ထိုင်းနိုင်ငံ၊ ရတ်ချဘူရီမြို့ အုပ်ချုပ်ရေးမှူးရုံး၊ လူဝင်မှုကြီးကြပ်ရေး (လဝက) နဲ့ ပြည်တွင်းလုံခြုံရေးတပ်ဖွဲ့တွေ ပူးပေါင်းပြီး အိမ်ရာစီမံကိန်းကြီးတစ်ခုထဲကို ဝင်ရောက်စီးနင်းကာ တရားမဝင် မြန်မာအလုပ်သမား ၈ ဦးကို ဖမ်းဆီးခဲ့ပါတယ်။
အဲ့ဒီနေရာဟာ အရင်က အလုပ်ရှင်က နိုင်ငံရေးသမားတစ်ဦးရဲ့ အရှိန်အဝါကိုသုံးပြီး အကာအကွယ်ယူခဲ့တယ်ဆိုတဲ့ သတင်းတွေ ထွက်ပေါ်ခဲ့တဲ့နေရာလည်း ဖြစ်ပါတယ်။
ဖမ်းမိတဲ့ အလုပ်သမားတွေဟာ သဘာဝနယ်စပ်လမ်းကြောင်းကနေ ခိုးဝင်လာကြတာဖြစ်ပြီး သူတို့ကို နေရပ်ပြန်ပို့သွားမှာ ဖြစ်သလို၊ တရားမဝင် လက်ခံထားတဲ့ အလုပ်ရှင်ကိုလည်း အရေးယူသွားမယ်လို့ သိရပါတယ်။
ဇူလိုင်လ ၂ ရက်နေ့က ရတ်ချဘူရီမြို့ အလုပ်အကိုင်ရှာဖွေရေးရုံးကနေ မြို့အုပ်ချုပ်ရေးမှူးထံ တရားမဝင် နိုင်ငံခြားသားအလုပ်သမားတွေကို ပူးပေါင်းဖမ်းဆီးပေးဖို့ အကူအညီတောင်းခံလာခဲ့ပါတယ်။
သတင်းတွေအရ အဲ့ဒီအိမ်ရာစီမံကိန်းထဲမှာ တရားမဝင်အလုပ်သမား အများအပြားရှိပြီး အရင်က တခြားဌာနတွေ ဝင်ဖမ်းဖို့ကြိုးစားတုန်းက အလုပ်ရှင်က သူ့ဆွေမျိုးဟာ နိုင်ငံရေးသမားဖြစ်တယ်လို့ အကြောင်းပြပြီး ဝင်ခွင့်ရလို့ ဖမ်းမမိခဲ့ဘူးလို့ ဆိုပါတယ်။
ဒါကြောင့် မြို့အုပ်ချုပ်ရေးမှူးက လုံခြုံရေးတာဝန်ခံနဲ့ တာဝန်ရှိသူတွေကို လဝက၊ ပြည်တွင်းလုံခြုံရေးတပ်ဖွဲ့တွေနဲ့ ပူးပေါင်းပြီး အဲ့ဒီအိမ်ရာကို ဝင်ရောက်စစ်ဆေးဖို့ အမိန့်ပေးခဲ့တာ ဖြစ်ပါတယ်။
အရာရှိတွေ ဝင်ရောက်စစ်ဆေးတဲ့အခါမှာ အလုပ်သမားတွေဟာ အနီးအနားက လယ်ကွင်းတွေထဲကို ထွက်ပြေးခဲ့ကြပါတယ်။ ဒါပေမဲ့ အရာရှိတွေက အမျိုးသား ၉ ဦးကို လိုက်လံဖမ်းဆီးနိုင်ခဲ့ပြီး သူတို့အားလုံးဟာ လယ်ထဲက ရွှံ့ရေတွေနဲ့ ပေကျံနေခဲ့ပါတယ်။
စစ်ဆေးကြည့်တဲ့အခါမှာ သူတို့အားလုံးဟာ မြန်မာနိုင်ငံသားတွေ ဖြစ်နေပြီး၊ တစ်ဦးကတော့ အထောက်အထားပြည့်စုံလို့ မှတ်တမ်းယူပြီး ပြန်လွှတ်ပေးခဲ့ပါတယ်။
ကျန် ၈ ဦးကတော့ ဘာအလုပ်လုပ်ခွင့်လက်မှတ်မှ မရှိပါဘူး။ အရာရှိတွေက သူတို့ကို မူးယစ်ဆေးဝါးစစ်ဆေးတာ၊ ရာဇဝင်မှတ်တမ်းယူတာတွေလုပ်ပြီး “အလုပ်လုပ်ခွင့်လိုင်စင်မရှိမှု”၊ “နိုင်ငံတွင်း တရားမဝင် ဝင်ရောက်နေထိုင်မှု” စတဲ့ ပုဒ်မတွေနဲ့ အမှုဖွင့်ပြီး နေရပ်ပြန်ပို့ဖို့ ဆက်လက်ဆောင်ရွက်သွားမှာ ဖြစ်ပါတယ်။
စကားပြန်ကနေတဆင့် စစ်ဆေးမေးမြန်းရာမှာတော့ သူတို့ဟာ ပွဲစားရဲ့အကူအညီနဲ့ သဘာဝနယ်စပ်လမ်းကြောင်းကနေ ခိုးဝင်လာခဲ့ကြပြီး နေရာအသီးသီးကို အလုပ်ဆင်းဖို့ ပို့ဆောင်ခံခဲ့ရတယ်လို့ ထွက်ဆိုခဲ့ပါတယ်။
အထူးသဖြင့် ဒီရွာမှာ အလုပ်သမားအများကြီးရှိရတဲ့အကြောင်းရင်းကတော့ အလုပ်ရှင်မှာ နိုင်ငံရေးသမားဆွေမျိုးရှိလို့ ဘယ်သူမှ လာမဖမ်းရဲဘူးလို့ ပြောထားတဲ့အတွက်ကြောင့် ဖြစ်တယ်လို့ ဆိုပါတယ်။
ဒီကိစ္စနဲ့ပတ်သက်ပြီး ရတ်ချဘူရီမြို့ရဲ့ ဒုတိယအုပ်ချုပ်ရေးမှူးက သက်ဆိုင်ရာဌာနတွေနဲ့ ပူးပေါင်းပြီး သတင်းပေးချက်အရ ဝင်ရောက်စစ်ဆေးခဲ့ရာမှာ တရားမဝင်အလုပ်သမား ၈ ဦးကို ဖမ်းမိခဲ့တာဖြစ်တယ်လို့ ပြောပါတယ်။
သူတို့ကို မူးယစ်ဆေးဝါးသုံးစွဲထားခြင်းရှိမရှိ ဆက်လက်စစ်ဆေးသွားမှာဖြစ်ပြီး နောက်ပိုင်းမှာလည်း တရားမဝင်အလုပ်သမားတွေရှိနိုင်တဲ့နေရာတွေကို ဆက်ပြီး တင်းတင်းကျပ်ကျပ် စစ်ဆေးသွားမယ်လို့ ဆိုပါတယ်။
ဒါ့အပြင် တရားမဝင်အလုပ်သမားတွေကို လက်ခံထားတာ၊ အလုပ်ပေးတာတွေလုပ်တဲ့ အလုပ်ရှင်တွေကိုလည်း ဥပဒေနဲ့အညီ အရေးယူသွားမယ်လို့ ပြောကြားခဲ့ပါတယ်။
