ထိုင်းနိုင်ငံ ကန်ချနပူရီပြည်နယ်မှာ မြန်မာရွှေ့ပြောင်း ၃ ယောက် ရေနစ်သေဆုံးခဲ့တဲ့ ရုပ်အလောင်းတွေ တွေ့ရှိခဲ့တယ်လို့ သိရပါတယ်။
မနေ့က စက်တင်ဘာလ ၁၂ ရက်နေ့ မနက် ၁၁ နာရီ ၃၅ မိနစ်လောက်မှာ ကန်ချနဘူရီခရိုင်ထဲက ဗာဂျီရာလောင်ကွန်း ရေလှောင်ကန်မှာ မြန်မာရွှေ့ပြောင်း ၃ ယောက်ရဲ့ ပုပ်ပွနေတဲ့ ရုပ်အလောင်းတွေကို တွေ့ခဲ့တာပါ။
အဲ့ဒီလူတွေက စက်တင်ဘာလ ၉ ရက်နေ့ ညက ထိုင်းထဲကို တရားမဝင် လှေနဲ့ ဝင်လာရင်း သစ်ငုတ်နဲ့တိုက်မိပြီး ရေထဲပြုတ်ကျ သေဆုံးခဲ့တဲ့ မြန်မာ ၂၂ ယောက်ထဲက ၃ ယောက်ဖြစ်တယ်လို့ သိရပါတယ်။
သေဆုံးသွားတဲ့ မြန်မာ ၃ ယောက်က အမျိုးသား ၂ ယောက်နဲ့ အမျိုးသမီး ၁ ယောက်ပါ။ အခုတော့ ရင်ခွဲစစ်ဆေးဖို့ စံခလပူရီ ဆေးရုံကို ပို့ထားတယ်လို့ ဆိုပါတယ်။
ဒီရေလမ်းကြောင်းနဲ့ မော်တော်ကားလမ်းကြောင်းတွေကနေပဲ မြန်မာနိုင်ငံ ဘုရားသုံးဆူဘက်ကနေတဆင့် ကန်ချနပူရီကို တရားမဝင် ဝင်ရောက်လေ့ရှိတယ်လို့လည်း သိရပါတယ်။
ဒီကိစ္စနဲ့ပတ်သက်ပြီး အသေးစိတ်ကိုတော့ စံခလပူရီ ရဲစခန်းက စုံစမ်းစစ်ဆေးနေတုန်းပဲ ဖြစ်ပါတယ်။
“အလုပ်ရှာဖို့ မျှော်လင့်ခဲ့ပေမဲ့ တခြားနိုင်ငံမှာ အသက်ဆုံးရှုံးခဲ့ရတယ်၊ နောက်ဆုံးတော့ အချည်းနှီးပဲ သေဆုံးခဲ့ရတဲ့ တန်ဖိုးမဲ့ဘဝတွေပါပဲ၊ အိမ်နီးချင်းအလုပ်သမားတွေရဲ့ ကြေကွဲစရာ အဖြစ်မှန်တစ်ခုပါပဲ”လို့ ထိုင်းကယ်ဆယ်ရေးသမားတစ်ဦးက မှတ်ချက်ပြုပါတယ်။
