ရန်ကုန်- ၂၀၂၅ ဖေဖေါ်ဝါရီ(၁)
နိုင်ငံခြားတိုင်းပြည်များသို့ တရားဝင်သွားရောက်အလုပ်လုပ်ကိုင်ရာမှာ မရှိမဖြစ်လိုအပ်သည့် ပြည်ပအလုပ်အကိုင် အလုပ်သမား သက်သေခံကတ် (Overseas Worker Identification Card- OWIC) မထုတ်ပေးတော့သဖြင့် စာချုပ်ချုပ်ပြီး အလုပ်လုပ်ကိုင်မည့်သူများ အခက်တွေ့နေကြောင်း သိရသည်။
စစ်ကောင်စီ အလုပ်သမားဝန်ကြီးဌာနက အဆိုပါ OWIC ကတ်စနစ်ကို ကျင့်သုံးလာခဲ့ပြီး ယခုအခါ ကြိုတင်အကြောင်းကြားခြင်းမရှိဘဲ အသက် ၁၈ နှစ်မှ ၃၅ နှစ်အထိ စစ်မှုထမ်းအရွယ်အကြုံးဝင်သည့် လူငယ်များကို ထုတ်မပေးတော့ကြောင်း ပြည်ပအလုပ်သမားရှာဖွေရေးအေဂျင်စီထံက သိရသည်။
“အသက်ကန့်သတ်ချက်ထဲပါတဲ့သူတွေကို စာချုပ်မချုပ်ပေးတော့ဘူး၊ ထားပါတော့၊ ခုဟာက စာချုပ်ချုပ်ပြီးသာ လူတွေကိုပါ အိမ်ပြန်လွှတ်နေတယ်၊နောက်ပြီတော့ ပြည်ပကနေ ခွင့်နဲ့ပြန်လာသူတွေကိုလည်း အသက် ၁၈- ၃၅ ထဲဆို OWIC ကတ် မရိုက်ပေးတော့ဘူး၊ အချိန်တွေ ငွေတွေ အများကြီးဆုံးရှုံးရပြီ ” ဟု လိုင်စင်ရအေဂျင်စီတာဝန်ရှိသူ တစ်ဦးက ပြောကြားသည်။
ပြည်သူ့စစ်မှုထမ်းနည်းဥပဒေပုဒ်မ ၅၁ အရ စစ်မှုထမ်းဖို့ဆင့်ခေါ်သည့် အမိန့်စာရရှိသူအနေဖြင့် ဗဟိုအဖွဲ့၏ ခွင့်ပြုချက်မရှိဘဲ ပြည်ပနိုင်ငံကို ထွက်ခွာခွင့်မရှိစေရဟု ပြဋ္ဌာန်းထားခြင်းဖြစ်ပြီး ဆင့်ခေါ်စာမရသေးဘဲ ပြည်ပထွက်ခွင့်မပေးခြင်းက အမှန်တကယ် အလုပ်သွားရောက်လုပ်ကိုင်ကြမည့်သူများအတွက် အခက်အခဲများစွာဖြစ်ပေါ်နေကြောင်း မုဒုံမြို့နယ်မှ လူငယ်တစ်ဦးက ပြောကြားသည်။
“နှစ်နဲချီပြီးနေလာတဲ့ ခြံမြေကိုရောင်း၊ ရှိတာတွေပေါင်ပြီး သင်တန်းတက်၊ နိုင်ငံခြားထွက်ဖို့လည်း အဆင်သင့်ဖြစ်ရော ခုလိုကြုံရတော့ ဘာနဲ့အလုပ်ဆက်ရမလဲ၊ အေဂျင်စီကတော့ တစ်ချက်စောင့်ပေးပါလို့တော့ ပြောပါတယ်၊ အချို့ဆို လက်မှတ်တောင်ဖြတ်ပြီးမှ ခုလိုဖြစ်တော့ အတော်ခံစားနေရတဲ့သူတွေရှိတယ်၊ တရားဝင်ပြည်ပထွက်သူတွေလည်း နိုင်ငံတော်အတွက် ငွေရှာပေနေကြတာပဲလေ၊ တလောကလည်း တူမတစ်ယောက် လေဆိပ်ကနေ pv နဲ့သွားတာ ပြန်လွှတ်လို့ လက်မှတ်ရော ဟိုတယ်ဘွတ်ကင်ရော ဆုံးခဲ့ရပြီးပြီ” ဟု ပြည်သူတစ်ဦးက ပြောကြားသည်။
ပြည်သူ့စစ်မှုထမ်းနည်းဥပဒေ အခန်း ၅ အရ စစ်မှုထမ်းခြင်း မှ ကင်းလွတ်ခွင့်/ ကာလလျှော့ပေါ့ခွင့်/ ကာလရွှေ့ဆိုင်းခွင့်များလျှောက်ထားနိုင်ပြီး ဗဟိုအဆင့်အထိ အဆင့်လိုက်စိစစ်သွားမည်ဖြစ်ကြောင်း ဆိုထားသည်။
See insights and ads
All reactions:
6767
