ထိုင်းနိုင်ငံ၊ ကန်ချနပူရီပြည်နယ်၊ ထောင်ဖာဖွန်မြို့နယ်မှာ တရားမဝင် မြန်မာအလုပ်သမား ၅၂ ဦးကို ကြပ်ကြပ်ညပ်ညပ် တင်ဆောင်လာတဲ့ ကားတစ်စီးကို တာဝန်ရှိသူတွေက ဖမ်းဆီးရမိခဲ့ပါတယ်။
ကားမောင်းသူကတော့ မှောင်ရိပ်ကို အခွင့်ကောင်းယူပြီး တောထဲကို ထွက်ပြေးသွားခဲ့တယ်လို့ သိရပါတယ်။
ဩဂုတ်လ ၃၀ ရက်၊ ၂၀၂၅ ခုနှစ်နေ့ (ဒီနေ့) ညသန်းခေါင်ကျော် ၀၀:၃၀ နာရီလောက်မှာ သတင်းပေးတစ်ဦးဆီကနေ ထောင်ဖာဖွန်မြို့နယ်ထဲကို အလုပ်သမားအများကြီး တင်ဆောင်လာတဲ့ သံသယဖြစ်ဖွယ် ပစ်ကပ်ကားတစ်စီး ဝင်လာမယ်လို့ သတင်းရခဲ့ပါတယ်။
အဲဒီကားက အဝေးပြေးလမ်းမ ၃၂၃ ကို အသုံးပြုမယ်လို့ သိရပါတယ်။ ဒါကြောင့် တာဝန်ရှိသူတွေက လမ်းကြောင်းတစ်လျှောက် လှည့်ကင်းတွေ ချထားခဲ့ပါတယ်။
နောက်ပိုင်းမှာ သတင်းရထားတဲ့အတိုင်း Toyota Hilux Vigo အမျိုးအစား၊ အဖြူရောင်၊ တစ်ခန်းပစ်ကပ်ကားတစ်စီး မောင်းနှင်လာတာကို တွေ့တော့ ရပ်တန့်ဖို့ အချက်ပြခဲ့ပါတယ်။ ဒါပေမဲ့ ကားမောင်းသူက ကားကို ပိုပြီးအရှိန်တင် မောင်းပြေးခဲ့တာကြောင့် တာဝန်ရှိသူတွေက နောက်ကနေ လိုက်ခဲ့ကြပါတယ်။
ထောင်ဖာဖွန်မြို့နယ်၊ ထာခနွန်ဒေသ၊ မူ ၃၊ ကရမ်ဂါစီရွာနားရောက်တော့ ကားမောင်းသူက လူရှင်းတဲ့လမ်းကြားထဲကို ကားကိုချိုးဝင်ပြီး ရပ်ထားခဲ့ပါတယ်။ ပြီးတော့ မှောင်ရိပ်ကို အခွင့်ကောင်းယူပြီး တောထဲကို ပြေးဝင်သွားခဲ့ပါတယ်။ တာဝန်ရှိသူတွေက လိုက်ပေမဲ့ မမီလိုက်ပါဘူး။
အဲဒီတစ်ခန်းပစ်ကပ်ကားကို စစ်ဆေးကြည့်တော့ အမျိုးသား ၃၇ ဦးနဲ့ အမျိုးသမီး ၁၅ ဦး၊ စုစုပေါင်း မြန်မာနိုင်ငံသား အလုပ်သမား ၅၂ ဦးကို ကားအပြည့် ကြပ်ကြပ်ညပ်ညပ် တင်ဆောင်လာတာကို တွေ့ခဲ့ရပါတယ်။
ကံကောင်းတာကတော့ ကားခေါင်မိုးကို လေဝင်လေထွက်ကောင်းအောင် ပြုပြင်ထားတာကြောင့် အလုပ်သမားတွေ လေပြတ်တာမျိုး၊ သတိလစ်တာမျိုး မဖြစ်ခဲ့ပါဘူး။
အလုပ်သမားတွေအားလုံးမှာ ထိုင်းနိုင်ငံမှာ နေထိုင်ခွင့်အတွက် စာရွက်စာတမ်း တစ်ခုမှ မရှိကြဘဲ ထိုင်းစကားလည်း မပြောတတ်ကြပါဘူး။
စကားပြန်ကနေတစ်ဆင့် မေးမြန်းစစ်ဆေးကြည့်တော့ အလုပ်သမားတွေအားလုံးက ထိုင်းနိုင်ငံထဲကို သဘာဝလမ်းကြောင်းတွေကနေတစ်ဆင့် ဝင်ရောက်လာကြတာဖြစ်ပြီး ချွန်ဘူရီပြည်နယ်မှာ အလုပ်လုပ်ဖို့အတွက် လူတစ်ဦးကို ဘတ် ၄၀,၀၀၀ ကနေ ၅၀,၀၀၀ အထိ ပွဲစားခ ပေးခဲ့ရတယ်လို့ ထွက်ဆိုခဲ့ကြပါတယ်။
အခုလို ဖမ်းဆီးခံရပြီးနောက်မှာတော့ သူတို့ရဲ့အစီအစဉ်တွေ ပျက်သွားခဲ့ပါတယ်။
တာဝန်ရှိသူတွေက အလုပ်သမားတွေအားလုံးကို ထောင်ဖာဖွန်ရဲစခန်းက စုံစမ်းစစ်ဆေးရေးမှူးဆီ လွှဲပြောင်းပေးခဲ့ပြီး “ခွင့်ပြုချက်မရှိဘဲ နိုင်ငံထဲကို ဝင်ရောက်လာတဲ့ နိုင်ငံခြားသား” ဆိုတဲ့ စွဲချက်နဲ့ ဥပဒေအရ အရေးယူဆောင်ရွက်သွားမှာ ဖြစ်ပါတယ်။
ဒါ့အပြင် ထွက်ပြေးသွားတဲ့ ကားမောင်းသူကိုလည်း ဖမ်းဆီးအရေးယူနိုင်ဖို့ သက်သေအထောက်အထားတွေ စုဆောင်းနေတယ်လို့ သိရပါတယ်။
Crd- CaoCao
