ကရင့်လက်နက်ကိုင်အဖွဲ့ ၃ ဖွဲ့ဖြစ်တဲ့ နယ်ခြားစောင့်တပ် (BGF/KNA)၊ ဒီမိုကရေစီအကျိုးပြု ကရင်တပ်မတော် (DKBA/KNA) နဲ့ ကရင်ငြိမ်းချမ်းရေးကောင်စီ (PC) တို့ဟာ ငြိမ်းချမ်းရေးဆိုင်ရာ ဆွေးနွေးပွဲတစ်ခုကို စက်တင်ဘာ ၂၈ ရက်နေ့က BGF အမှတ် (၂) စစ်ဒေသဌာနချုပ်မှာ ပြုလုပ်ခဲ့ပါတယ်။
ဒီဆွေးနွေးပွဲမှာ ခေါင်းဆောင်အသီးသီး တက်ရောက်ခဲ့ကြပြီး၊ KNU ဒူးပလာယာခရိုင် ဥက္ကဋ္ဌဟောင်း ပဒိုစောရွှေမောင်းလည်း ပါဝင်တာကို ဓာတ်ပုံမှတ်တမ်းတွေမှာ တွေ့ရပါတယ်။
ဒါ့အပြင် BGF က KNA အဖြစ် ပြောင်းလဲဖွဲ့စည်းရာမှာ DKBA လည်း ပါဝင်လာတယ်လို့ ဓာတ်ပုံမှတ်တမ်းတွေက ပြသနေပါတယ်။
ရွေးကောက်ပွဲအပေါ် သဘောထားနဲ့ ပြည်သူ့လုံခြုံရေး
BGF, DKBA နဲ့ ငြိမ်းချမ်းရေးကောင်စီ PC သုံးဖွဲ့စလုံးဟာ စစ်ကောင်စီက ပြုလုပ်မယ့် ရွေးကောက်ပွဲတွေကို ကူညီဆောင်ရွက်ပေးမယ်လို့ ထုတ်ပြန်ထားပါတယ်။
BGF ရဲ့ ပြောရေးဆိုခွင့်ရှိသူ ဒုဗိုလ်မှူးကြီး နိုင်မောင်ဇော်ကတော့ ဒီဆုံးဖြတ်ချက်ဟာ ထိပ်ပိုင်းခေါင်းဆောင်တွေ အကြိမ်ကြိမ်ဆွေးနွေးပြီးမှ ခက်ခက်ခဲခဲ ချမှတ်ခဲ့ရတာဖြစ်ပြီး ဒေသလုံခြုံရေးနဲ့ ပြည်သူတွေရဲ့ လုံခြုံရေးကို ဦးစားပေးစဉ်းစားခဲ့တာလို့ ပြောပါတယ်။
သူက “အာဏာရှင်စနစ်ဆက်မရှည်စေချင်ရင် ရွေးကောက်ပွဲကို လက်ခံပေးရမယ်။ အပြောင်းအလဲတစ်ခုကိုသွားချင်ရင်တော့ ရွေးကောက်ပွဲကနေ တဦးတယောက်တည်းအုပ်ချုပ်တာမဟုတ်ဘဲ အများနဲ့ မဲပေးတဲ့စနစ်နဲ့ သွားမှသာ အပြောင်းအလဲတစ်ခု ဖြစ်လာမယ်” လို့လည်း ဖြည့်စွက်ပြောဆိုခဲ့ပါတယ်။
စစ်ရေးလေ့ကျင့်မှုနဲ့ ဒရုန်းသင်တန်း
လက်ရှိမှာ BGF က ကရင်ပြည်နယ်၊ ရွှေကုက္ကိုလ်မြိုင်ဒေသမှာ သူတို့တပ်သားတွေအပြင် စစ်ကောင်စီနဲ့ အဆင်ပြေတဲ့ DKBA နဲ့ KNU(PC) တပ်ဖွဲ့ဝင်တွေကို FPV (First-Person View) ဒရုန်းသင်တန်းတွေ ပေးနေတယ်လို့ သိရပါတယ်။
ဒီသင်တန်းကို BGF ခေါင်းဆောင် ဗိုလ်မှူးစောတင်ဝင်းက ဦးစီးသင်ကြားပေးနေပြီး စစ်တပ်ကို ထောက်ခံတဲ့ ကရင်လက်နက်ကိုင်တပ်ဖွဲ့တွေက ဒရုန်းပညာသင်ယူလိုသူတွေကို ဦးစားပေးခေါ်ယူနေတာ ဖြစ်ပါတယ်။
စစ်ရေးလေ့လာသူတစ်ဦးရဲ့ အဆိုအရ သင်တန်းသား ၁၀၀ လောက်ရှိပြီး BGF တပ်သားတွေ အများစုပါဝင်သလို DKBA နဲ့ PC အဖွဲ့က လူအချို့လည်း ပါဝင်တယ်လို့ သိရပါတယ်။
