မွန်ပြည်နယ်၊ ကျိုက်ထိုမြို့နယ်မှာ အောက်တိုဘာ ၁၇ ရက်နေ့ မနက်ပိုင်းက စစ်ကောင်စီက ဂျက်ဖိုက်တာနဲ့ ဗုံးလာကြဲတဲ့အတွက် ရွာသား ၃ ယောက် ဒဏ်ရာရသွားတယ်လို့ ဒေသခံတွေက ပြောပါတယ်။
အဲ့ဒီနေ့ မနက် ၁၀ နာရီ ၄၅ မိနစ်လောက်မှာ ကျောက်ဖျာရွာနဲ့ နတ်စင်ရွာကို လေယာဉ်နဲ့ ဗုံးကြဲခဲ့တာပါ။
ကျောက်ဖျာရွာထဲမှာတော့ လူနေအိမ်တစ်လုံးနားကို ဗုံးကျည်ကျလို့ အမျိုးသမီးတစ်ဦးနဲ့ အမျိုးသားနှစ်ဦး ဗုံးစထိမှန်ပြီး ဒဏ်ရာရခဲ့ပါတယ်။ အိမ်တချို့လည်း ပျက်စီးသွားတယ်လို့ ဒေသခံတစ်ယောက်က ပြောပြပါတယ်။
ဒဏ်ရာရတဲ့သူတွေကိုတော့ ကျိုက်ထိုဆေးရုံကို ပို့ထားတယ်လို့ သိရပါတယ်။
နတ်စင်ရွာ အနောက်ဘက်ကိုလည်း ဗုံးကြဲခဲ့ပေမယ့် ထိခိုက်ဒဏ်ရာရတဲ့သူတော့ မရှိခဲ့ဘူးလို့ ဆိုပါတယ်။
ဒီလထဲမှာပဲ အောက်တိုဘာ ၉ ရက်နေ့ကလည်း ဘီးလင်းမြို့နယ်၊ ပျဉ်းမပင်ဆိပ်ရွာကို စစ်ကောင်စီက လေကြောင်းကနေ တိုက်ခိုက်ခဲ့လို့ ကလေး ၅ ယောက် သေဆုံးပြီး လူ ၁၀ ယောက်ကျော် ဒဏ်ရာရခဲ့တဲ့ ဖြစ်စဥ်လည်း ရှိခဲ့ပါသေးတယ်။
