“ဝ” ပြည်သွေးစည်း ညီညွှတ်ရေး တပ်မတော် (UWSA) ထိန်းချုပ်နယ်မြေရှိ “ဝ”-တရုတ်နယ်စပ်ဂိတ်များတွင် တရုတ်ဘက်မှ စစ်ဘက်ဆိုင်ရာ လက်နက်နှင့် အသုံးအဆောင်ပစ္စည်းများမှအပ ကျန်ကုန်ပစ္စည်းများအား ဖြတ်သန်းခွင့်ပြုလာပြီဖြစ်ကြောင်း “ဝ” လူငယ်အသံ၏ မြေပြင်သတင်းအရင်းအမြစ်များက ပြောကြားသည်။
ဤအခြေအနေများသည် UWSA မှ တရုတ်၏ဆန္ဒအရ ရှမ်းမြောက်တွင် ဖြစ်ပွားနေသော စစ်ပွဲများ၌ ညီနောင်မဟာမိတ် (အာရက္ခတပ်တော် – AA၊ တအာင်းတပ် – TNLA၊ ကိုးကန့်တပ် – MNDAA) အပြင် အခြားသော လက်နက်ကိုင်တပ်ဖွဲ့ PDF များကို စစ်လက်နက်ထောက်ပံ့မှု ရပ်တန့်လိုက်ပြီး မည်သည့်အကူအညီမှ ပေးတော့မည်မဟုတ်ကြောင်း တရားဝင်ကြေညာပြီးနောက် ပြန်လည်ခွင့်ပြုလာခြင်းဖြစ်သည်ဟု အမည်မဖော်လိုသည့် သတင်းရင်းမြစ်တစ်ဦးက ပြောသည်။
“ဝ-တရုတ် နယ်စပ်ဂိတ်မှာ ကုန်စည်တင်သွင်းခွင့် ကန့်သတ်ခံခဲ့ရတာ၊ ဂိတ်တွေ စပိတ်တာက ၁၀၂၇ ဒုတိယလှိုင်းဖြစ်တဲ့ ၂၀၂၄ သြဂုတ်လဝန်းကျင်ကတည်းကပါ။ တစ်နှစ်တိတိ ပြည့်တဲ့အချိန်မှာတော့ တရားဝင် ထုတ်ဖော်ပြောဆိုလာတာပေါ့။ တရုတ်ဖိအားဆိုတာကိုလည်း အတိအလင်း ကြေညာခဲ့တယ်။ ကြေညာပြီးနောက် စက်တင်ဘာနဲ့ အောက်တိုဘာလထဲမှာတော့ တရုတ်ဘက်က ဖိအားတချို့ ပြန်လည်ဖြေလျော့လာတာ တွေ့ရတယ်။ ကုန်ပစ္စည်းတွေ ပြန်ဝင်တာ၊ ဓာတ်ဆီပြန်ဝင်တာ၊ အိမ်ဆောက်ပစ္စည်း၊ လျှပ်စစ်ပစ္စည်း၊ စားသောက်ကုန် စတာတွေပေါ့” ဟု ၎င်းက ရှင်းပြသည်။
ကန့်သတ်ချက်များ ဖြေလျော့ပြီးနောက် လုပ်ငန်းရှင်များ ပြန်လည်ဝင်ရောက်လာသကဲ့သို့ ယခင်က ရပ်တန့်ခဲ့ရသည့် ဆောက်လုပ်ရေးလုပ်ငန်းများနှင့် အဆောက်အအုံများလည်း ပြန်လည်ပတ်နေပြီဖြစ်ကြောင်း ဟိုပန်မြို့နေ ဒေသခံအမျိုးသားတစ်ဦးက ပြောသည်။