ပြီးခဲ့တဲ့ သြဂုတ်လက BGF/KNA ရဲ့ အမှတ် (၂) စစ်ဒေသက ဦးဆောင်ဖွင့်လှစ်ခဲ့တဲ့ အခြေခံစစ်သင်တန်း အပတ်စဉ် ၁၉/၂၀၂၅ က တပ်သားသစ် ၅၂၀ သင်တန်းဆင်းခဲ့ပြီး အဲဒီထဲက တချို့တပ်သားတွေက ဒရုန်းသင်တန်းကို ဆက်တက်နေကြတယ်လို့လည်း သတင်းရရှိပါတယ်။
၃ လကြာမြင့်တဲ့ စစ်သင်တန်းမှာ တပ်သားသစ်တွေကို လက်နက်တွေ တပ်ဆင်ပေးခဲ့ပြီး အခြေခံစစ်ပညာ၊ လက်နက်ကြီး၊ လက်နက်ငယ်နဲ့ စနိုက်ပါပစ်ခတ်နည်းတွေကို သင်ကြားပေးခဲ့တယ်လို့ ကရင်တော်လှန်ရေး သတင်းရင်းမြစ်တွေက ပြောပါတယ်။
ကရင်နယ်ခြားစောင့်တပ်ဖွဲ့ BGF ကို ဗိုလ်မှူးကြီး စောချစ်သူက တပ်ရင်း ၁၃ ရင်းနဲ့ ၂၀၁၀ ခုနှစ်က စတင်ဖွဲ့စည်းခဲ့တာဖြစ်ပြီး ယခုအခါ တပ်ရင်း ၆၀ ကျော် အင်အား ၁၀၀၀၀ ကျော်အထိရှိလာသလို အနိမ့်ဆုံးလစာ ဘတ် ၅ ထောင်နှုန်းနဲ့ တပ်သားသစ်များကို စုဆောင်းလာခဲ့တာ တွေ့ရပါတယ်။
KNU ရဲ့ သဘောထားနဲ့ နောက်ဆက်တွဲအခြေအနေ
တစ်ဖက်မှာတော့ KNU က ပြီးခဲ့တဲ့ သြဂုတ် ၂၆ ရက်နေ့က စစ်တပ်ရဲ့ ရွေးကောက်ပွဲကို ဆန့်ကျင်တဲ့ အချက် ၇ ချက်ပါ ကြေညာချက် ထုတ်ပြန်ခဲ့ပါတယ်။
အဲဒီကြေညာချက်မှာ စစ်တပ်ရဲ့ ရွေးကောက်ပွဲဟာ ဥပဒေအရ တရားမဝင်တာကြောင့် KNU က လုံးဝလက်မခံဘူးလို့ ဖော်ပြထားပါတယ်။
ဒီနောက်မှာ စစ်ကောင်စီက KNU ကို အကြမ်းဖက်အဖွဲ့အစည်းအဖြစ် ကြေညာခဲ့သလို ဥက္ကဋ္ဌနဲ့ ဗဟိုအလုပ်အမှုဆောင်အဖွဲ့က ခေါင်းဆောင်တွေကို ရွေးကောက်ပွဲဥပဒေနဲ့ တရားစွဲ အမှုဖွင့်ခဲ့ပါတယ်။
KNU ဥက္ကဋ္ဌ ပဒိုစောကွယ်ထူးဝင်း အပါအဝင် ၁၃ ဦးကို ရွေးကောက်ပွဲ ပျက်ပြားအောင် ဟောပြောပြောဆိုမှုတွေကြောင့် အမှုဖွင့်ထားတယ်လို့ စစ်တပ်က သတင်းထုတ်ပြန်ခဲ့ပါတယ်။
အနာဂတ်အလားအလာ
ခြုံငုံသုံးသပ်ရရင် ကရင်ပြည်နယ်ရဲ့ အနာဂတ်စစ်ရေးလှုပ်ရှားမှုတွေဟာ ပိုပြီးရှုပ်ထွေးလာနိုင်ပါတယ်။
စစ်ကောင်စီကို ဆန့်ကျင်တိုက်ခိုက်နေတဲ့ KNU နဲ့ နွေဦးတော်လှန်ရေးက ပေါက်ဖွားလာတဲ့ PDF အင်အားစုတွေ တစ်ဖက်၊ စစ်ကောင်စီဘက်ကို အကူအညီပေးနေတဲ့ ကရင်လက်နက်ကိုင်အဖွဲ့အစည်းတွေ တစ်ဖက်နဲ့ လက်နက်ကိုင်ပဋိပက္ခပုံစံကို ဆောင်လာမလားဆိုတာ စိုးရိမ်စရာဖြစ်လာပါတယ်။
ဒီအခြေအနေတွေက ကရင်ပြည်နယ်ရဲ့ ငြိမ်းချမ်းရေးလုပ်ငန်းစဉ်တွေအပေါ် ဘယ်လိုသက်ရောက်မှုတွေ ရှိလာမလဲဆိုတာကိုတော့ စောင့်ကြည့်လေ့လာနေဆဲပါပဲ။
