ကန်ချနပူရီ၊ အောက်တိုဘာ ၃ – ကန်ချနပူရီပြည်နယ်၌ ထိုင်းနိုင်ငံတွင်း တရားမဝင် ဝင်ရောက်မှုများကို အထူးစီမံချက်ကာလအဖြစ် နှိမ်နင်းလျက်ရှိရာ အစုလိုက်အပြုံလိုက် ဖမ်းဆီးမှုများ နေ့စဉ်ဖြစ်ပွားနေကြောင်း သိရသည်။
ယမန်နေ့ အောက်တိုဘာလ ၂ ရက် ည ၉:၃၀ နာရီခန့်က ကန်ချနပူရီ လူဝင်မှုကြီးကြပ်ရေးအပါအဝင် စစ်တပ်၊ ရဲနှင့် အုပ်ချုပ်ရေးအဖွဲ့များ ပူးပေါင်းပြီး စိုင်းယွတ်အမြဲတမ်း စစ်ဆေးရေးဂိတ်တွင် ပိတ်ဆို့စစ်ဆေးမှုများ ပြုလုပ်ခဲ့သည်။
ထိုစစ်ဆေးမှုအတွင်း တရားမဝင် မြန်မာလုပ်သား ၄၂ ဦးနှင့် ၎င်းတို့ကို ပို့ဆောင်ပေးသည့် မြန်မာလူမျိုး ယာဉ်မောင်း ၄ ဦးတို့ကို ဖမ်းဆီးရမိပြီး ၎င်းတို့နှင့်အတူ Fortuner ဇိမ်ခံကားတစ်စီးနှင့် ပစ်ကပ်ကား ၃ စီး (Toyota Vigo, Mitsubishi Triton, Toyota Revo) စုစုပေါင်း ၄ စီးကိုလည်း သိမ်းဆည်းရမိခဲ့သည်။
ယာဉ်မောင်း ၄ ဦး၏ ထွက်ဆိုချက်များအရ ၎င်းတို့သည် မြန်မာလုပ်သားများကို စံခလပူရီမြို့နယ်ရှိ မွန်ဈေးမှ လာရောက်ခေါ်ဆောင်ပြီး စမွတ်ဆာခွန်ပြည်နယ်သို့ ပို့ဆောင်ရန် စီစဉ်ထားကြောင်း၊ လုပ်သားတစ်ဦးလျှင် ပို့ဆောင်ခ ဘတ် ၁၂,၀၀၀ ပေးရန် သဘောတူထားကြောင်းလည်း ဖော်ထုတ်နိုင်ခဲ့သည်။
ဖမ်းဆီးရမိသူများအနက် အချို့တွင် ခရီးသွားလာရေး စာရွက်စာတမ်းများ ရှိသော်လည်း အချို့မှာ ထိုင်းနိုင်ငံသားမဟုတ်သည့် ပုဂ္ဂိုလ်များဖြစ်ကြောင်း တာဝန်ရှိသူများက ပြောကြားခဲ့သည်။ လူဝင်မှုကြီးကြပ်ရေးဥပဒေအရ အရေးယူနိုင်ရန်အတွက် ဖမ်းဆီးရမိသူအားလုံးကို စိုင်းယွတ်ရဲစခန်းသို့ လွှဲပြောင်းပေးခဲ့သည်။
ကန်ချနပူရီပြည်နယ် ရဲတပ်ဖွဲ့မှူး Pol. Col. Korn Somkane က နယ်စပ်တစ်လျှောက် တရားမဝင်လုပ်သားများ သယ်ယူပို့ဆောင်ရေးကို စောင့်ကြည့်နှိမ်နင်းရန် မူဝါဒအရ ယခုကဲ့သို့ စစ်ဆင်ရေးများ ဆောင်ရွက်ခဲ့ခြင်းဖြစ်ကြောင်း ပြောကြားခဲ့သည်။
မြန်မာ-ထိုင်းနယ်စပ် ဘုရားသုံးဆူမှတစ်ဆင့် ကန်ချနပူရီသို့ တရားမဝင် ဝင်ရောက်ရန် ကြိုးပမ်းသူများသည် စံခလပူရီ၊ ထောင်ဖာဖွန်နှင့် စိုင်းယွတ်မြို့နယ်များကို ဖြတ်သန်းကာ ကီလိုမီတာ ၃၀၀ ခန့် ခရီးနှင်ရမည်ဖြစ်သောကြောင့် ယခင်ကဲ့သို့ လွယ်ကူတော့မည်မဟုတ်ကြောင်း သက်ဆိုင်ရာက သတိပေးထားသည်။
Crd- ကန်ချနပူရီဒေသဆိုင်ရာသတင်း
