ရေးမြို့နယ် အာယုတောင် ပြည်သူ့စစ် (ဌာနေ) အဖွဲ့အား စစ်ကောင်စီဘက်မှ လက်နက်တပ်ဆင်ပေးခဲ့သောကြောင့် တိုက်ပွဲများဖြစ်ပေါ်လာမည်ကို ဒေသခံများက စိုးရိမ်ကြောင်း ဆက်သွယ်မေးမြန်းချက်များအရ သိရသည်။
ဒေသခံ တစ်ဦးက “အာယုတောင်ပြည်သူ့စစ်အဖွဲ့ကို စစ်တပ်က လက်နက်တပ်ဆင်ပေးလိုက်တော့ ကျနော်တို့ ကျေးရွာတွေဘက်မှာ တိုက်ပွဲတွေဖြစ်လာမှာကို စိုးရိမ်နေကြရတယ်။ နဂိုကတည်းက ပစ်တာခတ်တာတွေရှိနေတော့ အခုလို ပြည်သူ့စစ်တွေကိုလက်နက်ပေးလိုက်တော့ တစ်ဖက်က တော်လှန်ရေးအဖွဲ့တွေက လာတိုက်ကြမှာတော့ သေချာတယ်” ဟု ပြောသည်။
အာယုတောင်ကျေးရွာအုပ်စု အုပ်ချုပ်ရေးမှူး စစ်ကောင်စီဗိုလ်ကြီးဟောင်း ဦးလင်းဦး ဦးဆောင်သည့် အင်အား ၇၀ ခန့်ရှိသော အာယုတောင်ပြည်သူ့စစ် (ဌာနေ) အဖွဲ့အား ပြီးခဲ့သည့် ဇူလိုင်လ (၂၄) ရက်နေ့က အရှေ့တောင်တိုင်းစစ်ဌာနချုပ်လက်အောက်ခံ ရေးတပ်နယ်တွင် လက်နက်တပ်ဆင်ပေးခဲ့ခြင်းဖြစ်ကြောင်း စစ်ကောင်စီနှင့် နီးစပ်သူတစ်ဦးက ပြောကြားသည်။
“အာယုတောင်ပြည်သူ့စစ် (ဌာနေ) အဖွဲ့ကို လက်နက်တပ်ဆင်ပေးတဲ့အခမ်းအနားကို ရေးတပ်နယ်က ဒုစကခမှူး၊ စစ်ဦးစီး (ပထမတန်း)၊ နောက် ရေးခရိုင်ရဲမှူး နဲ့ ဌာနဆိုင်ရာတာဝန်ရှိသူတွေ တက်ရောက်ခဲ့ကြတာလို့ သိရပါတယ်”
အာယုတောင် ပြည်သူ့စစ် (ဌာနေ) အဖွဲ့မှာ ရေးမြို့နယ် အာယုတောင်ကျေးရွာအုပ်စုအပြင် နှင်းစုံ၊ ချောင်းတောင်တံတားအနီးဝန်းကျင်တွင် လှုပ်ရှားနေကြောင်း၊ ရေး-မော့ကနင် ကားလမ်းပေါ်၌ စစ်ဆေးရေးဂိတ်ဖွင့်ပြီး ငွေကြေးကောက်ခံမှုများလည်း လုပ်ဆောင်နေကြကြောင်း ဒေသခံများထံမှ သိရသည်။
ရေးမြို့နယ်အတွင်း အာယုတောင်ပြည်သူ့စစ် (ဌာနေ) အဖွဲ့နှင့် တော်လှန်ရေးတပ်ဖွဲ့များအကြား မကြာခဏ ပစ်ခတ်တိုက်ခိုက်မှုများဖြစ်ပွားလေ့ရှိခဲ့ရာ တော်လှနရေးအဖွဲ့များ၏ ပစ်ခတ်တိုက်ခိုက်မှုကြောင့် အာယုတောင်ပြည်သူ့စစ်အဖွဲ့ဝင် (၇) ဦးထက်မနည်း သေဆုံးခဲ့ကြောင်း သိရသည်။
မွန်ပြည်နယ်အတွင်းရှိ ပြည်သူ့စစ်အဖွဲ့များအား စစ်ကောင်စီတပ်မှ လက်နက်တပ်ဆင်ပေးခြင်းများလုပ်ဆောင်နေသည့်အပြင်၊ ရပ်ကွက် နှင့် ကျေးရွာတိုင်းတွင် ပြည်သူ့စစ်အဖွဲ့များ မဖြစ်မနေ ဖွဲ့စည်းထားကြရန်လည်း ဖိအားပေးထားကြောင်း သိရသည်။
