မွန်ပြည်နယ်၊ ရေးမြို့နယ်၊ အာယုတောင်ကျေးရွာရှိ စစ်ကောင်စီ၏ ခမရ-၃၄၃ စခန်းကုန်းကို ရေးဘီလူးအဖွဲ့က တိုက်ခိုက်သိမ်းပိုက်ခဲ့ပြီးနောက် တိုက်ပွဲတွင်ကျဆုံးခဲ့သည့် ရဲဘော်တစ်ဦး၏ ရုပ်အလောင်းကို သယ်ဆောင်ရန် ဒေသခံများက မော်တော်ယာဉ်ဖြင့် ကူညီခြင်းမရှိခဲ့ကြောင်း ရေးဘီလူးအဖွဲ့ခေါင်းဆောင်က ၎င်း၏ လူမှုကွန်ရက်စာမျက်နှာတွင် ရေးသားခဲ့သည်။
ဇူလိုင်လ ၁ ရက်နေ့ နံနက် ၅ နာရီခန့်တွင် အဆိုပါစခန်းကုန်းကို ရေးဘီလူးအဖွဲ့က ဝင်ရောက်တိုက်ခိုက်ခဲ့ပြီး ၅ နာရီ ၄၅ မိနစ်တွင် အပြီးသတ်သိမ်းပိုက်နိုင်ခဲ့သည်။
တိုက်ပွဲအတွင်း ရေးဘီလူးအဖွဲ့မှ ရဲဘော် ထက်မြတ်မောင် (ခ) အသေးလေး ကျဆုံးခဲ့သည်။
ကျဆုံးရဲဘော်၏ ရုပ်အလောင်းကို အခြေစိုက်စခန်းသို့ ပြန်လည်သယ်ဆောင်ရန် ဒေသခံများထံ မော်တော်ယာဉ်အကူအညီ တောင်းခဲ့သော်လည်း အကူအညီမရခဲ့ကြောင်း ရေးဘီလူးအဖွဲ့ခေါင်းဆောင်က ပြောသည်။
“မွန်ပြည်နယ်မှာ စစ်တိုက်ရတာ ကျတဲ့ရဲဘော်ရုပ်အလောင်းကိုတောင် ဘယ်လိုပြန်ယူရလဲကြည့်ဗျာ။ ဘယ်ကားမှ အကူအညီမရဘူး။ ဒါလား ဒီမိုကရေစီလိုလားတာ” ဟု ၎င်းက လူမှုကွန်ရက်တွင် ရေးသားထားသည်။
နောက်ဆုံးတွင် ကျဆုံးရဲဘော် ထက်မြတ်မောင် (ခ) အသေးလေး၏ ရုပ်အလောင်းကို ဆိုင်ကယ်ဖြင့်သာ အခြေစိုက်စခန်းသို့ သယ်ဆောင်ခဲ့ရကြောင်း သိရသည်။
ရေးဘီလူးအဖွဲ့သည် ရေးမြို့နယ်အတွင်း စစ်ကောင်စီ၏ တပ်များ၊ ရဲစခန်းများနှင့် ဌာနဆိုင်ရာများကို တော်လှန်တိုက်ခိုက်နေသည့် ဒေသခံလက်နက်ကိုင်အဖွဲ့တစ်ခု ဖြစ်သည်။ ပြီးခဲ့သည့် ဇွန်လ ၈ ရက်နေ့ကလည်း ရေးဘီလူးအဖွဲ့သည် အာယုတောင်ကျေးရွာအနီးရှိ စစ်ကောင်စီ၏ သစ်စက်ဂိတ်စခန်းတစ်ခုကို ဝင်ရောက်တိုက်ခိုက်ခဲ့သေးသည်။
