ပဲခူးမြို့တွင် အသက် (၁၄) နှစ်အရွယ် Grade -7 ကျောင်းသားတစ်ဦး ပြန်ပေးဆွဲသတ်ဖြတ်ခံရမှု၌ ကျူးလွန်သူသုံးဦးကို မသေမချင်းကြိုးကွင်းစွပ်သတ်ရန် ပဲခူးခရိုင်တရားရုံးက အမိန့်ချမှတ်ခဲ့ကြောင်း ယင်းတရားရုံးနှင့် နီးစပ်သူများထံမှ သိရသည်။
ပြီးခဲ့သည့် မေလ (၂၁) ရက်နေညနေ (၅) နာရီအချိန်ခန့်က ပဲခူးမြို့၊ မဇင်းရပ်ကွက်၊ မဟာစေတီ (၃) လမ်းနေ အသက် (၁၄) နှစ်အရွယ် Grade -7 ကျောင်းသား မောင်သက်နိုင်မင်းမှာ ပြန်ပေးဆွဲခံခဲ့ရပြီးနောက် သတ်ဖြတ်ခံခဲ့ရခြင်းဖြစ်ကြောင်းနှင့် ၎င်း၏ရုပ်အလောင်အား မေလ (၂၃) ရက်နေ့က ပဲခူးမြို့၊ မဇင်းဆည်အနီး လျှိုစောင်းထဲတွင် ခြေရောလက်ပါ နောက်ပြန်ကြိုးတုတ်ထားပြီး၊ ဦးခေါင်းကိုလည်း ဆာလာအိတ်တစ်လုံးစွပ်ထားလျှက်၊ လည်ပင်းကိုလည်းကြိုးချည်ထားခြင်းခံရကာ မှောက်ခုံအနေအထားဖြင့် တွေ့ရှိခဲ့ရခြင်းဖြစ်သည်။
ထိုဖြစ်စဉ်နှင့် ပတ်သက်ပြီး ကျူးလွန်သူများဖြစ်ကြသည့် အောင်ကျော်ဇော၊ ဟိန်းလတ် (ခ) အောင်ဟိန်း နှင့် နိုင်အောင်ဖြိုး တို့ (၃) ဦးအား ပဲခူးမြို့ရှိ အမှတ် (၂) ရဲစခန်းမှ ရာဇသတ်ကြီးပုဒ်မ ၃၆၄၊ ပုဒ်မ ၃၀၂ (၁) (ခ) တို့နှင့် အမှုဖွင့် စစ်ဆေးခဲ့ပြီးနောက် ပဲခူးခရိုင်တရားရုံးတွင် ရုံးတင်စစ်ဆေးခဲ့ကြောင်း နှင့် (၂) လအကြာတွင် ယခုကဲ့သို့ အမိန့်ချမှတ်ခဲ့ခြင်းဖြစ်ကြောင်း ပဲခူးခရိုင်တရားရုံးနှင့် နီးစပ်သူတစ်ဦးက ပြောကြားသည်။
၎င်းကဆက်လက်ပြီး “Grade – 7 ကျောင်းသား ပြန်ပေးဆွဲခံရပြီး အသတ်ခံခဲ့ရတဲ့ ဖြစ်စဉ်က ကျူးလွန်သူတစ်ဦးဖြစ်တဲ့ နိုင်အောင်ဖြိုးကတော့ ဝမ်းပျက်ဝမ်းလျောရောဂါနဲ့ ပြီးခဲ့တဲ့ ဇွန်လ (၁) ရက်နေ့က ပဲခူးဆေးရုံမှာ သေဆုံးခဲ့ပါတယ်။ အခု ကျန်ရှိတဲ့ ကျူးလွန်သူ (၂) ဦးကို မသေမချင်းကြိုးကွင်းစွပ်သတ်ဖို့ တရားရုံးက အမိန့်ချမှတ်ခဲ့ပါတယ်” ဟု ပြောကြားသည်။
