ကောင်းဝါ၊ ၂၀၂၃ ဇူလိုင် (၇)
နစကစစ်ကောင်စီ၏ ငြိမ်းချမ်းရေးဆွေးနွေးရေးအဖွဲ့နှင့် မွန်ပြည်သစ်ပါတီ (NMSP) ကိုယ်စားလှယ်အဖွဲ့တို့ ပြီးခဲ့သည့် နှစ်ရက်တာဆွေးနွေးပွဲတွင် နစကစစ်ကောင်စီဘက်မှ တင်ပြလာသော ပြည်ထောင်စုငြိမ်းချမ်းရေးညီလာခံကျင်းပရေးကိစ္စကို မွန်ပြည်သစ်ပါတီအနေဖြင့် လက်မှတ်ရေးထိုးခဲ့ခြင်းမရှိကြောင်း အမည်ဖော်ခွင့်မရသည့် မွန်ပြည်သစ်ပါတီ ခေါင်းဆောင်တစ်ဦးမှ သိရသည်။
ဒုတိယဗိုလ်ချုပ်ကြီး ရာပြည့် ခေါင်းဆောင်သော နစကစစ်ကောင်စီ၏ ငြိမ်းချမ်းရေးဆွေးနွေးရေးအဖွဲ့နှင့် ဒုတိယဥက္ကဌ နိုင်အောင်မင်း ဦးဆောင်သော မွန်ပြည်သစ်ပါတီ NMSP ကိုယ်စားလှယ်အဖွဲ့တို့ နေပြည်တော် NRPC ရုံး၌ (ဇူလိုင် ၅-၆) နှစ်ရက်တာဆွေးနွေးပွဲအတွင်း ပြည်ထောင်စုငြိမ်းချမ်းရေးညီလာခံ ကျင်းပမည့်ရည်ရွယ်ချက်နှင့် ဒေသဖွံ့ဖြိုးရေးဆိုင်ရာကိစ္စရပ်များကို ဆွေးနွေးခဲ့ကြောင်း နစကသတင်းထုတ်ပြန်ချက်အရ သိရသည်။
သို့ရာတွင် လက်ရှိဖြစ်ပေါ်နေသော မြန်မာ့နိုင်ငံရေးပကတိဖြစ်စဥ်အရ ငြိမ်းချမ်းရေး လုပ်ငန်းစဥ်တွင် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူညီချက် NCA ကို ဆက်လက်အကောင်အထည်ဖော်ဆောင်၍ မရတော့ကြောင်း၊ သို့ဖြစ်ပါ၍ မွန်ပြည်သစ်ပါတီအနေဖြင့် NCA စာချုပ်မထိုးခင်ကတည်းက မြန်မာအစိုးရနှင့် သဘောတူညီထားသော ပြည်ထောင်စု သဘောတူညီချက် Bilateral Agreement အတိုင်း ဆက်လက်ရပ်တည်သွားမည် ဖြစ်ကြောင်း နစကစစ်ကောင်စီ၏ ငြိမ်းချမ်းရေးဆွေးနွေးရေးအဖွဲ့အား တင်ပြအသိပေးပြောဆိုခဲ့သည်ဟု သိရသည်။
လက်ရှိအခြေအနေတွင် NCA စာချုပ်သည် နာမည်သာကျန်ရှိနေပြီး အသက်မဝင်တော့သည့်အတွက် မွန်ပြည်သစ်ပါတီ ဗဟိုကော်မတီအနေဖြင့် မွန်ပြည်သစ်ပါတီအား PPST မှ နုတ်ထွက်စေခဲ့ပြီး တဖက်မှာလည်း သမ္မတဦးသိန်းစိန်အစိုးရ လက်ထက် ၂၀၁၂ ခုနှစ်က ချုပ်ဆိုခဲ့သည့် ပြည်ထောင်စုသဘောတူညီချက် Bilateral Agreement အတိုင်း လက်ရှိ နစကစစ်ကောင်စီနှင့် အပစ်အခတ်ရပ်စဲရေး ဆက်လက်ပြုလုပ်ထားရန် ဆုံးဖြတ်ထားကြောင်း သိရသည်။
