မွန်ညီညွတ်ရေးပါတီ (MUP) က ၂၀၂၅ အထွေထွေရွေးကောက်ပွဲ အပိုင်း (၁) တွင် မွန်ပြည်နယ်ရှိ မဲဆန္ဒနယ်အားလုံး၌ ဝင်ရောက်ယှဉ်ပြိုင်မည်ဖြစ်ကြောင်း သတင်းရရှိသည်။

လာမည့် ဒီဇင်ဘာ ၂၈ ရက် (တနင်္ဂနွေနေ့) တွင် ကျင်းပမည့် ၂၀၂၅ ခုနှစ် အထွေထွေရွေးကောက်ပွဲ ပထမအဆင့်ကို မွန်ပြည်နယ်အတွင်းရှိ ကျိုက်ထို၊ သထုံ၊ မော်လမြိုင်၊ ချောင်းဆုံနှင့် ကျိုက်မရောမြို့နယ်များတွင် ကျင်းပမည်ဟု ပြည်ထောင်စုရွေးကောက်ပွဲကော်မရှင် (UEC) က ကြေညာထားသည်။

MUP သည် FPTP စနစ်နှင့် FPTP နှင့် PR ပေါင်းစပ်ထားသည့် MMP စနစ်တို့ဖြင့် ကျင်းပမည်ဖြစ်၍ သတ်မှတ်ထားသည့် မဲဆန္ဒနယ်အားလုံးတွင် ဝင်ရောက်ယှဉ်ပြိုင်သွားရန်ရှိကြောင်း ပါတီတာဝန်ရှိသူတစ်ဦးက ပြောသည်။

ထို့အပြင် ရွေးကောက်ပွဲ ပထမအဆင့်အပြင် နောက်ပိုင်းတွင် ပြုလုပ်မည့် ရွေးကောက်ပွဲများအတွက်ပါ ကိုယ်စားလှယ်လောင်းများ ရွေးချယ်သွားမည်ဟု ၎င်းက ဆိုသည်။

ကိုယ်စားလှယ်လောင်း ရွေးချယ်ရာတွင် UEC က သတ်မှတ်ထားသည့် အရည်အချင်းပြည့်မီသူ၊ သက်ဆိုင်ရာမြို့နယ်ပါတီကော်မတီမှ ရွေးချယ်တင်မြှောက်သူ၊ ၂၀၂၀ ပြည့်နှစ် အထွေထွေရွေးကောက်ပွဲတွင် အနိုင်ရရှိခဲ့သည့် ကိုယ်စားလှယ်လောင်းနှင့် ဝင်ရောက်ယှဉ်ပြိုင်ခဲ့သည့် ကိုယ်စားလှယ်လောင်း၊ ပါတီဗဟိုကော်မတီမှ ရွေးချယ်သူများဖြစ်ရမည်ဟု ၎င်းက ပြောကြားသည်။

MUP မှ နုတ်ထွက်ထားသူများနှင့် ၂၀၂၀ ပြည့်နှစ် အထွေထွေရွေးကောက်ပွဲတွင် ပါတီအား ဆန့်ကျင်ခဲ့သူများကိုမူ ပါတီဝင်အဖြစ် ပြန်လည်လက်ခံမည်မဟုတ်ကြောင်းလည်း ၎င်းက ဆိုသည်။

လွှတ်တော်အသီးသီး၏ ကိုယ်စားလှယ်လောင်းအမည်စာရင်းများကို စက်တင်ဘာ ၈ ရက်မှစတင် တင်သွင်းရမည်ဖြစ်ပြီး စက်တင်ဘာ ၁၂ ရက် နောက်ဆုံးထား ရုပ်သိမ်းနိုင်ကြောင်း UEC က ကြေညာထားသည်။

PR မဲဆန္ဒနယ်တွင် ဝင်ရောက်ယှဉ်ပြိုင်သည့် နိုင်ငံရေးပါတီတစ်ခုအနေဖြင့် ကိုယ်စားလှယ်လောင်း အမည်စာရင်း တင်သွင်းလွှာများကို စက်တင်ဘာ ၁၃ ရက်မှ ၁၇ ရက်အထိ ပြန်လည်တင်သွင်းရမည်။

၂၀၂၅ ခုနှစ် ဒီဇင်ဘာ ၂၈ ရက်တွင် ကျင်းပမည့် အထွေထွေရွေးကောက်ပွဲ၌ မွန်ပြည်နယ်အတွင်း ပြည်ထောင်စုတစ်ဝန်းလုံး စည်းရုံးမည့် ပါတီ ၉ ခုဖြစ်သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ တိုင်းရင်းသားစည်းလုံးညီညွတ်ရေးပါတီ၊ ပြည်သူ့ရှေ့ဆောင်ပါတီ၊ အမျိုးသားနိုင်ငံရေး ဒီမိုကရက်တစ်ပါတီ၊ မြန်မာနိုင်ငံတောင်သူလယ်သမား ဖွံ့ဖြိုးတိုးတက်ရေးပါတီ၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (ကျားဖြူပါတီ)၊ အမျိုးသမီးပါတီ (မွန်)၊ အမျိုးသားဒီမိုကရေစီအင်အားစုပါတီ၊ ပြည်သူ့ပါတီတို့နှင့်အတူ ပြည်နယ်တစ်ခုအတွင်း စည်းရုံးမည့်ပါတီ ၂ ခုဖြစ်သည့် မွန်ညီညွတ်ရေးပါတီနှင့် ပအိုဝ်းအမျိုးသား ဖွံ့ဖြိုးတိုးတက်ရေးပါတီတို့က ဝင်ရောက်ယှဉ်ပြိုင်သွားမည်ဖြစ်ကြောင်း UEC ထုတ်ပြန်ချက်များအရ သိရသည်။

Photo- ၂၀၂၀ ရွေးကောက်ပွဲ MUP မဲဆွယ်ခရီးစဥ် (ဓါတ်ပုံဟောင်း)