ထိုင်းနိုင်ငံ၊ ကန်ချနပူရီပြည်နယ်ရှိ အုပ်ချုပ်ရေးနှင့် စစ်ဘက်ဆိုင်ရာ တာဝန်ရှိသူများသည် မြန်မာနိုင်ငံသား တရားမဝင်လုပ်သား ၃၈ ဦးကို တင်ဆောင်လာသည့် ပစ်ကပ်ကားနှစ်စီးကို သည်းထိတ်ရင်ဖို လိုက်လံဖမ်းဆီးမှုတစ်ခု ယနေ့နံနက်စောစောပိုင်းတွင် ပြုလုပ်ခဲ့သည်။

ဩဂုတ်လ ၂၇ ရက် နံနက် ၂:၃၀ နာရီတွင် တာဝန်ရှိသူများသည် စံခလပူရီမြို့မှ ကန်ချနပူရီမြို့ဘက်သို့ ဦးတည်မောင်းနှင်လာသော သံသယရှိ ပစ်ကပ်ကားနှစ်စီးကို ရပ်တန့်စစ်ဆေးရန် အချက်ပြခဲ့ရာ ကားမောင်းသူများက မောင်းပြေးခဲ့သဖြင့် တာဝန်ရှိသူများက အနီးကပ် လိုက်လံဖမ်းဆီးခဲ့သည်။

ကားနှစ်စီးစလုံးသည် လူပြတ်သည့် လမ်းကျဉ်းတစ်ခုထဲသို့ ချိုးကွေ့ဝင်ရောက်သွားပြီး ထောင်းဖာဖွန်မြို့နယ်၊ ထာ့ခနွန်ကျေးရွာ၊ ဘန့်ဟင်လမ်ဒေသရှိ ချုံပုတ်များကြားတွင် ကားများကို စွန့်ပစ်ကာ ကားမောင်းသူများမှာ မှောင်ရိပ်ခို၍ တောထဲသို့ ထွက်ပြေးလွတ်မြောက်သွားခဲ့သည်။

စွန့်ပစ်ထားခဲ့သော အဖြူရောင်နှင့် အနက်ရောင် Isuzu အမျိုးအစား လေးတံခါး ပစ်ကပ်ကားနှစ်စီးကို စစ်ဆေးရာ ကားများအတွင်း ပြွတ်သိပ်ထိုင်နေသည့် မြန်မာလုပ်သားများနှင့် ကားနောက်ခန်းတွင် ဖျင်အုပ်ကာ ပုန်းအောင်းနေသည့် အမျိုးသား ၂၅ ဦးနှင့် အမျိုးသမီး ၁၃ ဦး မြန်မာလုပ်သား စုစုပေါင်း ၃၈ ဦးကို တွေ့ရှိခဲ့ပြီး တာဝန်ရှိသူများက ၎င်းတို့အားလုံးကို ထောင်းဖာဖွန်ရဲစခန်းသို့ ခေါ်ဆောင်စစ်ဆေးခဲ့သည်။

ကနဦး စစ်ဆေးချက်များအရ အဆိုပါလုပ်သားများသည် စံခလပူရီမြို့န် နယ်စပ်ရှိ သဘာဝလမ်းကြောင်းများမှတစ်ဆင့် ထိုင်းနိုင်ငံထဲသို့ တရားမဝင် ဝင်ရောက်လာခြင်းဖြစ်ပြီး ထိုင်းနိုင်ငံတွင်းပိုင်းရှိ ခရိုင်များတွင် အလုပ်လုပ်ရန် ရည်ရွယ်ထားကြောင်း သိရသည်။ ၎င်းတို့သည် ဦးတည်ရာနေရာသို့ ရောက်ရှိပါက တစ်ဦးလျှင် ဘတ် ၈,၀၀၀ မှ ၁၀,၀၀၀ အထိ ပွဲစားခ ပေးဆောင်ရမည်ဖြစ်သော်လည်း ဦးတည်ရာမရောက်မီ ဖမ်းဆီးခံရခြင်းဖြစ်သည်။

စစ်ဆေးမှုများ ပြီးစီးပါက အဆိုပါ မြန်မာလုပ်သား ၃၈ ဦးစလုံးကို “နိုင်ငံခြားသားတစ်ဦးအနေဖြင့် တရားမဝင် ဝင်ရောက်နေထိုင်ခြင်း” ဖြင့် တရားစွဲဆိုသွားမည်ဖြစ်ပြီး၊ ထွက်ပြေးသွားသော ကားမောင်းသူများကို ဖမ်းဝရမ်းထုတ်ကာ ဥပဒေအရ အရေးယူနိုင်ရန် တာဝန်ရှိသူများက အထောက်အထားများ စုဆောင်းလျက်ရှိသည်။

ကန်ချနပူရီပြည်နယ်တွင် မြန်မာနိုင်ငံသားများ တရားမဝင် ဝင်ရောက်မှုများ ဆက်တိုက်ဖမ်းဆီးရမိနေသဖြင့် အုပ်ချုပ်ရေးအဖွဲ့နှင့် သက်ဆိုင်ရာဌာနများသည် နယ်စပ်ဖြတ်ကျော် လူမှောင်ခိုဂိုဏ်းများကို ဖမ်းဆီးရန် စီမံချက်များ ချမှတ်ခဲ့သည်။

ကန်ချနပူရီပြည်နယ်တွင် အရေးပေါ်ကာလသတ်မှတ်ထားပြီး လူကုန်ကူးမှု၊ မူးယစ်ဆေးဝါး၊ လက်နက်မှောင်ခိုနှင့် ငွေကြေးခဝါချမှုလုပ်ငန်းများကို အထူးကြပ်မတ်စစ်ဆေးလျက်ရှိသည်။

တရားမဝင်နည်းလမ်းများဖြင့် ဝင်ရောက်လာသူမှန်သမျှ နေ့စဉ် ဖမ်းဆီးခံနေရပြီး လွတ်မြောက်နိုင်ခြေမရှိသဖြင့် ပွဲစားများ၏ စကားကို မယုံမိကြရန် အထူးသတိပေးအပ်ပါသည်။

Crd- CaoCao