ထိုင်းနိုင်ငံဆိုတာ ကမ္ဘောဒီးယား၊ မြန်မာနဲ့ တခြားအိမ်နီးချင်းနိုင်ငံ နယ်စပ်တွေမှာ ကျားဖြန့်လုပ်ငန်းတွေ ရှိနေတာကို မီးမောင်းထိုးပြနေကျ နိုင်ငံပါ။
အခုတော့ သူတို့နိုင်ငံက ဒုဝန်ကြီးချုပ်နဲ့ ဝန်ကြီးပါ ကျားဖြန့်ဂိုဏ်းတွေနဲ့ ပေါင်းပြီး တစ်လကို ဘတ်သန်းပေါင်းများစွာ လာဘ်ယူနေတယ်ဆိုတဲ့ စွပ်စွဲချက်တွေကြောင့် အရှက်ရစရာ ဖြစ်လာခဲ့ပါပြီ။
ပြည်သူ့ပါတီက ထိုင်းလွှတ်တော်အမတ်တစ်ယောက်ဖြစ်သလို အောက်လွှတ်တော် လုံခြုံရေးကော်မတီဥက္ကဋ္ဌလည်းဖြစ်တဲ့ ရမ်ဆီမန်ရုမ်းက လွှတ်တော်မှာ ဆွေးနွေးပြောဆိုခဲ့ပါတယ်။
သူပြောတာကတော့ ကမ္ဘောဒီးယား ကျားဖြန့်ကွန်ရက်ကြီးရဲ့ ထိပ်တန်းခေါင်းဆောင်လို့ ယူဆရတဲ့ ဘန်ဂျမင်မူယာဘာဂါ (ခေါ်) ဘန်စမစ် ဆိုသူက စက်တင်ဘာ ၂၉ ရက်နေ့မှာ ထိုင်းနိုင်ငံထဲကို သီးသန့်ဂျက်လေယာဉ်နဲ့ ထွက်ပြေးရောက်ရှိလာပြီး အခု ဘယ်ရောက်နေလဲ မသိရဘူးတဲ့။
ဘန်စမစ်ဆိုတာက ကမ္ဘောဒီးယားဝန်ကြီးချုပ်ဟောင်း ဟွမ်ဆန်နဲ့ ကျားဖြန့်လုပ်ငန်းတွေအတွက် အတိုင်ပင်ခံအဖြစ်ပါ အလုပ်လုပ်ပေးနေသူဖြစ်ပြီး ထိုင်းနိုင်ငံသားခံယူခွင့် လျှောက်ထားတာကိုလည်း ကျားဖြန့်ပတ်သက်မှု သံသယကြောင့် ခွင့်မပြုသေးဘူးလို့ ပြောပါတယ်။
ဘန်စမစ်ဟာ Huiwan Company နဲ့ Huiwan PLC ကုမ္ပဏီတွေနဲ့ ပူးပေါင်းပြီး ကျားဖြန့်ကနေရတဲ့ ဘတ် ၃ ထရီလီယံကို ငွေဖြူငွေမဲ ခဝါချပေးတဲ့ တာဝန်လည်း ယူထားသူဖြစ်တယ်လို့ ရမ်ဆီမန်ရုမ်းက ဆွေးနွေးသွားပါတယ်။
ထိုင်းဆိုက်ဘာရဲတပ်ဖွဲ့ရဲ့ သက်သေရှာထားမှုအရ အဲဒီကျားဖြန့်ငွေမဲတွေကို ဘဏ်တွေနဲ့ ချိတ်ဆက်ပြီး ရွှေတွေကို ခရစ်ပတိုငွေကြေးနဲ့ ဝယ်၊ ပြီးတော့ ငွေဖြူအဖြစ် ပြန်လဲပြီး ရယူကြတာတဲ့။
ဒါ့အပြင် ထိုင်းဒစ်ဂျစ်တယ်စီးပွားရေးနဲ့ လူမှုရေးဝန်ကြီး ချိုင်ချန်နော့ချစ်ဒ်ချော့ဘ်ဟာ ကျားဖြန့်ဂိုဏ်းတွေ အမှုမပေါ်၊ စွဲချက်တင်မခံရအောင် အာမခံတဲ့အနေနဲ့ တစ်လကို ဘတ်သန်း ၄၀ ရယူခံစားနေတယ်လို့ သိရတယ်လို့လည်း သူက ဆွေးနွေးခဲ့ပါတယ်။
