“ငလျင်က သက်သေပြနေတဲ့ အကျင့်ပျက်ခြစားမှုရဲ့ ဆိုးမွေဒဏ်ရာ”
မတ်လ ၂၈ ရက် ငလျင်မှာ ပြိုကျပျက်စီးခဲ့တဲ့ အဆောက်အဦတွေကို စိစစ်တဲ့အခါ ဆောက်လုပ်ရေး ပိုင်းဆိုင်ရာ တာဝန်ရှိသူတွေက သတ်မှတ် စံချိန်စံညွှန်းတွေအတိုင်း မဆောက်ခဲ့တာကြောင့် ပေးဆပ်မှု ကြီးမားခဲ့တယ်လို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ထုတ်ဖော်ပြောလာပါတယ်။
နေပြည်တော်က ပြည်သူ့ဆေးရုံကြီး (ခုတင် ၃၀၀) ဆေးကုသဆောင်နဲ့ ဝန်ထမ်းအိမ်ရာတွေမှာ ငလျင်ဒဏ် ကြောင့် ထိခိုက်ပျက်စီးတဲ့အခြေအနေတွေကို ဧပြီ ၈ ရက်မှာ သွားရောက် စစ်ဆေးချိန်မှာ သူက အခုလိုပြော လိုက်တာပါ။
နေပြည်တော်က အရေးကြီးအဆောက်အအုံတွေ (ဆေးရုံတွေ၊ ရုံးတွေ) ပြိုကျပျက်စီးသွားတာ စစ်ခေါင်းဆောင် ကိုယ်တိုင် “အရင်စစ်အစိုးရတွေက စံနဲ့မညီဘဲ ဆောက်လုပ်ခဲ့လို့” လို့ ဝန်ခံလိုက်ပါတယ်။
ဒါဟာ စစ်အုပ်စုရဲ့ အုပ်ချုပ်မှုအလွဲတွေကို သူကိုယ်တိုင် ဝန်ခံလိုက်တာပါ။ ဆေးရုံ၊ ကျောင်း၊ ရုံးတွေဆောက်တဲ့အခါ “အကျင့်ပျက်လာဘ်စားမှု” တွေရဲ့ ဆိုးမွေဒဏ်ရာဒဏ်ချက်တွေကို ငလျင်က ဖော်ထုတ်လိုက်တာပါပဲ။
“အရင်တုန်းကဆောက်တာတွေ မကောင်းဘူး” လို့ ပြောနေသလို အခုလက်ရှိစစ်ကောင်စီလည်း ဒီလိုမျိုး အကျင့်ပျက်ခြစားမှု အဆိုးသံသရာ လည်နေတဲ့ကြားမှာ အဆောက်အအုံတွေကို ထိန်းသိမ်းဖို့၊ ပြင်ဆင်ဖို့ မှားယွင်းနေတဲ့ စနစ်ကြီးကို ပြုပြင်ပြောင်းလဲတာမျိုး ဘာမှမလုပ်ခဲ့ဘူးဆိုတာ မေ့ထားလို့မရဘူး။
“ငလျင်ကြီးက ဘယ်သူ့အပြစ်ကို ဖော်ပြနေသလဲ”
ငလျင်က နှစ် ၆၀ အတွင်း စစ်အုပ်စုတွေရဲ့ အုပ်ချုပ်မှုညံ့ဖျင်းပုံကို အတိအကျပြနေတယ်။
အရင်စစ်အစိုးရတွေ (ဗိုလ်နေဝင်း၊ ဗိုလ်သန်းရွှေ) သူတို့လက်ထက်က ဆောက်တဲ့အဆောက်အအုံတွေဟာ ငွေကြေးချွေတာဖို့အမည်ခံပြီး လာဘ်စားမှုနဲ့ ဆောက်တာပါ။ ဥပမာ— ၂၀၀၈ ခုနှစ်က နေပြည်တော်မှာ အလျင်အမြန်ဆောက်ခဲ့တဲ့ အဆောက်အအုံတွေကို ကြည့်ပါ။
အခုစစ်ကောင်စီကလည်း ၂၀၂၁ မှာ အာဏာသိမ်းပြီးနောက် ဆေးရုံ၊ လမ်း၊ တံတားတွေ ပြင်ဆင်မှုမရှိတော့ဘဲ စစ်ရေးကိုပဲ အဓိကထားနေတယ်။ ဒါကြောင့် ငလျင်နဲ့တဲ့အခါ ပြိုလဲမှုတွေ ပိုဆိုးသွားတာ။
“အရင်တုန်းကမကောင်းဘူး” ဆိုပြီး အပြစ်တင်နေသလို အခုလက်ရှိစစ်ကောင်စီလည်း ဒီအတိုင်းပဲ ဆက်ဖြစ်နေဦးမယ်။
“စစ်ကောင်စီရဲ့ ဂုဏ်သိက္ခာ ပြိုလဲမှု”
စစ်ကောင်စီရဲ့ ဧပြီလ ၈ ရက် ညနေပိုင်း ထုတ်ပြန်ချက်အရ ငလျင်ကြောင့် သေဆုံးသူ ၃,၆၄၅ ယောက်ရှိပြီး ဒဏ်ရာရရှိသူ ၄,၈၀၀ နဲ့ ပျောက်ဆုံးသူ ၁၆၀ ရှိနေပါတယ်။
