ကရင်အမျိုးသားအစည်းအရုံး (KNU) နှင့် ၎င်းတို့ထံမှ ခွဲထွက်သွားသော ကော်သူလေးတပ်မတော် (KTLA) တို့အကြား တင်းမာမှုများ မြင့်တက်နေချိန်တွင် အဆိုပါပြဿနာများအတွင်း ပြည်သူ့ကာကွယ်ရေးတပ်မတော် (PDF) အပါအဝင် နွေဦးတော်လှန်ရေး အင်အားစုများအနေဖြင့် ဝင်ရောက်မစွက်ဖက်ကြရန် KTLA ဘက်က သတိပေးလိုက်သည်။
ဇူလိုင်လ ၁၅ ရက်နေ့က KTLA ၏ ထားဝယ်ခရိုင်အခြေစိုက် ဆာကဆောတပ်မ၊ တပ်ရင်း ၃ မှ ဒုတပ်ရင်းမှူး စောဒါးဂေက ၎င်း၏ လူမှုကွန်ရက်စာမျက်နှာမှတဆင့် “ကျတော်တို့ ကရင်အချင်းချင်း ဖြစ်နေတာကို ကရင်အချင်းချင်းလုပ်ပါမယ်၊ ပါဝင်ပူးပေါင်းပြီး လိုက်လာမယ်ဆိုရင်… PDF များသေသွားမယ်ဆိုရင် ကျတော်တို့အနေနဲ့ အာမ မခံဘူး၊ အပြစ်မဆိုပါနဲ့” ဟု တော်လှန်ရေးမဟာမိတ်များအား ပြတ်သားစွာ သတိပေးခဲ့သည်။
ဤသတိပေးချက်သည် KNU နှင့် KTLA အကြား ဖြစ်ပွားနေသော ပဋိပက္ခသည် လက်နက်ကိုင်ပဋိပက္ခအဆင့်သို့ ရောက်ရှိလာနေပြီး အခြားအဖွဲ့များ မလိုလားအပ်ဘဲ ပါဝင်ပတ်သက်လာမည်ကို စိုးရိမ်မှုများ ဖြစ်ပေါ်စေသည်။
ယခုဖြစ်ပွားနေသော ပြဿနာ၏ အဓိကဇာစ်မြစ်မှာ ၂၀၂၂ ခုနှစ်တွင် KNU လက်အောက်ခံ ကရင်အမျိုးသားကာကွယ်ရေးတပ်မတော် (KNDO) ၏ စစ်ဦးစီးချုပ်ဟောင်း ဗိုလ်မှူးချုပ်စောနယ်ဒါးမြကို အစုလိုက်အပြုံလိုက် သတ်ဖြတ်မှုတစ်ခုနှင့် ပတ်သက်ပြီး KNU က ရာထူးမှ ထုတ်ပယ်ခဲ့ခြင်းမှ စတင်ခဲ့သည်။
ထိုနောက်ပိုင်းတွင် စောနယ်ဒါးမြက သူ၏နောက်လိုက်များနှင့်အတူ ကော်သူလေးတပ်မတော် (KTLA) ကို သီးခြားဖွဲ့စည်းခဲ့ပြီး KNU တပ်မဟာ ၄ (မြိတ်-ထားဝယ်) နှင့် တပ်မဟာ ၆ နယ်မြေများတွင် အဓိကလှုပ်ရှားခဲ့သည်။
KTLA ၏ လှုပ်ရှားမှုများသည် KNU ၏ အုပ်ချုပ်ရေးယန္တရားကို နှောင့်ယှက်ခြင်း၊ မဟာမိတ်တပ်များကို ခြုံခိုတိုက်ခိုက်ခြင်းများ ပြုလုပ်သည်ဟု KNU ဘက်က စွပ်စွဲထားသည်။
KNU တပ်မဟာ ၄ အတွင်းရေးမှူး ပဒိုစောအယ်နားက “သူတို့အဖွဲ့ကို တော်လှန်ရေးအဖွဲ့အစည်းတစ်ခုလို လက်ခံဖို့ခက်တယ်၊ စစ်ကောင်စီရဲ့ အထောက်အကူပြုနေတဲ့ အဖွဲ့အစည်းမျိုး အစွန်းရောက်နေတယ်” ဟု KTLA ၏ လုပ်ရပ်များအပေါ် ပြင်းထန်စွာ ဝေဖန်ခဲ့သည်။
