ကန်ချနပူရီ၊ စက်တင်ဘာလ ၁၂ – ထိုင်းနိုင်ငံ၊ ကန်ချနပူရီပြည်နယ်၊ ထောင်ဖာဖွန်မြို့နယ်တွင် စစ်ဆေးရေးဂိတ်ကို ကျော်ဖြတ်ထွက်ပြေးခဲ့သော မသင်္ကာဖွယ် ပစ်ကပ်ကားနှစ်စီးကို ပူးပေါင်းအဖွဲ့က လိုက်လံဖမ်းဆီးရာမှ မြန်မာနိုင်ငံသား ၁၉ ဦးနှင့် လူမှောင်ခိုကူးသူ ယာဉ်မောင်းနှစ်ဦးတို့ကို ဖမ်းဆီးရမိခဲ့ကြောင်း သိရသည်။

သတင်းရဲဘော်များ၏ သတင်းပေးချက်အရ စက်တင်ဘာလ ၁၂ ရက်နေ့ နံနက်ပိုင်းတွင် ကန်ချနပူရီပြည်နယ်ရှိ Surasee တပ်ဖွဲ့၊ ရဲတပ်ဖွဲ့နှင့် လူဝင်မှုကြီးကြပ်ရေးဌာနတို့မှ ပူးပေါင်းအဖွဲ့သည် ထောင်ဖာဖွန်မြို့နယ်သို့ မြန်မာအလုပ်သမားများကို တရားမဝင်သယ်ဆောင်လာမည့် မော်တော်ယာဉ်နှစ်စီးကို ကြားဖြတ်ဖမ်းဆီးရန် စောင့်ကြပ်ခဲ့ကြသည်။

နံနက် ၆ နာရီခန့်တွင် အမှတ် ၃၂၃ ကန်ချနပူရီ-ထောင်ဖာဖွန် အဝေးပြေးလမ်းမပေါ်ရှိ ဓာတ်ဆီဆိုင်တစ်ဆိုင်အနီးတွင် စစ်ဆေးရေးဂိတ်တစ်ခုကို ယာယီဖွင့်လှစ်ပြီး စောင့်ဆိုင်းနေစဉ် မသင်္ကာဖွယ် တိုယိုတာ ရီဗို (Toyota Revo) ပစ်ကပ်ကားနှစ်စီး အတူတကွ မောင်းနှင်လာသည်ကို တွေ့ရှိရသည်။ ရဲအရာရှိများက ရပ်တန့်စစ်ဆေးရန် အချက်ပြသော်လည်း ကားနှစ်စီးစလုံး အရှိန်အဟုန်ပြင်းစွာ မောင်းနှင်ထွက်ပြေးခဲ့သည်။

တာဝန်ရှိသူများက အနီးကပ်လိုက်လံဖမ်းဆီးခဲ့ရာ ထင်ရှားကျော်ကြားသော ဟင်ဒတ် ရေပူစမ်း (Hin Dad Hot Spring) အနီးတွင် ကားနှစ်စီးကို ရပ်တန့်စေခဲ့သည်။ ယာဉ်မောင်းနှစ်ဦးသည် ထွက်ပြေးရန် ကြိုးပမ်းခဲ့သော်လည်း ဖမ်းဆီးရမိခဲ့သည်။ ၎င်းတို့မှာ အသက် ၃၂ နှစ်ရှိ နိုင်းဝမ်ချန်း (Mr. Wan Chan) နှင့် အသက် ၄၂ နှစ်ရှိ နိုင်းဝမ် (Mr. Wan) တို့ဖြစ်ပြီး ထိုင်းနိုင်ငံသား မဟုတ်ကြကြောင်း သိရသည်။

ကားနှစ်စီးအတွင်း စစ်ဆေးရာ အမျိုးသား၊ အမျိုးသမီး မြန်မာနိုင်ငံသား ၁၉ ဦးတို့ကို ကြပ်ကြပ်တည်းတည်း ထိုင်လျက်တွေ့ရှိရသည်။