အရပ်သားအစိုးရတွေရုံးစိုက်ခဲ့ပြီး လက်ရှိ စစ်ကောင်စီရဲ့ အုပ်ချုပ်ရေးယန္တရား ဗဟိုချက်ဖြစ်တဲ့ နေပြည်တော်မှာ သမ္မတအိမ်တော်အပါအဝင် လွှတ်တော်အဆောက်အဦ၊ ဝန်ကြီးဌာနတွေရဲ့ အဆောက်အဦ၊ တရားလွှတ်တော်ချုပ်တို့မှာ ငလျင်ကြောင့် ထိခိုက်ပျက်စီးတာတွေရှိခဲ့ပါတယ်။
ဒါပေမဲ့ စစ်ကောင်စီကတော့ ငလျင်ကြောင့် နေပြည်တော်က အပျက်အစီးအတိုင်းအဆ ဘယ်လောက်အထိ ကြီးမားခဲ့တယ်ဆိုတာကို ငလျင်လှုပ်ခတ်ပြီး သီတင်းနှစ်ပဲထဲ ဝင်လာတဲ့အချိန်အထိ တိတိကျကျ ထုတ်ပြန် တာမရှိသေးပါဘူး။
နေပြည်တော်က သမ္မတအိမ်တော်၊ လွှတ်တော်ရုံး၊ ဆေးရုံတွေ ပြိုကျတဲ့အခါ စစ်ကောင်စီက အပျက်အစီးပမာဏကို ကနဦးမှာ ဖုံးကွယ်ခဲ့တယ်။
သေဆုံးသူ ၃,၆၀၀ ကျော်၊ ဒဏ်ရာရ ၄,၈၀၀ ကျော်ဆိုတဲ့ စာရင်းကို ငလျင်ဖြစ်ပြီး ရက်သတ္တပတ်တစ်ပတ်အလွန် နှစ်ပတ်ထဲဝင်လာတောမှ ထုတ်ပြန်လာပါတယ်။ ဒါဟာ စစ်ကောင်စီရဲ့ အုပ်ချုပ်ရေးညံ့ဖျင်းမှုနဲ့ ပြည်သူ့အသက်ကို အလေးမထားမှုကို ပြသနေတယ်။
“မြန်မာပြည်က Failed State ဖြစ်သွားမလား”
ငလျင်က မြန်မာနိုင်ငံ “ပြိုလဲဖို့နီးနေပြီ” ဆိုတဲ့ အချက်တွေကို မီးမောင်းထိုးပြနေတယ်။ ငလျင်ဒဏ်သင့်တိုင်းနဲ့ပြည်နယ်တွေ စုပေါင်းစာရင်းမှာတော့ စစ်ကိုင်းတိုင်းကို ဗဟိုပြုပြီး လှုပ်ခတ်သွားတဲ့ စစ်ကိုင်းပြတ်ရွေ့ကြော ငလျင်ကြောင့် လူနေအိမ်ပေါင်း ၅၀,၀၀၀ နီးပါး၊ ဘုန်းတော်ကြီးနဲ့ သီလရှင်ကျောင်း ပေါင်း ၃,၀၀၀ ကျော်၊ စာသင်ကျောင်း ၂,၀၀၀ ကျော်၊ ဌာနဆိုင်ရာရုံး ၂,၁၀၀ ကျော်၊ တံတား ၁၄၈ စင်း၊ ဘုရားစေတီ ၅,၀၀၀ ကျော် ထိခိုက်ပျက်စီးခဲ့တယ်လို့ စစ်ကောင်စီက အခုကျမှ ထုတ်ပြန်လာပါတယ်။
စီးပွားရေးပြိုလဲမယ်- ငလျင်ကြောင့် လမ်း၊ တံတား၊ ကျောင်း၊ ဆေးရုံတွေ ပျက်စီးတာက နိုင်ငံတွင်းစီးပွားရေးကို ထပ်ပြီးထိခိုက်စေမယ်။
နိုင်ငံရေးမတည်ငြိမ်မှု- တိုင်းရင်းသားလက်နက်ကိုင်အဖွဲ့အစည်း EROs, NUG, PDF တို့နဲ့ စစ်ကောင်စီတိုက်ပွဲတွေကြောင့် အစိုးရယန္တရား လုံးဝပြိုလဲသွားနိုင်တယ်။
ဗင်နီဇွဲလားနိုင်ငံလို ငွေကြေးပြိုလဲ၊ အစိုးရပျက်စီးသွားတဲ့နိုင်ငံ ဖြစ်မသွားဖို့ စနစ်တကျပြုပြင်ပြောင်းလဲမှု လိုအပ်နေပြီ။
“ငလျင်က သတိပေးလိုက်တဲ့အချက်”
ငလျင်ဟာ စစ်အုပ်စုတွေရဲ့ အုပ်ချုပ်မှုညံ့ဖျင်းပုံကို ထင်ရှားစွာ ဖော်ပြနေတယ်။ ဗိုလ်ချုပ်မှူးကြီး မင်းအောင်လှိုင်က “အရင်တုန်းကဆောက်တာတွေ မကောင်းဘူး” လို့ပြောပေမယ့် အခုလက်ရှိစစ်ကောင်စီလည်း ဒီလိုမျိုး အဆောက်အအုံတွေကို မပြင်ဆင်ခဲ့ဘူး။
နိဂုံးအဆုံးသတ်စကားအနေနဲ့ “စစ်အုပ်စုတွေရဲ့ အကျင့်ပျက်ခြစားမှုက မြန်မာနိုင်ငံကို ပျက်စီးစေနေတယ်။ ဒီအတိုင်းဆိုရင် နိုင်ငံတစ်ခုလုံး Failed State အဖြစ် ရောက်သွားမှာပဲ။” လို့ သုံးသပ်လိုက်ပါတယ်။
