စစ်ကောင်စီဗိုလ်ချုပ်တစ်ဦး နော်ဝေးငြိမ်းချမ်းရေးဖိုရမ်တက်ရောက်၊ ဝေဖန်မှုတွေထွက်ပေါ်

မြန်မာစစ်ကောင်စီရဲ့ ငြိမ်းချမ်းရေးကိုယ်စားလှယ်တစ်ဦးဖြစ်တဲ့ ဒုတိယဗိုလ်ချုပ်ကြီးမင်းနိုင်ဟာ နော်ဝေးနိုင်ငံမှာကျင်းပခဲ့တဲ့ ကမ္ဘာ့အဆင့် ငြိမ်းချမ်းရေးဖိုရမ်တစ်ခုကို တက်ရောက်ခဲ့တဲ့အတွက် ဝေဖန်မှုတွေ ထွက်ပေါ်နေပါတယ်။

ဒီဖိုရမ်ကို နော်ဝေးနိုင်ငံခြားရေးဝန်ကြီးဌာနနဲ့ ဆွစ်ဇာလန်အခြေစိုက် လူသားချင်းစာနာမှုဆိုင်ရာ ဆွေးနွေးညှိနှိုင်းရေးစင်တာ (Centre for Humanitarian Dialogue – HD) တို့က ပူးတွဲကျင်းပခဲ့တာ ဖြစ်ပါတယ်။

စစ်ကောင်စီရဲ့ အမျိုးသားစည်းလုံးညီညွတ်ရေးနှင့် ငြိမ်းချမ်းမှုဖော်ဆောင်ရေး ညှိနှိုင်းရေးကော်မတီ (NSPNC) ရဲ့ အတွင်းရေးမှူးဖြစ်သူ ဒုဗိုလ်ချုပ်ကြီးမင်းနိုင်ဟာ ဇွန်လ ၁၁ ရက်နဲ့ ၁၂ ရက်နေ့တွေမှာ ကျင်းပခဲ့တဲ့ “အော်စလိုဖိုရမ် (Oslo Forum)” ကို တက်ရောက်ခဲ့ပြီး သူ့ရဲ့ဓာတ်ပုံတွေလည်း ထွက်ပေါ်လာခဲ့ပါတယ်။

“အားလုံးလက်တွဲကူကြ- ပြောင်းလဲနေသောကမ္ဘာမှ ကြားဝင်စေ့စပ်ရေး” ဆိုတဲ့ ခေါင်းစဉ်နဲ့ကျင်းပတဲ့ ဒီဖိုရမ်ဟာ မြန်မာ့အရေးအပါအဝင် ကမ္ဘာ့ပဋိပက္ခတွေကို ဖြေရှင်းဖို့အတွက် နိုင်ငံတကာက ကြားဝင်စေ့စပ်သူတွေနဲ့ မူဝါဒချမှတ်သူ ၁၀၀ ကျော်ကို ဖိတ်ကြားခဲ့တာပါ။ ဖိုရမ်ရဲ့ ကြေညာချက်ထဲမှာတော့ ကွန်ဂို၊ ယူကရိန်း၊ ဆူဒန်နဲ့ မြန်မာနိုင်ငံလို ပဋိပက္ခဖြစ်ပွားနေတဲ့ နေရာတွေရဲ့ အခြေအနေကို အဓိကထား ဆွေးနွေးခဲ့တယ်လို့ ဖော်ပြထားပါတယ်။

စစ်ကောင်စီဟာ နိုင်ငံတကာပွဲတွေမှာ ဘာတွေဆွေးနွေးခဲ့တယ်ဆိုတာကို သတင်းထုတ်ပြန်လေ့မရှိသလို၊ အခု အော်စလိုဖိုရမ်နဲ့ ပတ်သက်ပြီးတော့လည်း သူတို့ဘက်က တရားဝင်ထုတ်ပြန်တာမျိုး မရှိသေးပါဘူး။ ဒါကြောင့် ဒုဗိုလ်ချုပ်ကြီးမင်းနိုင် ဘာတွေဆွေးနွေးခဲ့လဲဆိုတာကိုတော့ အတိအကျ မသိရသေးပါဘူး။