၎င်းတို့အနက် တစ်ဦးတည်းသာ တရားဝင်ခရီးသွားစာရွက်စာတမ်းများ ပိုင်ဆိုင်ပြီး ကျန် ၁၈ ဦးမှာ စာရွက်စာတမ်းမဲ့များ ဖြစ်ကြောင်းသိရသည်။

ရဲတပ်ဖွဲ့က ကားများကို သက်သေခံပစ္စည်းအဖြစ် သိမ်းဆည်းခဲ့ပြီး ပါဝင်ပတ်သက်သူအားလုံးကို ထောင်ဖာဖွန်ရဲစခန်းသို့ ခေါ်ဆောင်စစ်ဆေးခဲ့သည်။
စကားပြန်မှတစ်ဆင့် စစ်ဆေးမေးမြန်းချက်အရ ဖမ်းဆီးခံရသူ မြန်မာအလုပ်သမားများသည် ရန်ကုန်မှ လာရောက်ကြသူများဖြစ်ပြီး ထိုင်းနိုင်ငံအတွင်းသို့ သဘာဝလမ်းကြောင်းများမှတစ်ဆင့် ဝင်ရောက်ခဲ့ကြကြောင်း သိရသည်။

မြန်မာလူပွဲစားတစ်ဦးက စစ်ဆေးရေးဂိတ်များကို ရှောင်ရှားကာ တောလမ်းများမှတဆင့် ခေါ်ဆောင်လာပြီးနောက် ထိုင်းနိုင်ငံတွင်းပိုင်းရှိ ခရိုင်များတွင် အလုပ်လုပ်ရန်အတွက် တစ်ဆင့်ပြီးတစ်ဆင့် ပို့ဆောင်ပေးခဲ့ခြင်းဖြစ်သည်ဟု ဆိုသည်။

၎င်းတို့တစ်ဦးစီသည် ပွဲစားခအဖြစ် ဘတ် ၁၄,၀၀၀ စီ ပေးဆောင်ခဲ့ရကြောင်း ထွက်ဆိုခဲ့သည်။

ယာဉ်မောင်းနှစ်ဦးကမူ ကန်ချနပူရီမြို့ရှိ စောင့်ဆိုင်းရာနေရာတစ်ခုသို့ အလုပ်သမားများကို ပို့ဆောင်ပေးရန်အတွက် လုပ်ငန်းရှင်တစ်ဦးထံမှ ငွေကြေးယူပြီး ငှားရမ်းခံရခြင်းဖြစ်ကြောင်း၊ တစ်ဦးလျှင် ဘတ် ၈,၀၀၀ စီ ရရှိခဲ့ပြီး ၎င်းတို့ပို့ဆောင်ပြီးပါက အခြားသူတစ်ဦးက ဆက်လက်လာရောက်ခေါ်ဆောင်မည်ဖြစ်ကြောင်း ထွက်ဆိုခဲ့သည်။

စစ်ဆေးမှုများအပြီးတွင် တာဝန်ရှိသူများက ယာဉ်မောင်းနှစ်ဦးအား “နိုင်ငံခြားသားများကို ဖမ်းဆီးခြင်းမှ လွတ်မြောက်စေရန် ခိုလှုံရာပေးခြင်း၊ ဝှက်ထားခြင်း သို့မဟုတ် အကူအညီပေးခြင်း” စသည့်စွဲချက်များဖြင့် အမှုဖွင့်ခဲ့ပြီး ၎င်းတို့၏ သက်သေခံကတ်ပြားများကို ဥပဒေအရ ပယ်ဖျက်ရန် စဉ်းစားလျက်ရှိသည်။ ခရီးသွားအလုပ်သမားအဖွဲ့ကိုမူ “တရားမဝင် နိုင်ငံခြားသားများအဖြစ် ထိုင်းနိုင်ငံသို့ ဝင်ရောက်နေထိုင်ခြင်း” စွဲချက်ဖြင့် အရေးယူခဲ့သည်။

Crd- CaoCao