ထိုဖြစ်စဉ်မှာ မောင်သက်နိုင်မင်း သည် ပြီးခဲ့သည့် မေလ (၂၁) ရက် ညနေပိုင်းက နေသူငယ်ချင်းများနှင့် ဘောလုံးကစားနေစဉ် အဆိုပါအိမ်နီးချင်းဖြစ်သူ နိုင်အောင်ဖြိုး ဆိုသူမှ “မင်းတို့ဘောလုံးမကောင်းတော့ဘူး။ ဘောလုံး အကောင်းတစ်လုံး မဟာစေတီ ဘုရားနားက သီဟိုဠ်တောထဲမှာ ငါတွေ့ထားတယ်။ လိုချင်ရင် လိုက်ယူ” ဟုပြောကာ မောင်သက်နိုင်မင်း အား ဆိုင်ကယ်ဖြင့် ခေါ်ဆောင်သွားခဲ့ကြောင်း သိရသည်။
ထို့နောက် နိုင်အောင်ဖြိုး သည် မောင်သက်နိုင်မင်း အား ဘောလုံးသွားယူမည်ဟု လိမ်လည်လှည့်ဖျားကာ မြို့ရှောင်လမ်းအတိုင်း ဆိုင်ကယ်ဖြင့် မဇင်းဆည်အနီး ခေါ် ဆောင်သွားခဲ့ကာ ခဏနေရင် ပြန်လာမယ် စောင့်နေဟုပြောပြီး အသင့်ယူဆောင်လာသည့် ပီနံအိတ်ခွံနှင့် နိုင်လွန်ကြိုးတစ်ချောင်း ပါ မောင်သက်နိုင်မင်း ကိုပေးထားခဲ့ နှင့် သက်ဆိုင်ရာက နိုင်အောင်ဖြိုး ဆိုင်ကယ်ဖြင့် သွားလာခဲ့သည့် လမ်းကြောင်း အတိုင်း CCTV တပ်ဆင်ထားသည့် နေအိမ်နှင့် ဆိုင်များသို့ လိုက်လံ စစ်ဆေးကြည့်ရှုရာ နိုင်အောင်ဖြိုးသည် အခင်းဖြစ်သည့်အချိန်တွင် ညီအစ်ကိုဝမ်းကွဲတော်စပ်သူ မဇင်းတိုးချဲ့ (၂) ရပ်ကွက်တွင် နေထိုင်သော အသက် (၃၂) နှစ်အရွယ် အောင်ကျော်ဇော (ခ)ကျော်ကြီး နှင့် အတူ လက်ဘက်ရည်ဆိုင်ထိုင်ခဲ့ကြောင်း သိရသည်။
နိုင်အောင်ဖြိုး သည် အောင်ကျော်ဇော(ခ)ကျော်ကြီး ပြန်ခေါ်ခဲ့ပြီး၊ မောင်သက်နိုင်မင်းထံမှ ၎င်းပေးခဲ့သည့် နိုင်လွန်ကြိုးနှင့် ပီနံအိတ်ခွံအား ယူ၍ မဇင်းဆည်အနီးတွင် မောင်သက်နိုင်မင်း အား ခြေလက်များ ကြိုးတုပ်ချည်နှောင်၍ လည်ပင်းအား အဆိုပါကြိုးဖြင့် ထပ်မံ ရစ်ပတ်ချည်နှောင်ကာ မျက်နှာကို ပီနံအိတ်စွပ်ခဲ့ကြကြောင်းနှင့် မောင်သက်နိုင်မင်းမှ ရုန်းကန်အော်ဟစ်သဖြင့် လည်ပင်း နှင့် ကျောကုန်းနှင့် ခြေထောက်တို့အား နင်းပြီး ကြိုးအား ပိုမိုတင်းကြပ်အောင် ဆွဲတင်းခဲ့ပြီး ထိုးကြိတ် ကန်ကျောက်ခြင်းများ ပြုလုပ်ခဲ့ရာမှ မောင်သက်နိုင်မင်း မှာ ခေါ်မရတော့ဘဲ သေဆုံးသွားခဲ့သဖြင့် အလောင်းအား အနီးရှိချုံတောထဲတွင် ပစ်ထားခဲ့ပြီး ချုံတောအတွင်းရှိနေသည့် ကာကီရောင် မိုးကာဖြင့် ဖုံးအုပ်ထားခဲ့ကြကြောင်းကို ကျူးလွန်သူများက ဝန်ခံထွက်ဆိုထားကြောင်း သိရသည်။