နော်ဝေးနိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူတစ်ဦးကတော့ မြန်မာနိုင်ငံဟာ အော်စလိုဖိုရမ်ရဲ့ အစီအစဉ်မှာ အမြဲလိုလိုပါဝင်နေကျဖြစ်ပြီး ပဋိပက္ခမှာ ပါဝင်တဲ့ ဘက်ပေါင်းစုံကို ဖိတ်ကြားလေ့ရှိတယ်လို့ သတင်းဌာနကို ပြောခဲ့ပါတယ်။

ဒါပေမဲ့ ဒီဖိုရမ်ကို အမျိုးသားညီညွတ်ရေးအစိုးရ (NUG) နဲ့ စစ်ကောင်စီကို တော်လှန်တိုက်ခိုက်နေတဲ့ တိုင်းရင်းသားလက်နက်ကိုင်အဖွဲ့တွေ (EAOs) ကို ဖိတ်ကြားခဲ့တယ်ဆိုတဲ့ သတင်းမျိုးတော့ မကြားသိရပါဘူး။

ဒုဗိုလ်ချုပ်ကြီးမင်းနိုင်ဟာ ၂၀၂၁ အာဏာသိမ်းပြီးနောက်ပိုင်း စစ်ကောင်စီရဲ့ ငြိမ်းချမ်းရေးဆွေးနွေးပွဲတွေမှာ အဓိကနေရာက ပါဝင်သူဖြစ်ပြီး တိုင်းရင်းသားလက်နက်ကိုင်အဖွဲ့တချို့နဲ့ တွေ့ဆုံမှုတွေ ပြုလုပ်ခဲ့သူပါ။

ဒါပေမဲ့ သူဟာ ၂၀၂၃ ခုနှစ်က ညီနောင်မဟာမိတ်သုံးဖွဲ့နဲ့ တွေ့ဆုံချိန်မှာ “ခင်ဗျားတို့ တိုင်းရင်းသားဒေသတွေမှာ မြို့တွေရွာတွေ သိမ်းလို့ရရင်တောင် ခင်ဗျားတို့ဒေသတွေ မငြိမ်းချမ်းဘူး။ ကျနော်တို့မှာရှိတဲ့ အဆင့်မြင့်လက်နက်တွေနဲ့ ခင်ဗျားတို့ကို လေကြောင်းက အမြဲတိုက်မယ်” ဆိုပြီး ခြိမ်းခြောက်စကားပြောခဲ့တဲ့အတွက် လူသိများသူလည်း ဖြစ်ပါတယ်။ ဒီစကားကို TNLA ဒုစစ်ဦးစီးချုပ် ဗိုလ်မှူးချုပ်တာဘုန်းကျော်က လူမှုကွန်ရက်ပေါ်မှာ ပြန်လည်ထုတ်ဖော်ခဲ့တာပါ။

ဒါ့အပြင် ဒုဗိုလ်ချုပ်ကြီးမင်းနိုင်ဟာ ပြီးခဲ့တဲ့ ၂၀၂၃ ခုနှစ်ကလည်း ဖင်လန်နိုင်ငံမှာပြုလုပ်ခဲ့တဲ့ အစည်းအဝေးတစ်ခုကို တက်ရောက်ခဲ့ပြီး အဲ့ဒီအချိန်တုန်းကလည်း အရပ်ဘက်အဖွဲ့အစည်း ၆၀၀ ကျော်က စစ်ကောင်စီကို တရားဝင်အသိအမှတ်ပြုရာရောက်တယ်ဆိုပြီး ကန့်ကွက်ရှုတ်ချခဲ့ကြပါသေးတယ်။

အခုလို စစ်ကောင်စီရဲ့ အကြမ်းဖက်လုပ်ရပ်တွေကို ဦးဆောင်နေသူတစ်ဦးကို နိုင်ငံတကာငြိမ်းချမ်းရေးဖိုရမ်လို နေရာမျိုးမှာ ဖိတ်ကြားတာဟာ စစ်ကောင်စီကို တရားဝင်မှုပေးသလိုဖြစ်နေပြီး မြန်မာပြည်သူတွေရဲ့ ဆန္ဒကို မျက်ကွယ်ပြုရာရောက်တယ်လို့ ဝေဖန်သုံးသပ်မှုတွေ ရှိနေပါတယ်။

ဒီဖိုရမ်ကို အာဆီယံအထွေထွေအတွင်းရေးမှူးချုပ် ဒေါက်တာကောင်းခင်ဟွန်လည်း တက်ရောက်ခဲ့တယ်လို့ သိရပါတယ်။

Source (သတင်းရင်းမြစ်):