သံဖြူဇရပ်မြို့နယ် ကရုပ္ပိကျေးရွာ နှင့် အံခဲကျေးရွာတို့မှ ပျောက်ဆုံးနေသည့် မွန်အမျိုးသား (၄) ဦးကို တော်လှန်ရေးတပ်ဖွဲ့တစ်ခုဖြစ်သည့် တောင်ညိုစစ်ကြောင်း တပ်ခွဲ – ၂ မှ သတ်ဖြတ်ခဲ့သည့် ရဲဘော်အား အလုပ်ကြမ်းနှင့်ထောင်ဒဏ် (၅) နှစ်ချမှတ်ပြီး PDF အဖွဲ့မှ ရာသက်ပန်ထုတ်ပြန်ကြောင်း မတ်လ (၂၀) ရက်နေ့က အမိန့်ထုတ်ပြန်ခဲ့ကြောင်း စုံစမ်းသိရှိရသည်။
၎င်းပျောက်ဆုံးနေသည့် မွန်အမျိုးသား (၄) ဦးမှာ မတ်လ (၆) ရက်နေ့က ရှင်ပြုရဟန်းခံပွဲအတွက် ဟိုင်းဂျက်အမိုးဖွင့်ယာဉ်ဖြင့် သံဖြူဇရပ်မြို့နယ် ဝဲခမိကျေးရွာတွင် ဆိတ်သွားဝယ်စဉ်၊ ရွာထိပ်တွင် တောင်ညိုစစ်ကြောင်း နှင့်တွေ့ရှိ ၎င်းတို့အား စစ်ဆေးခဲ့ရာမှ နိုင်သန်းဇော် ၏ လက်ကိုင်ဖုန်းအတွင်း ကရုပ္ပိစခန်းမှူး၏ ဖုန်းနံပါတ်တွေ့ရှိခဲ့သည့်အတွက် ၎င်းတို့ (၄) ဦးအား ဖမ်းဆီးခေါ်ဆောင်သွားပြီးနောက် သတ်ပစ်လိုက်ခြင်းဖြစ်သည်ဟု ဒေသတွင်း ခိုင်လုံသည့် သတင်းအရင်းအမြစ်များထံမှ သိရသည်။
ဒေသခံတစ်ဦးက “နိုင်သန်းဇော် တို့ (၄) ယောက်သတ်တာ တစ်ယောက်တည်းတော့မဖြစ်နိုင်ဘူး။ တောင်ညိုစစ်ကြောင်းက တာဝန်ရှိသူတွေက သူ့လူတွေကို ကာကွယ်ချင်လို့ ရဲဘော်တစ်ယောက်ကိုဘဲ ပုံချလိုက်တဲ့လို့ ယူဆတယ်၊ ဒေသခံတွေရဲ့ အခြေအနေတွေ အကြောင်းအရင်းတွေကို သေချာစုံစမ်းခြင်းမရှိဘဲနဲ့ အပြစ်မဲ့ပြည်သူတွေကို သတ်ပစ်လိုက်တာဟာ စစ်ရာဇဝတ်ကျူးလွန်တာဖြစ်တယ်” ဟု ပြောကြားသည်။
ပြည်သူ့ကာကွယ်ရေးတပ်မတော် တောင်ပိုင်းတိုင်စစ်ဌာနချုပ်၊ အမှတ် (၂) စစ်ဒေသ၊ စစ်ဒေသခွဲ (၃) ၊ တောင်ညိုစစ်ကြောင်း တပ်ခွဲ(၂) တပ်စု (၁) မှ တပ်သား ရဲဘော် ဟိန်းမင်းလတ် သည် (၆.၂.၂၀၂၄) ရက်နေ့တွင် ပြည်သူများ၏သတင်းပေးချက်အရ ဖမ်းဆီးရမိခဲ့သော သံသယရှိသူ (၄) ဦးအား မူးယစ်သောက်စား၍ ရိုက်နှက်စစ်ဆေးခဲ့ရာမှ လူသတ်မှုဖြစ်ပွားခဲ့သဖြင့် ကရင့်လွတ်မြောက်ရေးတပ်မတော် နှင့် ပြည်သူ့ကာကွယ်ရေးတပ်မတော်မှ ပြဌာန်းချမှတ်ထားသော ပြစ်မှုပုဒ်မများအရ အလုပ်ကြမ်းနှင့် ထောင်ဒဏ် (၅) နှစ် အပြင် ပြည်သူ့ကာကွယ်ရေးတပ်မတော်မှ ရာသက်ပန်ထုတ်ပယ်လိုက်ကြောင်း ယင်းတောင်ညိုစစ်ကြောင်း၏ စစ်ခုံရုံးအဖွဲ့က အမိန့်စာထုတ်ပြန်ခဲ့ကြောင်း သိရသည်။
ပျောက်ဆုံးနေကြသူများမှာ ကရုပ္ပိကျေးရွာနေ အသက် (၄၀) နှစ်အရွယ် နိုင်သန်းဇော်၊ အသက် (၅၀) နှစ်အရွယ် နိုင်အကျဲ နှင့် ၎င်းတို့၏ မိတ်ဆွေများဖြစ်ကြသည့် အံခဲကျေးရွာနေ အသက် (၄၀) နှစ်အရွယ် နိုင်ကွန်းတီး နှင့် နိုင်ကွန်းတင့် တို့ဖြစ်ကြောင်း၊ ပြီးခဲ့သည့် မတ်လ (၆) ရက်နေ့ကတည်းက သံဖြူဇရပ်မြို့နယ် ကရုပ္ပိကျေးရွာ နှင့် အံခဲ့ကျေးရွာတို့မှ ပျောက်ဆုံးနေသည့် အမျိုးသား (၄) ဦးအား တော်လှန်ရေးတပ်ဖွဲ့တစ်ခုဖြစ်သည့် တောင်ညိုစစ်ကြောင်း တပ်ခွဲ – ၂ မှ ပစ်သတ်ခဲ့သည်ဟု သတင်းများထွက်ပေါ်နေကြောင်း စုံစမ်းသိရှိထားသည်။
အသတ်ခံခဲ့ရသည့် ကရုပ္ပိကျေးရွာနေ နိုင်သန်းဇော် ဆိုသူမှာ မွန်ပြည်သစ်ပါတီလက်အောက်ရှိ လယ်ယာဥယျာဉ်ခြံအဖွဲ့ဝင်တစ်ဦးဖြစ်ပြီး၊ နိုင်အကျဲ ဆိုသူမှာ သာမန်အရပ်သားတစ်ဦးဖြစ်ကြောင်း၊ အံခဲကျေးရွာနေ နိုင်ကွန်းတီ နှင့် နိုင်ကွန်းတင့် တို့နှစ်ဦးမှာ ဝက်မွေးမြူရေးလုပ်ငန်း လုပ်ကိုင်နေသူများဖြစ်ကြကြောင်း ဒေသခံများထံမှ သိရသည်။
လတ်တလော တောင်ညိုစစ်ကြောင်း မှ တာဝန်ရှိသူများမှ အသတ်ခံခဲ့ရသူများ၏ မိသားစုဝင်များအား လျော်ကြေးပေးကာ ကျေအေးကြောင်းလက်မှတ်ထိုးခိုင်းရန် စီစဉ်နေကြကြောင်းလည်း ယင်းစစ်ကြောင်း နှင့် နီးစပ်သူများ၏ ပြောကြားချက်များအရ သိရသော်လည်း မိမိသတင်းဌာနမှ အတည်ပြုနိုင်ခြင်းမရှိခဲ့ပါ။
