လှိုင်သာယာမြို့နယ်၌ ရဲတပ်ဖွဲ့ဝင်များအား ပစ်ခတ်၍ အမျိုးသမီးတစ်ဦးကို ကယ်ထုတ်သွားသူများမှာ တော်လှန်ရေးရန်ပုံငွေများဖြင့် စစ်ကောင်စီထံ လက်နက်ချခဲ့သူများဖြစ်ကြောင်း သိရ

ရန်ကုန်တိုင်းဒေသကြီး၊ လှိုင်သာယာမြို့နယ်၌ ရဲတပ်ဖွဲ့ဝင်များအား ပစ်ခတ်၍ နိုင်ငံရေးအကျဉ်းသူတစ်ဦးအား ကယ်ထုတ်ခဲ့သည့် ဖြစ်စဉ်တွင် ပါဝင်သူများကို ဇူလိုင်လ ၂ ရက်နေ့တွင် သန်လျင်မြို့နယ်၌ စစ်ကောင်စီက ဖမ်းဆီးရမိခဲ့ပြီး ၎င်းတို့မှာ ပြည်သူ့ရန်ပုံငွေ သိန်းထောင်ကျော်နှင့်အတူ စစ်ကောင်စီထံ လက်နက်ချခဲ့သည့် တော်လှန်ရေးအမည်ခံများသာဖြစ်ကြောင်း ဒေသခံတော်လှန်ရေး သတင်းရင်းမြစ်များထံမှ သိရသည်။

ဖြစ်စဉ်မှာ ဇူလိုင်လ ၁ ရက်နေ့၊ ည ၇ နာရီခွဲအချိန်ခန့်က လှိုင်သာယာအရှေ့ပိုင်းမြို့နယ်ရဲစခန်းတွင် နိုင်ငံရေးပုဒ်မဖြင့် ထိန်းသိမ်းခံထားရသူ ဇွန်ပွင့်လှိုင်အား လှိုင်သာယာမြို့နယ်ဆေးရုံသို့ ပို့ဆောင်စဉ် အိုးရှင်းစင်တာအနီး၌ ချစ်ဇင်လင်းဆိုသူက သေနတ်ဖြင့် ပစ်ခတ်ကာ ကယ်ထုတ်သွားခဲ့ခြင်းဖြစ်သည်။

ထိုသို့ ပစ်ခတ်မှုကြောင့် ဒုရဲအုပ်အမျိုးသားတစ်ဦး သေဆုံးခဲ့ပြီး ဒုရဲအုပ်အမျိုးသမီးတစ်ဦး ဒဏ်ရာရရှိခဲ့ကြောင်း သိရသည်။

အဆိုပါ ကယ်ထုတ်မှုဖြစ်စဉ်တွင် ပါဝင်သူများကို ဇူလိုင်လ ၂ ရက်၊ နံနက် ၁၀ နာရီခန့်တွင် သန်လျင်မြို့နယ်၊ ဘော့သပြေကန်ရွာအနီး၌ စစ်ကောင်စီတပ်ဖွဲ့ဝင်များက ဖမ်းဆီးရမိခဲ့သည်။

သို့သော် အဆိုပါဖြစ်စဉ်မှာ တော်လှန်ရေးအင်အားစုများနှင့် သက်ဆိုင်ခြင်းမရှိဘဲ ၎င်းတို့အချင်းချင်း အဝေမတည့်ရာမှ ဖြစ်ပွားသည့် ပြဿနာသာဖြစ်ကြောင်း Thanlyin Media ကဲ့သို့သော ဒေသတွင်းတော်လှန်ရေးစာမျက်နှာများက ထုတ်ပြန်ထားသည်။

ဖမ်းဆီးခံရသူ ချစ်ဇင်လင်းမှာ ကရင်ပြည်နယ်၌ National Special Force အမည်ဖြင့် အဖွဲ့ထောင်ကာ လှုပ်ရှားခဲ့ပြီး ၂၀၂၃ ခုနှစ်၊ ဇူလိုင်လတွင် ဒုတပ်ခွဲမှူး ရန်ကုန်(ခ)ဘုန်းမြင့်အောင်နှင့်အတူ ပြည်သူများလှူဒါန်းထားသည့် လက်နက်များနှင့် ငွေကျပ်သိန်းထောင်ကျော်ကို ယူဆောင်ကာ စစ်ကောင်စီထံ လက်နက်ချခဲ့သူဖြစ်ကြောင်း သိရသည်။ ၎င်း၏ဇနီးဖြစ်သူ ဇွန်ပွင့်လှိုင်မှာလည်း တော်လှန်ရေးထောက်ပို့အမည်ခံ၍ အလှူငွေလိမ်လည်ကောက်ခံနေစဉ် ဖမ်းဆီးခံခဲ့ရခြင်းဖြစ်ကြောင်း တော်လှန်ရေးအင်အားစုများ၏ စုံစမ်းဖော်ထုတ်ချက်အရ သိရသည်။

ယခုဖြစ်စဉ်နှင့်ပတ်သက်၍ စစ်ကောင်စီဝါဒဖြန့် တယ်လီဂရမ်ချန်နယ်များတွင် ၎င်းတို့၏ လက်နက်ချအဖွဲ့ဝင်များအဖြစ် ဖော်ပြခြင်းမရှိဘဲ ဖမ်းဆီးရမိသည့်သတင်းကို အကျယ်တဝင့် ဝါဒဖြန့်လျက်ရှိသည်။