အမေရိကန်ကို မြန်မာကနေပို့မယ့် ပစ္စည်းတွေကို အခွန် ၄၀% ကောက်မယ်ဆိုတဲ့ကိစ္စနဲ့ပတ်သက်ပြီး စစ်ခေါင်းဆောင် မင်းအောင်လှိုင်က အမေရိကန်သမ္မတ ဒေါ်နယ်ထရန့်ဆီကို မနေ့က စာတစ်စောင် ပို့လိုက်တယ်လို့ စစ်ကောင်စီက ညပိုင်းမှာ သတင်းထုတ်ပြန်လာပါတယ်။ အဲ့ဒီစာထဲမှာ အခွန်ကို ၄၀% အထိ မကောက်ဘဲ ၁၀% ကနေ ၂၀% ကြားပဲ ကောက်ခံဖို့ တောင်းဆိုထားတယ်လို့ ဆိုပါတယ်။
ဒီလိုလုပ်တာဟာ နှစ်နိုင်ငံကြား ကုန်သွယ်ရေး မျှတဖို့ပါဆိုတဲ့ ခေါင်းစဉ်နဲ့ စာပြန်လိုက်တာဖြစ်ပြီး၊ အပြန်အလှန်အနေနဲ့ အမေရိကန်က မြန်မာကိုသွင်းတဲ့ ပစ္စည်းတွေကျတော့ အခွန်ကို သုညကနေ ၁၀% ကြားပဲထားဖို့ ညှိနှိုင်းချင်တယ်လို့လည်း အဆိုပြုထားပါသေးတယ်။
အမေရိကန်သမ္မတ ဒေါ်နယ်ထရန့်က မြန်မာအပါအဝင် ၁၄ နိုင်ငံကို အခွန်တိုးကောက်မယ်လို့ အကြောင်းကြားခဲ့တာဖြစ်ပြီး၊ အဲ့ဒီထဲမှာ မြန်မာနဲ့ လာအိုက ၄၀% နဲ့ အများဆုံးဖြစ်နေတာပါ။ ဒါတောင် မူလက မြန်မာ့ပို့ကုန်တွေကို ၄၄% ကောက်မလို့လုပ်ရာကနေ ၄၀% လျှော့ပေးလိုက်တာကို ကျေးဇူးတင်ကြောင်းလည်း မင်းအောင်လှိုင်က သူ့ရဲ့စာထဲမှာ ထည့်ရေးထားပါသေးတယ်။
ပြည်တွင်း စီးပွားရေးလေ့လာသူတစ်ယောက်ကတော့ “ဘဘကြီးရဲ့ ကြိုးပမ်းမှုကို အသိအမှတ်ပြုတဲ့သဘောပေါ့ဗျာ။ တကယ်တမ်းတော့ အမေရိကန်နဲ့ မြန်မာ ကုန်သွယ်မှုက သိပ်မရှိပါဘူး။ အခုလို အရေးတယူလုပ်ပြနေတာက သူ့နာမည်တပ်ပြီး စာပို့လာလို့ပါ။ မြန်မာအတွက် ဘာမှ သိပ်ထူးထူးခြားခြားမရှိသလို ပြည်သူတွေအတွက်လည်း ထိခိုက်စရာမရှိပါဘူး” လို့ သုံးသပ်ထားပါတယ်။
မင်းအောင်လှိုင်ရဲ့ စာထဲမှာ ဒီကိစ္စကို ညှိနှိုင်းဖို့လိုလာရင် စစ်ကောင်စီဘက်က ကိုယ်စားလှယ်အဖွဲ့ကို အမြန်ဆုံးလွှတ်ပြီး အမေရိကန်က တာဝန်ရှိသူတွေနဲ့ တွေ့ဆုံဆွေးနွေးချင်တယ်လို့လည်း ပြောထားပါတယ်။
စီးပွားရေး သုတေသီတွေရဲ့အမြင်မှာတော့ အမေရိကန်ရဲ့ အခွန်တိုးကောက်မှုက မြန်မာ့ကုန်သွယ်ရေးကို တိုက်ရိုက်ထိခိုက်တာထက်၊ မြန်မာနာမည်ခံပြီး တခြားနိုင်ငံတွေက အမေရိကန်ကို သွယ်ဝိုက်တင်ပို့နေတဲ့ ကုန်စည်တွေကို တားဆီးချင်လို့ ဖြစ်နိုင်တယ်လို့ ဆိုပါတယ်။
စစ်ကောင်စီရဲ့ သတင်းထုတ်ပြန်ရေးခေါင်းဆောင် ဗိုလ်ချုပ်ဇော်မင်းထွန်းရဲ့ အပြောအရ မြန်မာ-အမေရိကန် ကုန်သွယ်မှုဟာ ၂၀၂၃-၂၄ ဘဏ္ဍာနှစ်မှာ ဒေါ်လာ ၇၀၁.၉ သန်းရှိခဲ့ပြီး၊ ၂၀၂၄-၂၅ ဘဏ္ဍာနှစ်မှာတော့ ၅၈၈.၃ သန်းကျော် ရှိခဲ့တယ်လို့ သိရပါတယ်။
ဒါ့အပြင် မင်းအောင်လှိုင်က ထရန့်ကို ၂၀၂၀ ရွေးကောက်ပွဲမှာ မဲမသမာမှုတွေကြောင့် အာဏာသိမ်းခဲ့ရတာဖြစ်ပြီး၊ ရွေးကောက်ပွဲမှာရှုံးတဲ့ ပါတီတွေကလည်း ဒါကိုလက်ခံလို့ စစ်တပ်က နိုင်ငံတော်တာဝန်ကို ယူခဲ့ရတာပါဆိုပြီး ထပ်ရှင်းပြထားပြန်ပါတယ်။
စီးပွားရေးပိတ်ဆို့ထားတာတွေကိုလည်း ပြန်ဖြေလျှော့ပေးဖို့ သူကတောင်းဆိုခဲ့ပြီး၊ ဒီလိုပိတ်ဆို့ထားတာဟာ နှစ်ဖက်စလုံးအတွက် အကျိုးမရှိဘူးလို့လည်း ဆိုပါတယ်။
တစ်နိုင်ငံလုံးကို ဗုံးတွေပတ်ကြဲနေတဲ့ စစ်တပ်ရဲ့ခေါင်းဆောင်ကပဲ မြန်မာနိုင်ငံဟာ အမေရိကန်အပါအဝင် ကမ္ဘာ့နိုင်ငံတွေကို အနှောင့်အယှက်ပေးမှာမဟုတ်ဘဲ အေးအေးချမ်းချမ်း အတူယှဉ်တွဲနေထိုင်သွားမှာပါလို့ ပြောခဲ့ပါသေးတယ်။
နောက်ဆုံးအနေနဲ့ ကုန်သွယ်ရေးအတားအဆီးတွေ ဖယ်ရှားပြီး အခွန်ကို မျှမျှတတ ကောက်ခံမယ်ဆိုရင် မြန်မာ-အမေရိကန် ကုန်သွယ်မှုတွေ ပိုတိုးတက်လာမယ်လို့ ယုံကြည်ကြောင်း မင်းအောင်လှိုင်က ပြောဆိုခဲ့ပါတယ်။