လက်ရှိဖြစ်ပွားခဲ့သော ဥကရစ်ထစခန်းသိမ်းတိုက်ပွဲတွင် ရှေ့တန်းရဲဘော်များအတွက် ထမင်းချက်ပေးသည့်နေရာကို လာရောက်နှောင့်ယှက်ခဲ့သည်ဆိုသော စွပ်စွဲချက်ဖြင့် KTLA တပ်ဖွဲ့ဝင် ၂၀ ကျော်ကို KNLA က ထိန်းသိမ်းခဲ့သည့် ဖြစ်စဉ်ကြောင့် နှစ်ဖက်တင်းမာမှုမှာ ပိုမိုအရှိန်မြင့်လာခဲ့သည်။
ဤအခြေအနေတွင် တနင်္သာရီတိုင်းအတွင်းရှိ PDF တပ်ဖွဲ့ခေါင်းဆောင်တစ်ဦးကမူ “သူတို့လူမျိုးအချင်းချင်းဖြစ်တဲ့ကိစ္စကို ကျတော်တို့ ဝင်ပါလို့ မရဘူးလေ… ဒီအချိန်မှာ ကိုယ့်အချင်းချင်း ရန်ဖြစ်မဲ့အစား စည်းစည်းလုံးလုံးနဲ့ သွားစေချင်တယ်။ နွားကွဲရင် ကျားဆွဲခံရမှာပေါ့ဗျာ” ဟု မှတ်ချက်ပေးခဲ့သည်။
၎င်း၏စကားသည် စစ်ကောင်စီကို တော်လှန်နေချိန်တွင် တော်လှန်ရေးအင်အားစုများအကြား ပြည်တွင်းပဋိပက္ခဖြစ်ပွားပါက အဓိကရန်သူကို အကျိုးပြုသကဲ့သို့ ဖြစ်မည်ကို စိုးရိမ်နေကြောင်း ထင်ဟပ်စေသည်။
ထားဝယ်နိုင်ငံရေးအင်အားစုမှ တာဝန်ရှိသူတစ်ဦးကမူ နှစ်ဖက်ခေါင်းဆောင်များအနေဖြင့် မျက်နှာချင်းဆိုင်တွေ့ဆုံ၍ ညှိနှိုင်းအဖြေရှာသင့်ကြောင်း တိုက်တွန်းထားသည်။
လက်ရှိတွင် ထားဝယ်ခရိုင်၌ လှုပ်ရှားနေသော KTLA တပ်ဖွဲ့များအနက် အချို့မှာ KNU နှင့် အဆင်ပြေနေဆဲဖြစ်ရာ ညှိနှိုင်းမှုအတွက် အခွင့်အလမ်းများ ရှိနေနိုင်သေးသည်။
KNU ဘက်ကလည်း KTLA အနေဖြင့် စစ်အာဏာရှင်ကို အမှန်တကယ်တိုက်ခိုက်လိုပါက ပူးပေါင်းဆောင်ရွက်နိုင်မည့် နည်းလမ်းများ အမြဲရှိကြောင်း ပြောဆိုထားရာ နှစ်ဖက်အကြား တူညီသောရည်မှန်းချက်ဖြစ်သည့် စစ်အာဏာရှင်စနစ်တိုက်ဖျက်ရေးကို ရှေ့ရှုပြီး အလျှော့အတင်းပြုလုပ်ကာ စားပွဲဝိုင်းတွင် အဖြေရှာနိုင်မှသာ တော်လှန်ရေးအတွက် အပေါင်းလက္ခဏာဆောင်မည် ဖြစ်သည်။
KNU နှင့် KTLA အကြား ဖြစ်ပွားနေသော ပဋိပက္ခသည် ကရင်လူမျိုးများအကြား ပြည်တွင်းရေးသာမက၊ စစ်အာဏာရှင်ကို တော်လှန်နေသည့် မဟာမိတ်အင်အားစုများ အားလုံး၏ စည်းလုံးညီညွတ်မှုကိုပါ စိန်ခေါ်လျက်ရှိသည်။
ဤပြဿနာကို ဖြေရှင်းနိုင်ခြင်း ရှိ၊ မရှိသည် တနင်္သာရီဒေသတွင်း တော်လှန်ရေး၏ အရှိန်အဟုန်နှင့် အနာဂတ်အပေါ် တိုက်ရိုက်သက်ရောက်မှု ရှိနေမည်ဖြစ်သည်။