လက်ရှိ ထိုင်းဒုဝန်ကြီးချုပ်လည်းဖြစ် စိုက်ပျိုးရေးဝန်ကြီးတာဝန်လည်း ယူထားတဲ့ ကပ္ပတိန် သမ်မာနတ်ပရွမ်ပို ဟာလည်း ကျားဖြန့်ဂိုဏ်းခေါင်းဆောင် ဘန်စမစ်နဲ့ ဓာတ်ပုံတွေ တွဲရိုက်ထားတဲ့ သက်သေတွေ ထွက်ပေါ်လာတဲ့အတွက် ချိတ်ဆက်ပတ်သက်နေတာတွေကို ရှင်းလင်းသင့်တယ်လို့ အောက်တိုဘာ ၂ ရက်က လွှတ်တော်မှာ ဦးစားပေးခေါင်းစဉ်အဖြစ် ဆွေးနွေးတင်ပြသွားခဲ့ပါတယ်။
ဒီအခြေအနေတွေကြောင့် ဒစ်ဂျစ်တယ်စီးပွားရေးနဲ့ လူမှုရေးဝန်ကြီးက ရှင်းလင်းချက်ပေးရမှာဖြစ်သလို၊ ပရွမ်ပိုအပြင် ထိုင်းဗဟိုဘဏ်နဲ့ သက်ဆိုင်ရာအေဂျင်စီတွေပါ ရှင်းလင်းချက်ပေးရတော့မှာ ဖြစ်ပါတယ်။
ဒီအခြေအနေမှာတော့ ဒုဝန်ကြီးချုပ် ကပ္ပတိန် ပရွမ်ပိုက သူ့နာမည်ပျက်အောင် သတင်းမှားတွေ ဖြန့်နေတဲ့ မီဒီယာတွေအားလုံး၊ သူ့ကို စွပ်စွဲခဲ့တဲ့ ရမ်ဆီမန်ရုမ်းအပါအဝင် ပါဝင်ပတ်သက်သူတိုင်း ရာဇဝတ်မှုနဲ့ အရပ်ဘက် တရားစွဲဆိုမှုတွေ မလွဲမသွေ ခံကြရမှာဖြစ်ပြီး ဘတ်ဘီလီယံပေါင်းများစွာ နစ်နာကြေးပေးဖို့ တောင်းဆိုသွားမယ်လို့ ပြန်လည်ကြိမ်းမောင်း ပြောဆိုသွားခဲ့ပါတယ်။
ပရွမ်ပိုကတော့ အခုလက်ရှိမှာတောင် ဖယာအိုခရိုင်မှာ သူ့ကို စွပ်စွဲထားမှု ၂၇၀ နဲ့ပတ်သက်ပြီး သတင်းသုံးသပ်သူ၊ အတိုက်အခံနိုင်ငံရေးသမားတွေကို စွဲချက် ၁၀၀ ကျော်တင်ပြီး အမှုဖွင့်ထားပေမဲ့ အမှုလက်ခံဖို့တော့ ဆိုင်းငံ့ထားဆဲပဲလို့ သိရပါတယ်။
ပရွမ်ပိုက အောက်တိုဘာ ၃ ရက်မှာ ပြင်းပြင်းထန်ထန် ခြိမ်းခြောက်ပြောဆိုသွားခဲ့ပါတယ်။ “သေချာပေါက် တရားစွဲမယ်။ ဘာကျားဖြန့်လဲ။ ငါ့လိုလူက ဒီလိုကျားဖြန့်ကိစ္စနဲ့ ဆက်စပ်စရာလား။ ဘာသာရေးပွဲတစ်ပွဲမှာ အတူရှိခဲ့တဲ့ ဓာတ်ပုံကို အသုံးချပြီး နိုင်ငံရေးအမြတ်ထုတ်၊ မဟုတ်မမှန်သတင်းတွေ ဖြန့်တာ။ ငါ့ပုံရိပ် ပျက်စီးစေမှုကြောင့် ဘတ်ဘီလီယံချီပြီး နစ်နာကြေးပြန်ပေးဆပ်ကြဖို့၊ ညစာကို ဖယာအိုတရားရုံးမှာ စားကြဖို့ ပြင်ထား။ လာတောင်းပန်လည်း လက်ခံမှာ မဟုတ်တော့ဘူး။ ငါနဲ့ တိုက်ခိုက်ချင်ရင် ပြဿနာတက်သွားမယ်။ ကိုယ့်ကိုယ်ကိုယ် အရင်ကယ်တင်ကြဦး။ ရထားသမျှဝင်ငွေက တရားဝင်ဝင်ငွေတွေချည်းပဲ။ အခွန်လည်း အားလုံးဆောင်ထားတယ်။ ပိုင်ဆိုင်မှုအားလုံးကို အသေးစိတ်စစ်ဆေးခံဝံ့တယ်။ ငါနဲ့ ပွဲလာမတည်ကြနဲ့။ ပါးစပ်ကပဲ ရဲရင့်နေပြီး ခြေထောက်တွေ တုန်နေကြတယ်” လို့ ပြောခဲ့ပါတယ်။
