ကန်ချနပူရီ၊ အောက်တိုဘာ ၁၂ − စက်တင်ဘာလနှောင်းပိုင်းကစပြီး ပျောက်ဆုံးနေခဲ့သော အသက် ၁၉ နှစ်အရွယ် ဗြိတိန်နိုင်ငံသား Mr. Lawrence Stallard Honour အား ကန်ချနပူရီပြည်နယ်၊ စံခလပူရီမြို့နယ်ရှိ ဘုရားသုံးဆူကျေးရွာ (ထိုင်း) အတွင်းရှိ ဝပ်ထမ်ကဲဝ်ဆဝမ်ဘန်ဒါလ် ဘုန်းတော်ကြီးကျောင်းတွင် ဒေသခံများ၏ သတင်းပေးချက်အရ ယမန်နေ့က ရှာဖွေတွေ့ရှိခဲ့သည်။
အောက်တိုဘာ ၁၁ ရက်၊ ည ၇:၃၀ နာရီအချိန်တွင် ဘုရားသုံးဆူကျေးရွာမှ ဒေသခံများက One Sky Foundation အရာရှိများ၊ Lat Ya Task Force စစ်သားများ၊ စံခလပူရီမြို့နယ်ရဲတပ်ဖွဲ့နှင့် မြို့နယ်အုပ်ချုပ်ရေးရုံးတို့အား သတင်းပို့ခဲ့သည်။
ဒေသခံများက ပျောက်ဆုံးနေသူနှင့် ဆင်တူသူတစ်ဦးကို စံခလပူရီမြို့နယ်၊ နောင်လူး မူ ၉ ရပ်ကွက်ရှိ ဘုန်းတော်ကြီးကျောင်းတွင် တွေ့ရှိခဲ့ကြောင်း ပြောကြားခဲ့သည်။
အရာရှိများက ချက်ချင်းသွားရောက်စစ်ဆေးခဲ့ရာ ၎င်းမှာ Mr. Lawrence Stallard Honour ပင်ဖြစ်ကြောင်း အတည်ပြုနိုင်ခဲ့သည်။
ထို့နောက် ၎င်းအား One Sky Foundation ၏ စံခလပူရီမြို့နယ်ရုံးသို့ ခေါ်ဆောင်သွားကာ အချက်အလက်များ မေးမြန်းစုံစမ်းခဲ့သည်။
Mr. Lawrence Stallard Honour ပျောက်ဆုံးမှုအား ၎င်း၏မိခင် မစ္စ ဂူလ်နာရာ ဖတ်တာခိုဗာ (ဘီလာရုစ်နိုင်ငံသူ) မှ သားဖြစ်သူ ပတ္တရားမြို့၊ ချွန်ဘူရီပြည်နယ်ရှိ ၎င်းတို့နေအိမ်မှ စက်တင်ဘာ ၂၆ ရက်နေ့တွင် ပျောက်ဆုံးသွားကြောင်း တိုင်ကြားပြီးနောက် ရှာဖွေရေးလုပ်ငန်းများ စတင်ခဲ့ခြင်းဖြစ်သည်။
၎င်း၏အီးမေးလ်လိပ်စာကို စစ်ဆေးရာတွင် စံခလပူရီမြို့နယ်အတွင်း လှုပ်ရှားမှုရှိကြောင်း တွေ့ရှိခဲ့သည်။
အဆိုပါအခြေအနေကြောင့် ခြေလျင်တပ်ရင်း ၉ ၏ တပ်မှူး ဗိုလ်ချုပ် Natthaphong Atsawinwong, ပြည်နယ်အုပ်ချုပ်ရေးမှူး Mr. Athisan Intara နှင့် ပြည်နယ်ရဲတပ်ဖွဲ့မှူး ရဲမှူးချုပ် Phassawi Rueangphu တို့က ဒုတိယပြည်နယ်အုပ်ချုပ်ရေးမှူး Mr. Wutthipong Supakwanich အား အမှတ် (၂၉) ခြေလျင်တပ်ရင်းမှူး ဗိုလ်မှူးကြီး Phansak Phriwphanit, ဒုတိယမှူး ဗိုလ်မှူးကြီး Piyanat Phattharashatwong, စံခလပူရီမြို့နယ်ရဲမှူး ရဲမှူး Santi Phithaksakul, မြို့နယ်အုပ်ချုပ်ရေးမှူး Mr. Suriyasak Mueanon, ပြည်နယ် လူဝင်မှုကြီးကြပ်ရေးမှူး ရဲမှူး Korn Somkane နှင့် နယ်ခြားစောင့်တပ်ရင်း (၁၃၄) (စံခလပူရီမြို့) မှ တပ်မှူးတို့နှင့် ညှိနှိုင်းဆောင်ရွက်ရန် တာဝန်ပေးခဲ့သည်။
One Sky Foundation နှင့် ပူးပေါင်း၍ အဆိုပါအဖွဲ့အစည်းများသည် သတင်းအချက်အလက်များ ရှာဖွေခြင်း၊ မြို့နယ်အတွင်းနှင့် ထိုင်း-မြန်မာနယ်စပ်ရှိ ဘုရားသုံးဆူကျေးရွာ၊ မူ ၉၊ နောင်လူးရပ်ကွက်တစ်လျှောက်ရှိ လမ်းဘေးများ၊ ဟိုတယ်များနှင့် အပန်းဖြေစခန်းများတွင် တပ်ဆင်ထားသည့် CCTV ကင်မရာများမှ ရုပ်ပုံများကို စစ်ဆေးခြင်းတို့ကို ဆောင်ရွက်ခဲ့ကြောင်း သိရသည်။
