ကရင်ပြည်နယ်၊ လှိုင်းဘွဲမြို့နယ်၊ မြိုင်ကြီးငူအထူးဒေသ၌ ယမန်နေ့ (ဇူလိုင် ၂၇ ရက်) မနက်ပိုင်းက ငြိမ်းချမ်းရေးဆုတောင်းပွဲတစ်ရပ် ကျင်းပခဲ့ပြီး ကရင်လက်နက်ကိုင်အဖွဲ့ ၄ ဖွဲ့မှ ထိပ်ပိုင်းခေါင်းဆောင်များ တက်ရောက်ခဲ့သည်။
အဆိုပါ ဆုတောင်းပွဲကို ကရင်လက်နက်ကိုင်အဖွဲ့လေးဖွဲ့၏ နာယကဖြစ်သူ မဲဆမိတ်ဆရာတော်က “ကရင်ပြည်နယ် ငြိမ်းချမ်းရေးဆုတောင်းပွဲ” အမည်ဖြင့် စီစဉ်ဖိတ်ကြားခဲ့ခြင်းဖြစ်ပြီး ရေရှည်တည်တံ့ခိုင်မြဲသည့် ငြိမ်းချမ်းရေး ရရှိရန် ရည်ရွယ်ကြောင်း ဆရာတော်၏ ဖိတ်ကြားလွှာတွင် ဖော်ပြထားသည်။
တက်ရောက်သူများတွင် ကရင်အမျိုးသားအစည်းအရုံး (KNU) လက်အောက်ခံ ကရင်အမျိုးသားလွတ်မြောက်ရေးတပ်မတော် (KNLA) ၏ စစ်ဦးစီးချုပ် ဗိုလ်ချုပ်ကြီးစောဂျော်နီ၊ KNU ဖားအံခရိုင်ဥက္ကဋ္ဌ ပဒိုစောအောင်မော်အေးနှင့် KNLA တပ်မဟာ(၇) တပ်မဟာမှူး ဗိုလ်မှူးချုပ်စောဒီးကွယ်တို့ တက်ရောက်ခဲ့ကြသည်။
ထို့အတူ ကရင်နယ်ခြားစောင့်တပ် (BGF) ဘက်မှ ဥက္ကဋ္ဌ ဗိုလ်ချုပ်ထွန်းလှိုင်၊ အထွေထွေအတွင်းရေးမှူး ဗိုလ်ချုပ်စောချစ်သူနှင့် အခြားထိပ်ပိုင်းခေါင်းဆောင်များ၊ ဒီမိုကရေစီအကျိုးပြုကရင်တပ်မတော် (DKBA) နှင့် ကရင်ငြိမ်းချမ်းရေးကောင်စီ (KPC/KNLA-PC) တို့မှ တာဝန်ရှိသူများ၊ ရဟန်းသံဃာများ၊ ပြည်သူလူထုနှင့် ကရင်နိုင်ငံရေးပါတီဝင်များလည်း တက်ရောက်ခဲ့ကြသည်။
ပြီးခဲ့သည့် ဇူလိုင် ၂၀ ရက်က မြိုင်ကြီးငူဒေသ၌ ကျင်းပခဲ့သော ငြိမ်းချမ်းရေး၊ ဒေသတည်ငြိမ်ရေးနှင့် စည်းလုံးညီညွတ်ရေး တွေ့ဆုံပွဲတွင် BGF မှ ကရင်အမျိုးသားတပ်မတော် (KNA) အဖြစ် ပြောင်းလဲဖွဲ့စည်းရန် တင်ပြဆွေးနွေးခဲ့ပြီးနောက် ယခုငြိမ်းချမ်းရေးဆုတောင်းပွဲကို ဆက်လက်ကျင်းပရန် ဆုံးဖြတ်ခဲ့ခြင်း ဖြစ်သည်။
ပြီးခဲ့သည့် ဇူလိုင်လ ၆ ရက်နေ့က ဘုရားသုံးဆူမြို့တွင် ပြုလုပ်ရန်စီစဥ်ထားပြီး ပွဲပျက်သွားသည့် ငြိမ်းချမ်းရေးဆုတောင်းပွဲကို မြိုင်ကြီးငူအထူးဒေသ၌ နေရာပြောင်းလဲ ပြုလုပ်ကျင်းပခဲ့ခြင်းဖြစ်ကြောင်း ကျင်းပရေးကော်မတီထံမှ သိရသည်။
Photo-မြိုင်ကြီးငူအထူးဒေသ ငြိမ်းချမ်းရေးဆုတောင်းပွဲ အခမ်းအနား (Guru Gyi)
