ကရင်ပြည်နယ် မြဝတီနယ်စပ်အထိ အရေးပါသည့် အာရှလမ်းမထိန်းချုပ်နိုင်ရေးအတွက် KNU ဦးဆောင်သော တော်လှန်ရေးအင်အားစုများနှင့် စစ်ကောင်စီတပ်အကြား ကော့ကရိတ်နှင့် ကျုံဒိုးဒေသများတွင် တိုက်ပွဲများ နှစ်ဖက်အပြင်းအထန် ဖြစ်ပွားနေပြီး စစ်ကောင်စီဘက်က အင်အားထပ်မံဖြင့်တင်းထားကြောင်း သတင်းရရှိသည်။
လက်ရှိအချိန်အထိ နှစ်ပတ်ကျော်အတွင်း ဖြစ်ပွားနေသော ကော့ကရိတ်-ကျုံဒိုးတိုက်ပွဲတွင် နှစ်ဖက်လုံးတွင် ထိခိုက်သေဆုံးမှုများရှိနေပြီး KNLA ဦးဆောင်သော တော်လှန်ရေးအဖွဲ့များဘက်တွင်လည်း တချို့ ထိခိုက်ကျဆုံးမှုရှိနေသည်ဟု Facebook သတင်းများအရ သိရှိရသည်။
နယ်မြေခံသတင်းရင်းမြစ်များအရ စစ်ကောင်စီဘက်က တပ်ကူအင်အားများကို ကျုံဒိုးမြို့သို့ ထပ်မံပို့ဆောင်နေပြီး ဘားအံမြို့တွင်လည်း စစ်ဆေးမှုများ တင်းကျပ်လာသည်ဟု နယ်စပ်စစ်ရေးလေ့လာသူတစ်ဦးက ဆိုသည်။
၄င်းက “အာရှလမ်းကို တော်လှန်ရေးအဖွဲ့က ၇၀ ရာခိုင်နှုန်းထိ ထိန်းချုပ်ထားပြီး စစ်ကောင်စီဘက်က သံလွင်မြစ်ကမ်းတလျှောက် စစ်သင်္ဘောများချထားကာ ခံစစ်ပြင်ဆင်မှုတွေ မြှင့်တင်နေတယ်”ဟု ပြောသည်။
ကျုံဒိုးမြို့အတွင်းရှိ ခမရ(၅၄၅)၊ ဂျိုင်းတံတားစစ်ဆေးရေးဂိတ်၊ ရိုးမဟာနှင့် ကျားကလေးရွာတစ်ဝိုက်တွင် စစ်ကောင်စီတပ်အင်အားများ တပ်စွဲနေရာယူထားကြောင်း ဒေသခံများက ပြောသည်။
တချို့နေရာများတွင် KNLA ဦးဆောင်သော တော်လှန်ရေးအဖွဲ့များက အင်အားကြီးစွာဖြင့် စစ်ကောင်စီတပ်အပေါ်တိုက်ခိုက်နေခြင်းကြောင့် နှစ်ဖက်အကြား တိုက်ပွဲ ပြင်းထန်လာသည်။
ထို့အပြင် ခွဲထွက် DKBA တပ်ဖွဲ့သည်လည်း စစ်ကောင်စီဘက်တွင် ရပ်တည်ကာ လှိုင်ဝဂိတ် ၉ တိုင်ဂိတ်အပါအဝင် နေရာတချို့တွင် တပ်စွဲထားပြီး ကူညီတိုက်ခိုက်ပေးနေသည်ဟု စစ်ရေးနီးစပ်သူများက ဆိုသည်။
တိုက်ပွဲအတွင်း စစ်ကောင်စီတပ်၏ လေကြောင်းနှင့် လက်နက်ကြီးပစ်ခတ်မှုကြောင့် ဒေသခံပြည်သူ ၂၀ ကျော် သေဆုံးခဲ့ပြီး ၃၀ နီးပါး ဒဏ်ရာရရှိထားသည်။
အခြေအနေမှ ကြောင့် ဒေသခံပြည်သူအင်အား သောင်းချီ ထွက်ပြေးတိမ်းရှောင်နေရပြီး လူသားချင်းစာနာမှုအကူအညီများ လိုအပ်ဆဲဖြစ်သည်ဟု စစ်ရှောင်အရေးကူညီနေသော အရပ်ဖက်အဖွဲ့များက ပြောကြားသည်။
ထို့ပြင် ကျုံဒိုးအနောက်ဘက်ရှိ မွန်လူမျိုးရွာကြီးများဖြစ်သော ကော့ကျိုက်၊ ကမ်းနီနှင့် သရက်တောတို့မှ ပြည်သူများသည် မော်လမြိုင်နှင့် ကော့ဘိန်းဒေသများသို့ လူထောင်နှင့်ချီ၍ ရွှေ့ပြောင်းနေကြသည်ဟု သတင်းရရှိသည်။
