နိုင်ငံအနှံ့ တိုက်ပွဲများတွင် ဆက်တိုက်အရေးနိမ့်နေသော စစ်ကောင်စီတပ်ဖွဲ့ဝင်များအကြား စိတ်ဓာတ်ရေးရာ အလွန်အမင်းကျဆင်းနေပြီး အသက်ဘေးမှလွတ်မြောက်ရန်အတွက် နီးစပ်ရာ တိုင်းရင်းသားလက်နက်ကိုင်တော်လှန်ရေးအဖွဲ့ (EAO) များထံ ဘက်ပြောင်းခိုလှုံမှုများ ဆက်တိုက်ပြုလုပ်လာကြသည်။
ထိုသို့ဖြစ်ပေါ်နေသည့် နောက်ခံအခြေအနေတွင် တနင်္သာရီတိုင်း၊ လောင်းလုံးမြို့နယ်ရှိ နတ်အိမ်ထောင်အခြေစိုက် စစ်ကောင်စီတပ်မှ တပ်ခွဲမှူး ဗိုလ်ကြီး ဇော်ဇော်အောင်သည် ကရင်အမျိုးသားလွတ်မြောက်ရေးတပ်မတော် (KNLA) ထံသို့ ထပ်မံဘက်ပြောင်းခိုလှုံလာခဲ့ကြောင်း KNU တာဝန်ရှိသူများက အတည်ပြုပြောကြားသည်။
၎င်းမတိုင်မီ ရက်ပိုင်းအတွင်က KNLA ထံ ခိုလှုံဝင်ရောက်ခဲ့သော ဗိုလ်ကြီးမျိုးဆွေဦး၏ ချိတ်ဆက်ပေးမှုဖြင့် ဗိုလ်ကြီး ဇော်ဇော်အောင်သည် ဇူလိုင်လ ၁၃ ရက်နေ့တွင် KNLA တပ်မဟာ-၄၊ တပ်ရင်း ၁၀ ထံသို့ လာရောက်ပူးပေါင်းခဲ့ခြင်းဖြစ်ကြောင်း KNU မြိတ်-ထားဝယ်ခရိုင် အတွင်းရေးမှူး ပဒိုစောအယ်နားက မီဒီယာများသို့ ပြောသည်။
“သူက တစ်ယောက်တည်းဝင်လာတာပါ။ တပ်ခွဲမှူးအဆင့်ဖြစ်ပြီး နတ်အိမ်တောင်စခန်းမှာ လှုပ်ရှားတပ်ခွဲရဲ့ တပ်ခွဲမှူးပါ။ လက်နက်တော့ ပါမလာဘူး။ လောလောဆယ် KNLA တပ်မဟာ ၄၊ တပ်ရင်း ၁၀ တပ်ရင်းမှူးနဲ့ အတူရှိနေပါတယ်” ဟု ပဒိုစောအယ်နားက ဆိုသည်။
ဘက်ပြောင်းခိုလှုံလာသူ ဗိုလ်ကြီးဇော်ဇော်အောင်သည် စစ်ကောင်စီ၏ လက်ရှိလုပ်ဆောင်နေမှုများကို လက်မခံနိုင်တော့သည့်အတွက် ယခုကဲ့သို့ ပြည်သူ့ဘက်သို့ ကူးပြောင်းလာခြင်းဖြစ်ကြောင်း သိရသည်။
၎င်းသည် စစ်တက္ကသိုလ် (DSA) အပတ်စဉ် ၅၂ ဆင်းတစ်ဦးဖြစ်ပြီး ခလရ-၁၀၄ လက်အောက်ခံ လောင်းလုံးမြို့နယ်၊ နတ်အိမ်တောင်နှင့် အမြောက်ကုန်း လှုပ်ရှားတပ်ခွဲတွင် တာဝန်ကျနေသူဖြစ်သည်။
KNU ဘက်ကလည်း ဗိုလ်ကြီးဇော်ဇော်အောင်၏ ခိုလှုံလာခြင်းကို လှိုက်လှဲစွာကြိုဆိုကြောင်းနှင့် အခြားစစ်ကောင်စီတပ်ဖွဲ့ဝင်များကိုလည်း ပြည်သူ့ဘက်သို့ ရပ်တည်ကြရန် တိုက်တွန်းထားသည်။
“စစ်ကောင်စီဟာ စစ်အာဏာရှင်အဖွဲ့အစည်းဖြစ်ပြီး တပ်မတော်က ပြည်သူ့တပ်မတော်အစစ်အမှန် မဟုတ်တော့ဘူး။ နိုင်ငံတော်ကိုချစ်တဲ့ တပ်မတော်သားတွေအနေနဲ့ အမှန်တရားဘက်က ရပ်တည်ဆုံးဖြတ်ရမယ့်အချိန်ပါ။ ခေါင်းဆောင်တစ်စုရဲ့ အကျိုးစီးပွားအတွက် အသက်ပေးနေရတာထက် ပြည်သူနဲ့ နိုင်ငံအတွက် တော်လှန်ရေးအဖွဲ့တွေနဲ့ ပူးပေါင်းပါဝင်ပေးပါ” ဟု ပဒိုစောအယ်နားက ဆက်လက်တိုက်တွန်းခဲ့သည်။
ဇူလိုင်လဆန်းပိုင်းအတွင်း ပထမဆုံးဘက်ပြောင်းခိုလှုံခဲ့သူ ဗိုလ်ကြီးမျိုးဆွေဦး (ခ) စောမိုးဇက်မှာ ကလိန်အောင်မြို့အခြေစိုက် ခလရ-၂၈၂ လက်အောက်ခံ သုခစခန်းမှဖြစ်ပြီး ဇူလိုင်လ ၂ ရက်နေ့က KNLA ထံသို့ လာရောက်ပူးပေါင်းခဲ့ခြင်းဖြစ်သည်။
ဤသို့ အရာရှိအဆင့်ရှိသူများ ဆက်တိုက်ဘက်ပြောင်းလာခြင်းသည် စစ်မြေပြင်မှ စစ်ကောင်စီတပ်များ၏ အခြေအနေမှန်ကို ထင်ဟပ်နေသည်။
