စစ်ကောင်စီသည် ၎င်းတို့ကျင်းပမည့် ရွေးကောက်ပွဲများကို နှောင့်ယှက်ဟန့်တားပြီး လူသေဆုံးမှုဖြစ်ပွားပါက အမြင့်ဆုံးပြစ်ဒဏ်အဖြစ် သေဒဏ်အထိ ချမှတ်နိုင်သည့် ဥပဒေတစ်ရပ်ကို ဇူလိုင်လ ၂၉ ရက်နေ့တွင် ပြဋ္ဌာန်းလိုက်ကြောင်း ကြေညာခဲ့သည်။
အဆိုပါဥပဒေကို “ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ” ဟု အမည်ပေးထားပြီး ပြစ်မှုကျူးလွန်ကြောင်း ထင်ရှားပါက ထောင်ဒဏ် အနည်းဆုံး ၁၀ နှစ်မှ တစ်သက်တစ်ကျွန်းအထိ ကျခံရနိုင်ကာ လူသေဆုံးမှုပါ ဖြစ်ပွားခဲ့လျှင် သေဒဏ်ချမှတ်နိုင်ကြောင်း တိကျစွာ ထည့်သွင်းပြဋ္ဌာန်းထားသည်။
၂၀၂၁ ခုနှစ် ဖေဖော်ဝါရီလတွင် တပ်မတော်က နိုင်ငံတော်အာဏာကို သိမ်းယူခဲ့ပြီးနောက် စစ်ကောင်စီသည် ၂၀၂၀ ရွေးကောက်ပွဲရလဒ်ကို ပယ်ဖျက်ခဲ့သည်။
လက်ရှိတွင် နိုင်ငံတစ်ဝန်း တည်ငြိမ်မှုမရှိသေးသော်လည်း စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၅ ခုနှစ်၊ ဒီဇင်ဘာလနှင့် ၂၀၂၆ ခုနှစ်၊ ဇန်နဝါရီလများတွင် ရွေးကောက်ပွဲအသစ်တစ်ခု ကျင်းပသွားမည်ဟု ထပ်တလဲလဲ ပြောဆိုထားသည်။
ယခုဥပဒေသည် စစ်ကောင်စီက ကျင်းပရန် ပြင်ဆင်နေသည့် ရွေးကောက်ပွဲများအတွက် လုံခြုံရေးဆိုင်ရာ တင်းကျပ်မှုတစ်ရပ်အဖြစ် ရှုမြင်နိုင်ပါသည်။
စစ်ကောင်စီ၏ ရွေးကောက်ပွဲကျင်းပမည့် အစီအစဉ်ကို တိုင်းရင်းသားလက်နက်ကိုင်အဖွဲ့အစည်းအချို့၊ အမျိုးသားညီညွတ်ရေးအစိုးရ (NUG)၊ ပြည်သူ့ကာကွယ်ရေးတပ်ဖွဲ့ (PDF) နှင့် အခြားနွေဦးတော်လှန်ရေး အင်အားစုများက ပြင်းထန်စွာ ဆန့်ကျင်ကန့်ကွက်ထားသည်။
၎င်းတို့က စစ်ကောင်စီ၏ ရွေးကောက်ပွဲသည် တရားမဝင်ဘဲ စစ်အာဏာရှင်စနစ်ကို တရားဝင်ဖြစ်စေရန် ကြိုးပမ်းမှုတစ်ခုသာဖြစ်သည်ဟု သတ်မှတ်ကာ ရွေးကောက်ပွဲကို နည်းလမ်းပေါင်းစုံဖြင့် ဟန့်တားဖျက်ဆီးသွားမည်ဖြစ်ကြောင်း အတိအလင်း ထုတ်ပြန်ကြေညာထားသည်။
ယခုကဲ့သို့ ပြင်းထန်သည့် ဥပဒေပြဋ္ဌာန်းမှုသည် လာမည့်ရွေးကောက်ပွဲကာလများတွင် နိုင်ငံရေးတင်းမာမှုများနှင့် ပဋိပက္ခများကို ပိုမိုမြင့်တက်လာစေနိုင်သည်ဟု နိုင်ငံရေးလေ့လာသုံးသပ်သူများက ဆိုသည်။
