ချင်းရိုင်ရဲတပ်ဖွဲ့က ဘဏ်ရှေ့တွေမှာ လှည့်ပတ်ပြီး ပိုက်ဆံလိုက်ထုတ်နေတဲ့ အသက် ၃၅ နှစ်အရွယ် တရုတ်နိုင်ငံသားတစ်ဦးကို ATM ကတ် ၂,၀၅၇ ကတ်၊ ငွေသား ၅၃၇,၉၀၀ ဘတ်နဲ့အတူ ဖမ်းဆီးရမိခဲ့ပါတယ်။

ဖမ်းမိတဲ့သူက နည်းပညာရာဇဝတ်ဂိုဏ်းရဲ့ ခိုင်းစေချက်အတိုင်း ပိုက်ဆံထုတ်တာ၊ လွှဲတာတွေလုပ်ပေးဖို့ အငှားခိုင်းခံရတာလို့ ထွက်ဆိုပါတယ်။

ဒါ့အပြင် ချင်းစန်မြို့နယ်မှာလည်း လိမ်လည်ဖို့ဖွင့်ထားတဲ့ ဘဏ်စာအုပ်တွေနဲ့ ဆင်းမ်ကတ်အများအပြားကို လာအိုနိုင်ငံက တရုတ်မီးခိုးရောင်အဖွဲ့ဆီ ပို့ပေးဖို့လုပ်နေတဲ့ ထိုင်းနိုင်ငံသားတစ်ဦးကိုလည်း ဖမ်းမိခဲ့ပါတယ်။

ရဲတွေက ဒီငွေလိမ်ဂိုဏ်းရဲ့ ငွေကြေးလည်ပတ်မှုကို ဖြတ်တောက်ဖို့ အမှုဆက်လက်စစ်ဆေးပြီး ပိုင်ဆိုင်မှုတွေကို သိမ်းဆည်းသွားမယ်လို့ ဆိုပါတယ်။
ယနေ့အောက်တိုဘာလ ၂၄ ရက်နေ့၊ မနက် ၁၁ နာရီမှာ ချင်းရိုင်မြို့၊ “ပန်ရတ်” ကော်ဖီဆိုင်မှာ ချင်းရိုင်ခရိုင်ရဲတပ်ဖွဲ့မှူး ရဲချုပ် မာနพ ဆေနာကူ နဲ့ တာဝန်ရှိသူတွေက နည်းပညာနဲ့ဆက်စပ်တဲ့ နိုင်ငံဖြတ်ကျော်ရာဇဝတ်မှုကြီး ၂ ခုကို ဖမ်းဆီးရမိကြောင်း ပူးတွဲသတင်းစာရှင်းလင်းပွဲ ပြုလုပ်ခဲ့ပါတယ်။

ချင်းရိုင်မြို့မရဲစခန်းကနေ အသက် ၃၅ နှစ်အရွယ် တရုတ်နိုင်ငံသား Mr. HU HAOJIE ကို အောက်တိုဘာလ ၂၃ ရက်နေ့၊ သန်းခေါင်ယံအချိန်မှာ ချင်းရိုင်မြို့လယ်၊ ဘန်ကောက်ဘဏ်ရှေ့မှာ ဖမ်းဆီးခဲ့တာပါ။ ရဲတွေကင်းလှည့်နေတုန်း မသင်္ကာဖွယ်ရာအမူအရာနဲ့ ထွက်ပြေးဖို့ကြိုးစားတဲ့ တရုတ်အမျိုးသားကို တွေ့လို့ စစ်ဆေးဖမ်းဆီးခဲ့တာဖြစ်ပါတယ်။

သူ့ရဲ့တည်းခိုခန်းကို ဆက်လက်ရှာဖွေရာမှာ သက်သေခံပစ္စည်းတွေအများကြီးတွေ့ခဲ့ပါတယ်။ အဲဒီထဲမှာ ဘဏ်အမျိုးမျိုးက ATM ကတ် စုစုပေါင်း ၂,၀၅၇ ကတ်၊ လက်ကိုင်ဖုန်း ၂ လုံး၊ လက်ပ်တော့ ၁ လုံးနဲ့ ငွေသား ၅၃၇,၉၀၀ ဘတ်တို့ ပါဝင်ပါတယ်။

