ထိုင်း-မြန်မာနယ်စပ်ဒေသတစ်လျှောက်တွင် ဆက်လက်တည်ရှိနေသည့် အွန်လိုင်းငွေလိမ်လုပ်ငန်း (ကျားဖြန့်) များတွင် ပါဝင်လုပ်ကိုင်နေသော တရုတ်နိုင်ငံသား အယောက်သုံးသောင်းကို မိမိတို့နိုင်ငံဘက်သို့ ပြန်လည်လွှဲပြောင်းပေးရန် တရုတ်အစိုးရက တရားဝင်တောင်းဆိုလိုက်ကြောင်း သိရသည်။

ဇူလိုင်လ ၇ ရက်နေ့က နယ်စပ်ဒေသ၌ ပြုလုပ်ခဲ့သော မြန်မာ၊ ထိုင်းနှင့် တရုတ် သုံးနိုင်ငံတွေ့ဆုံဆွေးနွေးပွဲအတွင်း တရုတ်ဘက်မှ မြန်မာနိုင်ငံအား ယခုကဲ့သို့ တောင်းဆိုခဲ့ခြင်းဖြစ်သည်ဟု ကရင်နယ်ခြားစောင့်တပ် (BGF) ၏ ပြောရေးဆိုခွင့်ရှိသူ ဒုတိယဗိုလ်မှူးကြီး နိုင်မောင်ဇော်က မီဒီယာများသို့ ပြောကြားခဲ့သည်။

အဆိုပါတွေ့ဆုံပွဲသို့ တရုတ်ပြည်သူ့လုံခြုံရေးဝန်ကြီးဌာနမှ ဒုတိယညွှန်ကြားရေးမှူးချုပ် ဦးဆောင်သော ရာဇဝတ်မှုစုံစမ်းထောက်လှမ်းရေးအဖွဲ့၊ စစ်ကောင်စီလက်အောက်ခံ ပြည်ထဲရေးဝန်ကြီးဌာနမှ ဒုတိယဝန်ကြီးနှင့် တာဝန်ရှိသူများ၊ ထိုင်းနိုင်ငံ လူဝင်မှုကြီးကြပ်ရေးဌာနမှ တာဝန်ရှိသူများ တက်ရောက်ခဲ့ကြသည်။

တရုတ်ဘက်က တောင်းဆိုသည့် လူဦးရေ သုံးသောင်းမှာ ကျားဖြန့်လုပ်ငန်းများ တွင်ကျယ်စွာတည်ရှိရာ မြဝတီမြို့နယ်အတွင်းရှိ ရွှေကုက္ကို၊ ကေကေပါ့ခ် (KK Park) နှင့် မယ်ထော်သလေး အပါအဝင် နေရာအနှံ့အပြားမှ လုပ်ကိုင်နေသူများအား ရည်ညွှန်းခြင်းဖြစ်ကြောင်း ဒုတိယဗိုလ်မှူးကြီး နိုင်မောင်ဇော်က ဆက်လက်ရှင်းပြသည်။

ယင်းဆွေးနွေးပွဲနှင့် ပတ်သက်၍ စစ်ကောင်စီက ဇူလိုင်လ ၈ ရက်နေ့ထုတ် သတင်းစာများတွင် မြဝတီဒေသရှိ အွန်လိုင်းငွေလိမ်လုပ်ငန်းများ အမြစ်ပြတ်တိုက်ဖျက်ရေးနှင့် ပတ်သက်ဆက်နွှယ်သူများကို တရုတ်နိုင်ငံသို့ ချောမွေ့စွာ လွှဲပြောင်းနိုင်ရေး ဆွေးနွေးခဲ့သည်ဟု သတင်းထုတ်ပြန်ခဲ့သော်လည်း တရုတ်နိုင်ငံသား ၃၀,၀၀၀ ကို လွှဲပြောင်းပေးရန် တောင်းဆိုခဲ့သည့်အချက်ကိုမူ ထည့်သွင်းဖော်ပြခဲ့ခြင်း မရှိပေ။

