအဝင် ဒေသခံပြည်သူ (၃၀) ဦးထက်မနည်း သေဆုံးခဲ့ရပြီး၊ အများအပြား ထိခိုက်ဒဏ်ရာရရှိထားကြောင်း နှင့် ရာနှင့်ချီသော ပြည်သူများ၏ နေအိမ်များ မီးလောင်ပျက်ဆီးခြင်း၊ ဖောက်ထွင်းခိုးယူခံရခြင်းများရှိခဲ့ကြောင်း သိရသည်။