“တရုတ်မုန့်စားပွဲနဲ့ နှစ်သစ်ကူးနီးလို့ပဲ ခဏတာ ကုန်ပစ္စည်းတွေ တင်သွင်းခွင့်နဲ့ ဂိတ်တွေ ပြန်ဖွင့်တာလား ဘာလားတော့ မသိဘူး။ တရုတ်ပစ္စည်းတွေ ပြန်မှာယူလို့ ရလာတယ်။ အရင်ကဆို မရဘူးလေ။ ဟိုပန်မှာလည်း တရုတ်လုပ်ငန်းရှင်တွေ ပြန်ဝင်လာကြတယ်။ အရင်က ပိတ်ထားတဲ့ဆိုင်တွေ ပြန်ဖွင့်လာတယ်။ တရုတ်ဂိတ်ပိတ်လို့ ဆောက်လုပ်ရေးပစ္စည်းတွေ မှာယူလို့မရတာကြောင့် ရပ်တန့်ခဲ့ရတဲ့ အဆောက်အအုံတွေ အခုပြန်လည်ပတ်လာတာ တွေ့ရတယ်။ မိုင်းပေါက်၊ ပန်ဆန်းမှာလည်း လူတွေ ပြန်စည်လာတာ တွေ့ရပါတယ်” ဟု ၎င်းက ဆိုသည်။
တရုတ်၏ အစောပိုင်း ဖိအားပေးမှုသည် ၁၀၂၇ စစ်ဆင်ရေး ဒုတိယလှိုင်း သြဂုတ်လထဲတွင် စတင်ခဲ့ပြီး “ဝ”-တရုတ် နယ်စပ်ဂိတ်ကြီး (၄) ခုဖြစ်သည့် မုန်းအား (မုန်းစီးဂိတ်)၊ ဆောဖာ (ပန်ဝိုင်ဂိတ်)၊ မန်ခါး (နမ့်တစ်ဂိတ်) နှင့် ယုံးဟော့ဂိတ်များအပြင် ၁၀၂၇ စစ်ဆင်ရေးအတွင်း တိုင်းရင်းသားလက်နက်ကိုင်များ ထိန်းချုပ်လိုက်သည့် နယ်စပ်ဂိတ်များတွင် ကုန်စည်တင်သွင်းခွင့်နှင့် လူအဝင်အထွက်များကို ကန့်သတ်ပိတ်ပင်ခဲ့သည်။
“ဝ” နယ်စပ်ဂိတ်များ ကန့်သတ်ပိတ်ပင်ခဲ့ခြင်းကြောင့် “ဝ” ပြည်နယ် ခရိုင်လေးခု (ဟိုပန်၊ မိုင်းပေါက်၊ မိုင်းလင်း၊ မိုင်းမော) အောက်တွင် နေထိုင်ကြသည့် ပြည်သူများသည် ဒေသတွင်း စားသောက်ကုန်၊ လူသုံးကုန်၊ အခြေခံဆေးဝါး၊ လျှပ်စစ်ပစ္စည်း၊ အိမ်ဆောက်ပစ္စည်းနှင့် ဓာတ်ဆီပြတ်လပ်မှုများနှင့် ရင်ဆိုင်ခဲ့ရသည်။ လူတစ်ဦး၊ မိသားစုတစ်စုကို တစ်ပိုင်တစ်နိုင် ခြင်းတစ်ခြင်းစာသာ ဈေးဝယ်ခွင့်ရသည့်အထိ အကြပ်ရိုက်စေခဲ့ပြီး ဒေသတွင်း သီးနှံစိုက်ပျိုး၍ အသက်မွေးကြသည့် ပြည်သူများအတွက် တရုတ်သို့ တင်သွင်းခွင့်မရတော့ခြင်းကြောင့် ဝမ်းစာရေးတွင် အခက်တွေ့ခဲ့ရသည်။
အခုလို တရုတ်၏ နယ်စပ်ဂိတ်ဆိုင်ရာ ကန့်သတ်ချက်နှင့် ဖိအားများကို အနီးစပ်ဆုံး ကြုံတွေ့ခဲ့ရသည့်အထဲတွင် UWSA အပြင် ကိုးကန့်တပ်မတော် (MNDAA) လည်း ပါဝင်သည်။
