တိုက်ပွဲများ

ကရင်ပြည်နယ် ဘားအံမြို့နယ်အတွင်း သန်းခေါင်စာရင်းလုံခြုံရေးအဖွဲ့ RPG အထုခံရပြီး သေဆုံးမှုများရှိခဲ့သည်။

ရေးမြို့နယ် အာယုတောင်ကျေးရွာ ပြည်သူ့စစ်အဖွဲ့အား ယမန်နေ့ညပိုင်းက မွန်ပြည်သစ်ပါတီ (စစ်အာဏာရှင်တိုက်ဖျက်ရေး) NMSP (AD) မှ ဝင်ရောက်ပစ်ခတ် တိုက်ခိုက်ခဲ့ကြောင်း သတင်းရရှိသည်။

ရေးမြို့နယ်မြောက်ပိုင်း မော့ကနင်ကျေးရွာအနီးတွင် ယမန်နေ့က ကင်းပုန်းဝပ်နေသည့် စစ်ကောင်စီတပ်မှ အမျိုးသားနှစ်ဦးအား KNU/PDF ဟုစွပ်စွဲကာ သေနတ်ဖြင့်ပစ်သတ်ခဲ့ကြောင်း ဒေသခံများထံမှ သိရသည်။

ယမန်နေ့နံနက်ပိုင်းက ကျိုက်ထိုနှင့် ဘီးလင်းမြို့နယ်အတွင်း ရန်ကုန် - မော်လမြိုင်ကားလမ်းတွင် ဖြစ်ပွားခဲ့သည့် တိုက်ပွဲများ၌ အရပ်သားထိခိုက်မှုများရှိခဲ့ကြောင်း ဒေသခံများထံမှ သိရသည်။

သံဖြူဇရပ် - ရေး အမှတ် (၈) ပြည်ထောင်စုလမ်းမ နှစ်ကရင်လမ်းဝတွင် စစ်ကောင်စီဘက်မှ ပစ်ခတ်လိုက်သည့် လက်နက်ကြီးကျရောက်ပေါက်ကွဲမှုကြောင့် ဒေသခံ (၃) ဦးနှင့် တော်လှန်ရေးတပ်ဖွဲ့ဝင် (၁) ဦး ထိခိုက်ဒဏ်ရာရရှိကြောင်း ဒေသခံများထံမှ သိရသည်။

တနင်္သာရီတိုင်းဒေသကြီး ထားဝယ်မြို့နယ် ကျောက်ဆိပ်ကုန်းကျေးရွာအနီးတွင် ဩဂုတ်လ (၂၈) ရက်နေ့မနက်ပိုင်းက ဖြစ်ပွားခဲ့သည့် ပြည်သူ့ကာကွယ်ရးပူးပေါင်းတပ်ဖွဲ့နှင့် စစ်ကောင်စီတပ်အကြား တိုက်ပွဲအတွင်း စစ်ကောင်စီတပ်သား (၁၆) ဦးထက်မနည်း သေဆုံးပြီး တပ်ကြပ်ကြီးတစ်ဦးအား အရှင်ဖမ်းဆီးရမိခဲ့ကြောင်း ပြည်သူ့ကာကွယ်ရေးအဖွဲ့များထံမှ သိရသည်။

စစ်ကောင်စီ အနန်းကွင်းဗျူဟာစခန်းသို့ စစ်ကူလာပေးသော စစ်ကြောင်းတစ်ကြောင်း ယမန်နေ့က ကြားဖြတ်တိုက်ခိုက်ခံရသောကြောင့် အလောင်း ၉ လောင်း ကျန်ရစ်ခဲ့ပြီး တပ်ပျက်လုမတတ် ဆုတ်ခွာထွက်ပြေးသွားရကြောင်း ဒေသခံများနှင့် ဆက်သွယ်မေးမြန်းချက်အရ သိရသည်။

မွန်ပြည်နယ် သံဖြူဇရပ်မြို့နှင့် ကရင်ပြည်နယ် ကြာအင်းဆိပ်ကြီးမြို့နယ် ဘုရားသုံးဆူ ထိုင်းနယ်စပ်မြို့ကို ဆက်သွယ်ထားသော မော်တော်ကားလမ်းဖြတ်သန်းသွားရာ အနန်းကွင်းကျေးရွာနှင့်အနီးတဝိုက်ရွာများတွင် တိုက်ပွဲများနေ့စဥ်ဆက်တိုက်ဖြစ်ပေါ်နေပြီး စစ်ကောင်စီ၏ လေယာဥ်ဗုံးကြဲမှုကြောင့် ဘုန်းကြီးကျောင်းအပါအဝင် အနန်းကွင်းတစ်ရွာလုံးနီးပါး ပျက်စီးသွားပြီဟု ထွက်ပြေးလာသော ရွာသားအချို့က ပြောသည်။

ရေးမြို့နယ် နှစ်ကရင်ကျေးရွာလမ်းဝတွင် တပ်စွဲထားသည့် စစ်ကောင်စီတပ်သည် ဒရုန်းအပြင် လက်နက်ကြီးနှင့်ပါ ပစ်ခတ်တိုက်ခိုက်ခံရပြီး ထိုခိုက်သေဆုံးကာ ဒဏ်ရာရရှိခဲ့ကြောင်း တောင်ညိုစစ်ကြောင်း မှ သတင်းထုတ်ပြန်ခဲ့သည်။

ကျိုက်ထိုမြို့နယ် လက်ပြကျေးရွာ ဘဲလေးစားသောက်ဆိုင်အနီးရှိ နေအိမ်တစ်လုံးအား စစ်ကောင်စီတပ်မှ ဝင်ရောက်စီးနင်းခဲ့ရာမှ ပစ်ခတ်မှုများဖြစ်ပွားခဲ့ရာ အိမ်ရှင်အဖွားအိုတစ်ဦးနှင့် လက်နက်များဖြင့် PDF ၄ ဦးသေဆုံးခဲ့ကြောင်း စစ်ကောင်စီတပ်ဖွဲ့နှင့် နီးစပ်သူများထံမှ သိရသည်။