တစ်ဖက်တွင်လည်း စစ်ကောင်စီက ၂၀၂၄ ခုနှစ် ပထမ ၆ လအတွင်း တရားမဝင် ဝင်ရောက်လာပြီး ကျားဖြန့်လုပ်ငန်းများ လုပ်ကိုင်နေသည့် နိုင်ငံခြားသား ၉,၁၉၈ ဦးကို ဖော်ထုတ်နိုင်ခဲ့ပြီး ၈,၉၀၀ ကျော်ကို နေရပ်ပြန်လည်လွှဲပြောင်းပေးခဲ့ပြီးဖြစ်ကြောင်း သတင်းထုတ်ပြန်ထားသည်။ BGF ၏ အဆိုအရမူ ၎င်းတို့ လွှဲပြောင်းပေးခဲ့သည့် နိုင်ငံခြားသားများထဲတွင် တရုတ်နိုင်ငံသား ၆,၀၀၀ နီးပါး ပါဝင်ခဲ့သည်။

တရုတ်ကိုယ်စားလှယ်အဖွဲ့သည် ဇူလိုင်လ ၇ ရက်နေ့က ရွှေကုက္ကိုဒေသကို ထိုင်းနိုင်ငံဘက်ခြမ်းမှ ကြည့်ရှုခဲ့ပြီးနောက် မြဝတီမြို့ရှိ BGF ဆက်ဆံရေးရုံးသို့ လာရောက်ကာ ကျားဖြန့်လုပ်ငန်းများမှ ထိန်းသိမ်းထားသည့် နိုင်ငံခြားသားများနှင့် လုပ်ငန်းသုံးပစ္စည်းများကို ကြည့်ရှုခဲ့သည်။

BGF ပြောခွင့်ရပုဂ္ဂိုလ်က “သူတို့က ကျနော်တို့ ထပ်အပ်မယ့်လူတွေကိစ္စရယ်၊ ထိန်းသိမ်းထားတဲ့သူတွေရယ်၊ ပစ္စည်းတွေရယ် လာကြည့်သွားတယ်။ ကျန်တာက ကျနော်တို့နဲ့ တိုက်ရိုက်ဆွေးနွေးသွားတာ မရှိပါဘူး” ဟု ပြောဆိုခဲ့ပြီး အဓိကဆွေးနွေးမှုများကို စစ်ကောင်စီ ပြည်ထဲရေးဝန်ကြီးဌာနနှင့်သာ ပြုလုပ်ခဲ့ကြောင်း ဆိုသည်။

ထိုဆွေးနွေးပွဲတွင် BGF ဘက်မှလည်း ထိန်းသိမ်းထားသည့် နိုင်ငံခြားသားများကို အမြန်ဆုံးပြန်လည်ခေါ်ယူပေးရန် တောင်းဆိုခဲ့ရာ တရုတ်ဘက်မှ တစ်ပတ်လျှင် လေယာဉ်သုံးစီး စေလွှတ်၍ ခေါ်ယူပေးမည်ဟု သဘောတူညီခဲ့ကြောင်း သိရသည်။

BGF အနေဖြင့် ပြီးခဲ့သည့် ဖေဖော်ဝါရီလကတည်းက နိုင်ငံပေါင်း ၃၀ ကျော်မှ နိုင်ငံခြားသား ၈,၀၀၀ ကျော်ကို ပြန်လည်ပို့ဆောင်ပေးခဲ့ပြီးဖြစ်သော်လည်း သက်ဆိုင်ရာနိုင်ငံအချို့၏ နှေးကွေးမှုကြောင့် လူ ၂၀၀ ကျော်မှာ ဆက်လက်ထိန်းသိမ်းထားရဆဲဖြစ်သည်။

တရုတ်နိုင်ငံ၏ အစီအစဉ်သစ်အရ လာမည့်ရက်သတ္တပတ်အတွင်း ဒုတိယအသုတ် ပြန်လည်ပို့ဆောင်ရေးလုပ်ငန်းများကို ပြန်လည်စတင်နိုင်မည်ဟု BGF ဘက်က မျှော်လင့်လျက်ရှိသည်။

Source-BBC Burmese