ရန်ကုန်တိုင်းဒေသကြီး၊ အင်းစိန်မြို့နယ်တွင် တန်ဖိုးငွေကျပ် ၄၈ ဒသမ ၄ ဘီလီယံကျော်ရှိ စိတ်ပြောင်းဆေးဝါးများ သိုလှောင်ထားသည့် နေရာကို ဇူလိုင်လ ၁၂ ရက်နေ့က ဝင်ရောက်ဖမ်းဆီးခဲ့ပြီး၊ မလေးရှားနိုင်ငံသို့ ပင်လယ်ရေကြောင်းမှတစ်ဆင့် သယ်ဆောင်ရောင်းဝယ်သည့် မူးယစ်မှောင်ခိုဂိုဏ်းကြီးတစ်ခုလုံးကို ဖော်ထုတ်ဖမ်းဆီးနိုင်ခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်သည်။
အင်းစိန်မြို့နယ်၊ ကြို့ကုန်းအရှေ့ရပ်ကွက်ရှိ နေအိမ်တစ်လုံးကို ပူးပေါင်းအဖွဲ့က သတင်းအရ ဝင်ရောက်ရှာဖွေရာ ဇော်ဇော်လွင်အား အိုက်စ်(မက်သ်အဖက်တမင်း) ၁,၈၇၅ ကီလို (တန်ဖိုးငွေကျပ် ၄၆.၈ ဘီလီယံခန့်)၊ စိတ်ကြွဆေးပြား ၁၆ သိန်း (တန်ဖိုးငွေကျပ် ၁.၆ ဘီလီယံခန့်) နှင့် မော်တော်ယာဉ်တစ်စီးတို့နှင့်အတူ ပထမဆုံး ဖမ်းဆီးရမိခဲ့သည်။
ကွင်းဆက်ဖော်ထုတ်မှုများအရ မူးယစ်ဆေးဝါး လွှဲပြောင်းပေးခဲ့သူ၊ သယ်ဆောင်သူ၊ ပင်လယ်ရေကြောင်းမှတစ်ဆင့် ပို့ဆောင်သူများနှင့် စက်လှေပိုင်ရှင်များဖြစ်ကြသည့် နေမျိုးကျော်၊ ကြည်ဖြူ(ခ)ကျော်ဝင်းဌေး၊ ဇော်မင်းနိုင်၊ စိုးလင်းပိုင်(ခ)လင်းလင်း၊ ရဲထွန်း(ခ)ပဲ့နင်း၊ သိန်းသန်းဌေး(ခ)ဇော်ဇော်အောင်၊ ကျော်စွာမင်း(ခ)မင်းမင်း နှင့် မျိုးထွန်း(ခ)ကိုထွန်း တို့ကို ရန်ကုန်၊ ပဲခူး၊ ပြည် နှင့် ပုသိမ်ကြီးမြို့နယ်များတွင် ရက်ဆက် ဖမ်းဆီးရမိခဲ့သည်။ ဖမ်းဆီးရမိသူများထဲတွင် မူးယစ်အမှုဟောင်းဖြင့် အလိုရှိနေသည့် တရားခံပြေးများလည်း ပါဝင်သည်။
စစ်ဆေးချက်များအရ ဘောစိ(ခ)ပန်းသီး(ခ)အုံနာ မှ နေအိမ်ငှားရမ်းကာ မူးယစ်ဆေးများ သိမ်းဆည်းခိုင်းခြင်း။ ကိုစိုင်းနှင့် မောင်မောင်တို့က မလေးရှားသို့ သယ်ဆောင်ရောင်းဝယ်ခြင်း။ ကြည်ဖြူ(ခ)ကျော်ဝင်းဌေးနှင့် အောင်ဖြိုးတို့က ရန်ကုန်မှ ပင်လယ်ဝ၊ ထိုမှတစ်ဆင့် မလေးရှားသို့ သယ်ယူရေးကို စီမံခန့်ခွဲခြင်း။သိန်းသန်းဌေးက ကုန်းလမ်းမှ ပင်လယ်ဝသို့လည်းကောင်း၊ ရဲထွန်းက ပိုင်ဆိုင်သည့်စက်လှေဖြင့် ပင်လယ်ဝမှ မလေးရှားသို့လည်းကောင်း တာဝန်ယူ သယ်ဆောင်ခြင်း တို့ကို အသီသီးတာဝန်ခွဲဝေ ဆောင်ရွက်ခဲ့ကြောင်း သိရသည်။
အဆိုပါ မူးယစ်မှောင်ခိုဂိုဏ်းသည် ပင်လယ်ရေကြောင်းကိုအသုံးပြု၍ ပြည်ပသို့ မူးယစ်ဆေးဝါးများ အကြိမ်ကြိမ် တင်ပို့ရောင်းချခဲ့ကြောင်း စစ်ဆေးတွေ့ရှိရသဖြင့် ဖမ်းဆီးရမိသော သက်သေခံပစ္စည်းများအားလုံးကို မူးယစ်ဆေးဝါးဥပဒေဖြင့် အရေးယူထားပြီး၊ ၎င်းတို့၏ ပိုင်ဆိုင်မှုများကို ငွေကြေးခဝါချမှုတိုက်ဖျက်ရေးဥပဒေဖြင့် ပြည်သူ့ဘဏ္ဍာအဖြစ် သိမ်းဆည်းနိုင်ရန် ဆက်လက်ဆောင်ရွက်လျက်ရှိသည်။
Crd- သတင်းစဥ်