စစ်ဆေးမေးမြန်းရာမှာ သူက Application ကနေ ဆက်သွယ်လာတဲ့ တရုတ်အမျိုးသားတစ်ယောက်ရဲ့ ခိုင်းစေချက်အတိုင်း ပိုက်ဆံထုတ်ပေးတာ၊ လွှဲပေးတာတွေလုပ်ရတယ်လို့ ဝန်ခံခဲ့ပါတယ်။

ဒါကြောင့် ရဲတပ်ဖွဲ့က သူ့ကို “သူများရဲ့ အီလက်ထရောနစ်ကတ်တွေကို သုံးဖို့အတွက် မတရားလက်ဝယ်ထားရှိမှု”၊ “နည်းပညာရာဇဝတ်မှုတွေမှာ အသုံးပြုဖို့ ဘဏ်အကောင့်တွေ ရှာဖွေပေးမှု” စတဲ့ ပြစ်မှုတွေနဲ့ အရေးယူထားပါတယ်။

နောက်တစ်နေရာဖြစ်တဲ့ ချင်းစန်မြို့မှာတော့ ဘဏ်စာအုပ်၊ ATM ကတ်နဲ့ ဆင်းမ်ကတ်တွေကို လာအိုနိုင်ငံဘက်ကို ခိုးပို့နေတယ်ဆိုတဲ့ သတင်းရလို့ ရဲတွေက ရွှေတြိဂံနယ်စပ်ဂိတ်ရှေ့က ကားအပ်တဲ့နေရာမှာ စောင့်ဖမ်းခဲ့ပါတယ်။ အဲဒီမှာ အသက် ၃၅ နှစ်အရွယ် နိုင်ရို့ ဆိုသူကို ဘဏ်စာအုပ် ၃၄ အုပ်၊ ATM ကတ် ၃၈ ကတ်နဲ့ ဆင်းမ်ကတ် ၃၉ ခုတို့နဲ့အတူ ဖမ်းဆီးရမိခဲ့ပါတယ်။

တာဝန်ရှိသူတွေရဲ့အဆိုအရ ဒီကွန်ရက်ဟာ လိမ်လည်တဲ့ Scammer ဂိုဏ်းတွေအသုံးပြုဖို့အတွက် အဲဒီဘဏ်အကောင့်နဲ့ ကတ်တွေကို လာအိုနိုင်ငံက “တရုတ်မီးခိုးရောင်” အဖွဲ့တွေဆီကို ပို့ပေးနေတာဖြစ်တယ်လို့ သိရပါတယ်။

ချင်းရိုင်ခရိုင်ရဲတပ်ဖွဲ့မှူး ရဲချုပ်က ဒီဖမ်းဆီးမှုက ရာဇဝတ်ဂိုဏ်းတွေဟာ အလွန်ကြီးမားတဲ့ကွန်ရက်နဲ့ လှုပ်ရှားနေတာကို ပြနေတယ်လို့ ပြောပါတယ်။

တာဝန်ရှိသူတွေကို ချီးကျူးပြီး ဒီကွန်ရက်တစ်ခုလုံးကို ခြေရာခံဖော်ထုတ်ပြီး ပိုင်ဆိုင်မှုတွေသိမ်းဖို့၊ ငွေကြေးခဝါချမှုတွေနဲ့ ငွေလိမ်ဂိုဏ်းတွေရဲ့ လည်ပတ်မှုကို ဖြတ်တောက်ဖို့ အမြန်ဆုံးလုပ်ဆောင်ဖို့ တိုက်တွန်းခဲ့ပါတယ်။ ပြည်သူတွေကိုလည်း မသမာသူတွေရဲ့ လိမ်လည်မှုအမျိုးမျိုးကို သတိထားကြဖို့ သတိပေးခဲ့ပါတယ်။