နွန်ထဘူရီ၊ အောက်တိုဘာ ၁၉ – ကိုယ်အလေးချိန် ကီလိုဂရမ် ၂၀၀ ကျော်ရှိပြီး အစာမစားရ၍ အားနည်းကာ အသက်ရှူရခက်ခဲနေသည့် လူနာအမျိုးသားတစ်ဦးအား ကယ်ဆယ်ရေးသမား အယောက် ၂၀ ကျော်က ကြိုးဖြင့် သွယ်ချခြင်း အထူးကျွမ်းကျင်သူများ၏ အကူအညီဖြင့် အရေးပေါ် ကယ်ဆယ်ခဲ့ရသည်။

လူနာ၏ ကိုယ်အလေးချိန်မှာ ဓာတ်လှေကားဖြင့် သယ်ဆောင်နိုင်သည့် ဝန်ထက် ကျော်လွန်နေသောကြောင့် သံခြင်းတောင်းနှင့် ကြိုးများကို အသုံးပြု၍ အခန်းရှိရာ ပဉ္စမထပ်မှ ခက်ခက်ခဲခဲ သွယ်ချခဲ့ရပြီးနောက် ဆေးရုံသို့ ဘေးကင်းစွာ ပို့ဆောင်နိုင်ခဲ့သည်။

၂၅၆၈ ခုနှစ်၊ အောက်တိုဘာလ ၁၈ ရက်နေ့၊ ည ၉ နာရီ အချိန်တွင် နွန်ထဘူရီခရိုင်၊ ရတနာလမ်းမပေါ်ရှိ အခန်းငှားတိုက်တစ်လုံး၏ ပဉ္စမထပ်တွင် နေထိုင်သူ ကိုယ်အလေးချိန် ကီလိုဂရမ် ၂၀၀ ကျော်ရှိ လူနာအမျိုးသားတစ်ဦးအတွက် အကူအညီတောင်းခံကြောင်း ဆီယမ် နွန်ထဘူရီ ကယ်ဆယ်ရေးအဖွဲ့ (Siam Nonthaburi) နှင့် VRTT (Volunteer Rescue Team Thailand) အဖွဲ့တို့ထံသို့ သတင်းပေးပို့ချက် ရောက်ရှိခဲ့သည်။

လူနာမှာ အစာနှင့်ရေ မသောက်သုံးရသည်မှာ နှစ်ရက်ကျော် ရှိပြီဖြစ်သောကြောင့် အသက်ရှူရခက်ခဲခြင်း၊ အားအင်ကုန်ခမ်းခြင်းတို့ကြောင့် မိမိကိုယ်ကို မလှုပ်ရှားနိုင်၊ မကူညီနိုင်ဘဲ ဖြစ်နေခဲ့ပြီး ကျင်ကြီးကျင်ငယ်ကိုပင် မထိန်းနိုင်တော့သည့် အခြေအနေသို့ ရောက်ရှိနေခဲ့သည်။

အခြေအနေကို သုံးသပ်ပြီးနောက် လူနာ၏ ကိုယ်အလေးချိန်မှာ ကီလိုဂရမ် ၂၀၀ ကျော်နေသည့်အတွက် အဆောက်အအုံ၏ ဓာတ်လှေကားဖြင့် သယ်ဆောင်ရန် မဖြစ်နိုင်ကြောင်း ကယ်ဆယ်ရေးအဖွဲ့က ဆုံးဖြတ်ခဲ့သည်။

ထို့ကြောင့် အထူးနည်းလမ်းကို အသုံးပြုရန် ဆုံးဖြတ်ခဲ့ပြီး လူနာကို သံခြင်းတောင်းထဲထည့်ကာ အဆောက်အအုံအတွင်းရှိ လှေကားအတိုင်း ကြိုးဖြင့် သွယ်ချရန် စီစဉ်ခဲ့သည်။ ဤလုပ်ငန်းစဉ်အတွက် မက်တာ နခွန်ပထုန် ရတ်ချဘူရီ (Metta Nakhon Pathom Ratchaburi) မှ ကြိုးသိုင်းအထူးကျွမ်းကျင် ကယ်ဆယ်ရေးအဖွဲ့ကို အကူအညီတောင်းခံခဲ့ရသည်။

ကယ်ဆယ်ရေးသမား အယောက် ၂၀ ကျော်သည် လိုအပ်သောပစ္စည်းကိရိယာများကို ပြင်ဆင်ပြီး အဆောက်အအုံ၏ ၇ လွှာတွင် ကြိုးချည်နှောင်သည့်နေရာကို တပ်ဆင်ခဲ့ကြသည်။

ထို့နောက် လူနာကို အခန်းတွင်းမှ သတိဖြင့် သယ်ထုတ်ကာ သံခြင်းတောင်းထဲသို့ ထည့်ပြီး စက်သီးနှင့် ကြိုးများပါဝင်သည့် စနစ်ကို အသုံးပြု၍ သွယ်ချခဲ့သည်။

ကယ်ဆယ်ရေးသမားများက လူနာတင်ခုတင်ကို လှေကားတစ်လျှောက် ထိန်းကြောင်းပေးခဲ့ရာ စုစုပေါင်း မိနစ် ၃၀ ကျော်အကြာတွင် လူနာအား အောက်ဆုံးထပ်သို့ ဘေးကင်းစွာ သယ်ဆောင်နိုင်ခဲ့ပြီး ဖရာနန်ကလောင် (Phra Nangklao) ဆေးရုံသို့ အမြန်ဆုံး ပို့ဆောင်ပေးခဲ့သည်။

ဆီယမ် နွန်ထဘူရီ ကယ်ဆယ်ရေးအဖွဲ့မှ တာဝန်ရှိသူ Mr. Yutthaphong Chusiri က “လူနာက ကီလို ၂၀၀ ကနေ ၃၀၀ ကြားလောက် ရှိပါတယ်။ အသက်ရှူမဝဘူး၊ ကူညီမယ့်သူမရှိဘူးလို့ အကြောင်းကြားတဲ့အတွက် ကျွန်တော်တို့က အထူးကျွမ်းကျင်အဖွဲ့နဲ့ ပစ္စည်းကိရိယာတွေကို ခေါ်ယူပြီး ကူညီခဲ့တာပါ” ဟု ပြောကြားခဲ့သည်။

VRTT အဖွဲ့မှ ကိုယ်စားလှယ် Ms. Jirawan Suwannacharoen ကလည်း “ဒီတစ်ကြိမ် သယ်ယူမှုက တကယ်ကို ခက်ခဲပါတယ်။ ကြိုးအသုံးပြုမှု ကျွမ်းကျင်ဖို့လိုသလို၊ လူနာရဲ့ ကိုယ်အလေးချိန်ကို ခံနိုင်အောင် သံဘောင်ပါတဲ့ လူနာတင်ခုတင်ကို သုံးခဲ့ရပါတယ်။ လူနာက စကားပြောနိုင်သေးပေမယ့် အရမ်းကို အားနည်းပြီး မောပန်းနေပါတယ်။ ဒါပေမဲ့ နောက်ဆုံးမှာတော့ သူ့ကို ဘေးကင်းကင်းနဲ့ အောက်ကို ရောက်အောင် ပို့ပေးနိုင်ခဲ့ပါတယ်” ဟု ဖြည့်စွက် ပြောကြားခဲ့သည်။