ယနေ့ (ဇူလိုင်လ ၂၈ ရက်) နံနက်ပိုင်းတွင် ထိုင်းနိုင်ငံ၊ ဘန်ကောက်မြို့၊ ကျတုချတ်(Chatuchak) ခရိုင်ရှိ နာမည်ကျော် အော်တော်ကော်ဈေးအတွင်း၌ သေနတ်သမားတစ်ဦးက ဝင်ရောက်ပစ်ခတ်ခဲ့မှုကြောင့် တရားခံအပါအဝင် စုစုပေါင်း ၆ ဦး သေဆုံးပြီး ၂ ဦး ဒဏ်ရာရရှိခဲ့သည့် ထိတ်လန့်ဖွယ်ရာ ဖြစ်ရပ်တစ်ခု ဖြစ်ပွားခဲ့သည်။
ကနဦး သတင်းများအရ ပစ်ခတ်မှုကျူးလွန်သူမှာ အဆိုပါဈေးတွင် ဆိုင်ခန်းဖွင့်လှစ်ရောင်းချနေသူ အသက် ၆၁ နှစ်အရွယ် အမျိုးသားတစ်ဦးဖြစ်ကြောင်း သိရသည်။
၎င်းသည် ဈေး၏ လုံခြုံရေးဝန်ထမ်း ၄ ဦးနှင့် အခြားဈေးသည် ၂ ဦးကို အနီးကပ် ပစ်ခတ်ခဲ့ပြီးနောက် အခင်းဖြစ်ပွားရာနေရာ၌ပင် မိမိကိုယ်ကို အဆုံးစီရင်သွားခဲ့သည်။
ရဲတပ်ဖွဲ့ဝင်များသည် ဖြစ်ပွားရာနေရာသို့ ချက်ချင်းရောက်ရှိလာပြီး နေရာကို ထိန်းချုပ်ကာ အသေးစိတ် စုံစမ်းစစ်ဆေးမှုများ ပြုလုပ်နေပါသည်။ ကနဦး စုံစမ်းစစ်ဆေးချက်များအရ အဆိုပါ ပစ်ခတ်မှုသည် ပုဂ္ဂိုလ်ရေးဆိုင်ရာ ပဋိပက္ခများ မှ အစပြုခြင်းဖြစ်နိုင်သည်ဟု ရဲတပ်ဖွဲ့က အဓိကထား စစ်ဆေးနေသည်။
အခြားသတင်းရင်းမြစ်များ၏ ဖော်ပြချက်အရ၊ တရားခံသည် ဈေးစီမံခန့်ခွဲရေး သို့မဟုတ် လုံခြုံရေးဝန်ထမ်းများနှင့် ဆိုင်ခန်းနေရာကိစ္စ၊ ဈေးစည်းကမ်းများနှင့် ပတ်သက်၍ အချိန်ကြာမြင့်စွာ အငြင်းပွားမှုများ ရှိခဲ့နိုင်ကြောင်း သုံးသပ်နေကြသည်။
အထူးသဖြင့် အော်တော်ကော်ဈေးသည် အရည်အသွေးမြင့် ကုန်စည်များရောင်းချရာ နေရာဖြစ်ပြီး ငှားရမ်းခနှင့် စည်းမျဉ်းများ တင်းကျပ်လေ့ရှိရာ ထိုကဲ့သို့သော ဖိအားများကြောင့် ဖြစ်နိုင်သည်ဟုလည်း ယူဆနေကြသည်။
မည်သို့ပင်ဖြစ်စေ၊ အမှု၏ အကြောင်းရင်းမှန်ကို တိကျစွာ ဖော်ထုတ်နိုင်ရန်အတွက် သက်သေအထောက်အထားများ စုဆောင်းခြင်း၊ မျက်မြင်သက်သေများနှင့် သက်ဆိုင်သူများကို ကျယ်ကျယ်ပြန့်ပြန့် စစ်ဆေးမေးမြန်းခြင်းများ ဆက်လက်လုပ်ဆောင်သွားမည်ဖြစ်ကြောင်း အာဏာပိုင်များက ပြောကြားသည်။
