မွန်ပြည်ကာကွယ်ရေးတပ် (MSDF) ဥက္ကဋ္ဌ ဒေါက်တာသီရိမွန်ချမ်းကို တာဝန်မှ ရပ်စဲကြောင်း MSDF ၏ တရားဝင် Facebook စာမျက်နှာတွင် ယနေ့နံနက်ပိုင်းက ထုတ်ပြန်ခဲ့ရာ ၎င်းက ယခုလုပ်ရပ်သည် အာဏာသိမ်းမှုဖြစ်ကြောင်း တုံ့ပြန်ပြောဆိုလိုက်သည်။
ဒေါက်တာသီရိမွန်ချမ်းမှ ယခုဖြစ်စဉ်သည် အတွင်းရေးမှူး နိုင်ကိုသူက ကော့ကျိုက်ဒေသရှိ တပ်ရင်းမှူးနှင့် ကျေးရွာလုံခြုံရေးထံမှ လက်နက်များ သိမ်းယူခဲ့သည့် “တပ်တွင်းပုန်ကန်မှု”မှ အစပြုခဲ့သည်ဟု ဆိုသည်။
အဆိုပါ “တပ်တွင်းပုန်ကန်မှု” အတွက် နိုင်ကိုသူအား ဖမ်းဆီးရန်နှင့် လက်နက်ဖြင့် ခုခံပါက ပစ်သတ်ရန်အထိ ပြတ်သားစွာ အမိန့်ပေးခဲ့မှုအပေါ် နိုင်ကိုသူက မကျေနပ်သောကြောင့် ကော်မတီဝင်များကို စုစည်းကာ ယခုကဲ့သို့ အာဏာသိမ်းခဲ့ခြင်းဖြစ်ကြောင်း ဒေါက်တာသီရိမွန်ချမ်းက ပြောသည်။
“အမိန့်ပေးတဲ့အခါ တစ်ဖက်က ခုခံမယ်၊ ပုန်ကန်မယ်ဆိုရင် ပစ်တဲ့အမိန့်ထိတောင် ပေးထားတာဖြစ်တယ်။ အဲဒီအမိန့်အတိုင်း ဖြစ်လာရင်တောင် စစ်သားတစ်ယောက်အနေနဲ့ တာဝန်ယူဖို့ ဆုံးဖြတ်ထားပြီးသားပါ” ဟု ၎င်းက ဆိုသည်။
လက်ရှိတွင် MSDF ၏ Facebook စာမျက်နှာကို ယမန်နေ့ညပိုင်းက Admin မှ ၄င်းအားဖြုတ်ချခဲ့ပြီး ထိန်းချုပ်နိုင်ခြင်း မရှိတော့သော်လည်း စစ်ရေးအမိန့်အာဏာမှာ သူ့ထံတွင်သာရှိပြီး လက်အောက်ခံတပ်များကိုလည်း အမိန့်ပေးထားကာ မကြာမီ တရားဝင်ကြေညာချက်ထုတ်ပြန်သွားမည်ဟု ဒေါက်တာသီရိမွန်ချမ်းက ပြောကြားသည်။
MSDF ကော်မတီဘက်ကမူ ၎င်းတို့၏ လုပ်ဆောင်ချက်မှာ အာဏာသိမ်းခြင်းမဟုတ်ကြောင်း ငြင်းဆိုထားပြီး မွန်အမျိုးသားရေးအတွက် ဥက္ကဋ္ဌအဖြစ် တာဝန်ပေးခဲ့သော်လည်း မလွှဲမရှောင်သာသည့် အခြေအနေကြောင့် ယခုကဲ့သို့ လုပ်ဆောင်ရခြင်းဖြစ်ကြောင်း ဆိုသည်။
MSDF ၏ ထုတ်ပြန်ချက်တွင် မွန်ပြည် ကာကွယ်ရေးတပ် (MSDF) နိုင်ငံရေး စစ်ရေး ဦးဆောင်ကော်မတီ ပုံမှန်အစည်းအဝေး (6/2024) ကို ၂၀၂၄ ခုနှစ်၊ ဖေဖော်ဝါရီလ (၁၈) ရက်နေ့တွင် ကျင်းပပြုလုပ်ခဲ့ပြီး နိုင်ငံရေး စစ်ရေး ဦးဆောင် ကော်မတီကိုပြန်လည်ဖွဲ့စည်းကာ ကော်မတီဝင်များမှ ဥက္ကဋ္ဌ အဖြစ် Dr. သီရိမွန်ချမ်းကို ရွေးချယ်တင်မြှောက်ခဲ့သည်။
ယနေ့ အချိန်တွင် Dr. သီရိမွန်ချမ်း ၏ အပြုအမူ အပြောအဆို ကြံစည် လုပ်ကိုင်ဆောင်ရွက်ခဲ့မှုများအပေါ် ဆက်လက် ယုံကြည် လက်တွဲ လုပ်ဆောင်ရန်အဆင်မပြေမှုများ အခက်အခဲများ ဖြစ်ပေါ်လာပါသဖြင့် မွန်ပြည် ကာကွယ်ရေးတပ် (MSDF) နိုင်ငံရေး စစ်ရေး ဦးဆောင်ကော်မတီမှ ၂၀၂၅ ခုနှစ်၊ ဇူလိုင်လ (၉) ရက်နေ့တွင် အရေးပေါ် အစည်းအဝေးခေါ်ယူခဲ့ပြီး ဆွေးနွေးခဲ့သည်။
ကော်မတီဝင်များ အားလုံး၏ သဘောထား ဆန္ဒအရ မွန်ပြည် ကာကွယ်ရေးတပ် (MSDF) နိုင်ငံရေး စစ်ရေး ဦးဆောင် ကော်မတီမှ Dr. သီရိမွန်ချမ်း အား ပေးအပ်ထားသော တာဝန်များ အားလုံးကို ခြွင်းချက်မရှိ ပြန်လည် ရုပ်သိမ်းပြီး မွန်ပြည် ကာကွယ်ရေးတပ် (MSDF) မှ ထုတ်ပယ်ရန် ဆုံးဖြတ်ချက် ချမှတ်ခဲ့သည်။
လာမည့် တစ်လအတွင်း မွန်ပြည် ကာကွယ်ရေးတပ် (MSDF) နိုင်ငံရေး စစ်ရေးဦးဆောင်ကော်မတီကို ပြန်လည် တိုးချဲ့ ဖွဲ့စည်းကာ သက်ဆိုင်ရာ တာဝန်ထမ်းဆောင်မည့် သူများကို ရွေးချယ် တင်မြှောက်ပြီး တော်လှန်ရေး တာဝန်များကို ထမ်းဆောင်ရန် ပေးအပ်သွားမည် ဖြစ်ကြောင်း ဆုံးဖြတ်ချက်ချမှတ်ခဲ့သည်။
