ထိုင်းသတင်းတွေရဲ့အပြောအရဆိုရင် ထိုင်းစစ်တပ်က ဒီနေ့ နေ့လယ် ၁၁ နာရီခွဲလောက်မှာ ကမ္ဘောဒီးယားရဲ့ စစ်စခန်းတစ်ခုကို F-16 တိုက်လေယာဉ်တွေနဲ့ ဗုံးကြဲတိုက်ခိုက်ခဲ့တယ်လို့ ဆိုပါတယ်။

ဒီမနက်ပိုင်းမှာလည်း ထိုင်းနဲ့ ကမ္ဘောဒီးယား နယ်စပ်မှာ တပ်တွေအချင်းချင်း အပြန်အလှန် ပစ်ခတ်မှုတွေ ဖြစ်ခဲ့သေးတယ်လို့ သိရပါတယ်။

ထိုင်းစစ်တပ်ကတော့ ကမ္ဘောဒီးယားဘက်က အငြင်းပွားနေတဲ့ တာမိုးအန်ထွမ် ဘုရားကျောင်းနားမှာ အရင်စပစ်တာလို့ ထုတ်ပြန်ထားပါတယ်။

ကမ္ဘောဒီးယားဘက်ကလည်း အဲဒီနေရာကို လက်နက်ကြီးတွေနဲ့ စစ်သားတွေမပို့ခင်မှာ ထောက်လှမ်းရေးဒရုန်းနဲ့ အရင်ကြည့်ခဲ့တယ်လို့ ပြောကြပါတယ်။

Khaosod သတင်းမှာတော့ ကမ္ဘောဒီးယားတပ်တွေက မူပါစခန်းနဲ့ ဘုရားကျောင်းအရှေ့ဘက် မီတာ ၂၀၀ လောက်မှာ စပစ်လို့ ထိုင်းတပ်က ပြန်ပစ်ခဲ့ရတာလို့ ရေးထားပါတယ်။

ကမ္ဘောဒီးယား ကာကွယ်ရေးဝန်ကြီးဌာနကလည်း သူတို့ဘက်က အရင်တိုက်ခိုက်ခံရလို့ ပြန်တုံ့ပြန်ခဲ့တာပါလို့ ထုတ်ပြန်ထားပါတယ်။

ဒီကိစ္စတွေ မဖြစ်ခင် မနေ့က (ဇူလိုင် ၂၃) မှာလည်း အငြင်းပွားနေတဲ့ နယ်မြေထဲမှာ မြေမြှုပ်မိုင်းတစ်လုံး ပေါက်ကွဲပြီး ထိုင်းတပ်ကြပ်ကြီးတစ်ယောက် ညာဘက်ခြေထောက်မှာ ဒဏ်ရာအပြင်းအထန် ရသွားခဲ့ပါတယ်။

အဲဒီဖြစ်ရပ်ကြောင့် ထိုင်းအစိုးရက ကမ္ဘောဒီးယားမှာရှိတဲ့ သူတို့သံအမတ်ကို ပြန်ခေါ်လိုက်ပြီး ဘန်ကောက်က ကမ္ဘောဒီးယားသံအမတ်ကိုလည်း ပြန်လွှတ်လိုက်ပါတယ်။

ထိုင်းဒုဝန်ကြီးချုပ်က “ကျွန်တော်တို့ အခြေအနေကို သုံးသပ်ပြီးပြီ၊ သံတမန်ဆက်ဆံရေးကို လျှော့ချတော့မယ်” လို့ ပြောပါတယ်။

နယ်စပ်ဂိတ်တွေကိုလည်း အကုန်ပိတ်ထားပြီး လူအဝင်အထွက် လုံးဝမရှိစေရဘူးလို့ အမိန့်ထုတ်ထားပါတယ်။

နောက်ဆက်တွဲသတင်းတွေအရ ကမ္ဘောဒီးယားဘက်က ဒုံးကျည်နဲ့ ပစ်လိုက်လို့ ထိုင်းပြည်သူ ၂ ယောက် သေဆုံးပြီး အိမ်တွေပါ ပျက်စီးသွားတယ်လို့ ထိုင်းအာဏာပိုင်တွေက သတင်းထုတ်ပြန်ထားပါတယ်။

ဒီနေ့မနက် ၈ နာရီကျော်လောက်မှာ နှစ်ဘက်သားတွေ ပစ်ခတ်မှုတွေ စဖြစ်ကြတာပါ။ အဲဒီမှာ ထိုင်းဘက်ကတော့ ကမ္ဘောဒီးယားက အရင်စပစ်တာ၊ သူတို့က ပြန်ပစ်ရတာပါလို့ ပြောတယ်။ ကမ္ဘောဒီးယားဘက်ကလည်း မဟုတ်ဘူး၊ ထိုင်းက အရင်စတာ၊ ဒါကြောင့် ပြန်ပစ်တာလို့ တစ်ယောက်နဲ့တစ်ယောက် အပြန်အလှန် အပြစ်တင်နေကြတယ်။

ထိုင်းတပ်မတော်က ပြောတာကတော့၊ ကမ္ဘောဒီးယားစစ်သားတွေက ဆူရင်ခရိုင်ထဲက သူတို့ရဲ့ စစ်စခန်းတစ်ခုကိုရော၊ မြို့ထဲကိုပါ ဒုံးကျည်တွေနဲ့ ပစ်တယ်လို့ ဆိုပါတယ်။

ဒီနေ့မနက်ပိုင်းမှာ ဆူရင်ခရိုင်က Ta Muen Thom ဘုရားကျောင်းအပျက်နားမှာ ကမ္ဘောဒီးယား ဒရုန်းတစ်စီး ပျံဝဲနေခဲ့တယ်တဲ့။

အဲဒီနောက်မှာ ကမ္ဘောဒီးယားစစ်သား ၆ ယောက်လောက်က RPG လို လက်နက်ကြီးတွေပါ အစုံအလင်ကိုင်ပြီး ထိုင်းစစ်စခန်းရှေ့က သံဆူးကြိုးစည်းရိုးနားထိ ကပ်လာပြီး အော်ဟစ်ဆူပူကြသေးတယ်လို့လည်း သိရတယ်။

မနက် ၈ နာရီ မိနစ် ၂၀ မှာတော့ ကမ္ဘောဒီးယားစစ်တပ်က တမူးအမ်းဘုရားကျောင်းနားက ထိုင်းတပ်ရဲ့ မူးပါစစ်စခန်းကို လက်နက်ငယ်၊ လက်နက်ကြီးတွေနဲ့ ဝင်ပစ်ခဲ့လို့ ထိုင်းစစ်သားတစ်ယောက် ဒဏ်ရာရသွားတယ်လို့လည်း ကြားရပါတယ်။