မြန်မာစစ်လေယာဉ်တွေက ထီးခီးမြို့နယ်ထဲက အိမ်တွေကို ယမန်နေ့က ဗုံးကြဲတိုက်ခိုက်ခဲ့လို့ မြန်မာ၊ ကရင်၊ မွန် တိုင်းရင်းသား ၃၀၀ ကနေ ၄၀၀ လောက်ဟာ ထိုင်း-မြန်မာနယ်စပ် ကန်ချနပူရီ၊ ဖူနမ်ရွန်းစစ်ဆေးရေးဂိတ်နဲ့ မျက်နှာချင်းဆိုင် ထိုင်းဘက်ခြမ်းကို ထွက်ပြေးခဲ့ကြရပါတယ်။
ကန်ချနပူရီပြည်နယ်အုပ်ချုပ်ရေးမှူး မစ္စတာ အာ့တီဆန် အင်တာရာနဲ့ အမှတ် ၉ တပ်မဟာမှူး ဗိုလ်ချုပ် နတ်ဖုန် အတ်ဆဝမ်ဝုန်တို့က ထွက်ပြေးလာသူတွေကို လူသားချင်းစာနာထောက်ထားမှု အကူအညီတွေ ပေးဖို့ ညွှန်ကြားခဲ့ပါတယ်။
အစားအသောက်၊ ရေသန့်တွေ ပေးခဲ့ပြီး ဆေးဘက်ဆိုင်ရာဝန်ထမ်းတွေကလည်း ကျန်းမာရေးစစ်ဆေးပေးကာ ဒဏ်ရာတွေကို ကုသပေးခဲ့ပါတယ်။
အောက်တိုဘာ ၉ ရက်နေ့ နောက်ဆုံးအခြေအနေအရ ထီးခီးကျေးရွာတွေရဲ့ အခြေအနေ ပုံမှန်ပြန်ဖြစ်နေပြီလို့ ကန်ချနပူရီအုပ်ချုပ်ရေးမှူးက အတည်ပြုလိုက်ပါတယ်။ ထိုင်းအာဏာပိုင်တွေက ဒုက္ခသည်တွေ ဒီနေ့ သူတို့အိမ်တွေကို ပြန်နိုင်မယ်လို့ ယူဆနေပါတယ်။ တစ်နေ့တာလုံးမှာလည်း ဘာဖြစ်စဉ်မှ မဖြစ်ခဲ့ဘူးလို့ သိရပါတယ်။
လုံခြုံရေးအဖွဲ့အစည်းတွေက ဒုက္ခသည်အားလုံး ထိုင်းနိုင်ငံထဲကို ဝင်ရောက်ခြင်းမရှိဘဲ မြန်မာဘက်ခြမ်း နယ်စပ်တစ်လျှောက်မှာပဲ နေထိုင်နေကြတယ်လို့ အတည်ပြုခဲ့ပါတယ်။
ဖူနမ်ရွန်းဒေသခံတွေကလည်း အိမ်နီးချင်းတွေကို လူသားချင်းစာနာမှုနဲ့အညီ အစားအသောက်တွေ ချက်ပြုတ်ကူညီပေးခဲ့ကြပါတယ်။
ကရင်အမျိုးသားအစည်းအရုံး (KNU) မြိတ်-ထားဝယ်ခရိုင်ရဲ့ သတင်းထုတ်ပြန်ချက်အရ စစ်ကောင်စီတပ်က အောက်တိုဘာ ၈ ရက်နေ့ မနက် ၉ နာရီနဲ့ နေ့လည် ၂ နာရီလောက်မှာ တနင်္သာရီတိုင်း၊ ထားဝယ်မြို့နယ်၊ ထီးခီးကျေးရွာကို တိုက်ပွဲမရှိဘဲ Y-12 လေယာဉ်နဲ့ ဗုံးအလုံး ၄၀ ကျော် ဆက်တိုက်ကြဲချခဲ့ပါတယ်။
ဒီဗုံးကြဲမှုကြောင့် နေအိမ် ၅ လုံးထက်မနည်း ထိခိုက်ပျက်စီးခဲ့ပြီး ကားနဲ့ အဆောက်အအုံတချို့လည်း ပျက်စီးခဲ့တယ်လို့ KNU မြိတ်-ထားဝယ်ခရိုင် ပြန်ကြားရေးတာဝန်ခံက ပြောပါတယ်။
ဒီလိုဗုံးကြဲမှုကြောင့် ဒေသခံ ၃၅၀ ကျော် ဘေးလွတ်ရာကို ထွက်ပြေးတိမ်းရှောင်ခဲ့ကြရပါတယ်။
Crd- ကန်ချနပူရီဒေသဆိုင်ရာ သတင်းအဖွဲ့
