ထိုင်းနိုင်ငံ၊ ကန်ချနပူရီခရိုင်၊ စိုင်းယွတ်မြို့နယ်တွင် အလုပ်လုပ်ရန် တရားမဝင် ဝင်ရောက်လာသည့် မြန်မာအလုပ်သမားများ လိုက်ပါလာသော ပစ်ကပ်ကားတစ်စီး တိမ်းမှောက်ခဲ့ရာ ၃ ဦး ပွဲချင်းပြီးသေဆုံးပြီး ၃၅ ဦး ဒဏ်ရာရရှိခဲ့ကာ ၁၀ ဦးကျော်မှာ အခင်းဖြစ်ပွားပြီးနောက် တောနက်ထဲသို့ ထွက်ပြေးလွတ်မြောက်သွားခဲ့ကြောင်း သိရသည်။ (ယမန်နေ့က သတင်းဖော်ပြပြီး)
အောက်တိုဘာလ ၂၅ ရက်၊ နံနက် ၉ နာရီခွဲအချိန်က ကန်ချနပူရီ၊ စိုင်းယွတ်မြို့နယ်အတွင်း စံခလပူရီ-ကန်ချနပူရီ ကားလမ်းမအမှတ် ၃၂၃ ပေါ်တွင် ပစ်ကပ်ကားတစ်စီး အရှိန်မထိန်းနိုင်ဘဲ တိမ်းမှောက်မှုဖြစ်ပွားပြီး လူသေဆုံးမှုနှင့် ဒဏ်ရာရသူအများအပြားရှိကြောင်း သတင်းပေးချက်အရ စိုင်းယွတ်မြို့နယ်ရဲစခန်းမှ တာဝန်ရှိသူများက ဆေးဘက်ဆိုင်ရာအဖွဲ့များနှင့် ကယ်ဆယ်ရေးအဖွဲ့များကို ချက်ချင်းဆက်သွယ် အကူအညီတောင်းခဲ့သည်။
အခင်းဖြစ်ပွားရာနေရာသို့ ရောက်ရှိစစ်ဆေးရာ ဘန်ကောက်လိုင်စင်တပ်ဆင်ထားသည့် ငွေရောင် နစ်ဆန်း နာဗာရာ (Nissan Navara) အမျိုးအစား ပစ်ကပ်ကားတစ်စီးသည် လမ်းဘေးတွင် အပြင်းအထန် ပျက်စီးနေသည့် အခြေအနေဖြင့် တိမ်းမှောက်နေသည်ကို တွေ့ရှိခဲ့ရသည်။
ယာဉ်တိမ်းမှောက်မှုကြောင့် ဒဏ်ရာရသူ ၃၅ ဦး (အမျိုးသား ၂၅ ဦး၊ အမျိုးသမီး ၁၀ ဦး) နှင့် ပွဲချင်းပြီး သေဆုံးသူ ၃ ဦးရှိခဲ့ပြီး ၎င်းတို့အားလုံးမှာ မြန်မာအလုပ်သမားများဖြစ်ကြောင်းတွေ့ရှိရသည်။ ဒဏ်ရာရသူများကို အနီးဆုံးဆေးရုံသို့ အမြန်ဆုံး ပို့ဆောင်ကုသပေးခဲ့သည်။
အခင်းဖြစ်ပွားရာနေရာရှိ CCTV မှတ်တမ်းများအရ အဆိုပါကားသည် တရားမဝင် အလုပ်သမားများ တင်ဆောင်လာသောကားဖြစ်ပြီး အရှိန်ပြင်းစွာ မောင်းနှင်လာခဲ့ရာမှ ဘယ်ဘက်နောက်ဘီး ကျွတ်ထွက်သွားခဲ့သောကြောင့် ကားမှာအရှိန်မထိန်းနိုင်ဘဲ တစ်ဖက်ယာဉ်ကြောသို့ ကျော်ကာ ပြင်းထန်စွာ တိမ်းမှောက်သွားခဲ့သည်။ တိမ်းမှောက်မှု၏ ပြင်းထန်သောအားကြောင့် ကားနောက်ရှိ အလုံပိတ်သေတ္တာမှာ လွင့်စဉ်ထွက်သွားပြီး ကားပေါ်တွင်ပါလာသော အလုပ်သမားများမှာ နေရာအနှံ့သို့ လွင့်စဉ် ပြန့်ကျဲသွားခဲ့သည်။
ထိုအချိန်တွင် ဒေသခံများ၏ ပြောကြားချက်အရ ယာဉ်တိမ်းမှောက်မှုဖြစ်ပွားပြီးနောက် ယာဉ်မောင်းနှင့်အတူ အခြားအလုပ်သမား ၁၀ ဦးခန့်သည် လမ်းဘေးရှိ တောထဲသို့ ထွက်ပြေးတိမ်းရှောင်သွားခဲ့ကြသည်။
ထို့ကြောင့် လုံခြုံရေးတပ်ဖွဲ့ဝင်များက ပူးပေါင်း၍ အဆိုပါနေရာကို ဝိုင်းရံပိတ်ဆို့ ရှာဖွေခဲ့ရာ အလုပ်သမား ၇ ဦးကို ဖမ်းဆီးထိန်းသိမ်းနိုင်ခဲ့ပြီး ကျန်ရှိသူများကို ဆက်လက်လိုက်လံရှာဖွေ ဖမ်းဆီးလျက်ရှိသည်။
ကနဦး စုံစမ်းစစ်ဆေးချက်များအရ အာဏာပိုင်များက အဆိုပါကားသည် ထောင်းဖာဖွန် (Thong Pha Phum) နယ်စပ်မှတစ်ဆင့် ထိုင်းနိုင်ငံအတွင်းပိုင်းသို့ တရားမဝင် ဝင်ရောက်လာသည့် အလုပ်သမားများကို သယ်ဆောင်လာခြင်းဖြစ်နိုင်ကြောင်း ခန့်မှန်းထားသည်။
ထွက်ပြေးတိမ်းရှောင်နေသော ယာဉ်မောင်းနှင့် ဤဖြစ်စဉ်တွင် ပါဝင်ပတ်သက်သည့် လူမှောင်ခိုကွန်ရက်ကို ဖော်ထုတ်ဖမ်းဆီးနိုင်ရန် စုံစမ်းစစ်ဆေးမှုများကို အရှိန်မြှင့်လုပ်ဆောင်သွားမည်ဖြစ်ကြောင်း သိရသည်။
