ထိုင်းတွင် တရုတ်နိုင်ငံသူတစ်ဦး ထပ်မံပျောက်ဆုံးနေပြီး ရဲတပ်ဖွဲ့ထံ မိဘများလာရောက်တိုင်ကြား

ဘန်ကောက်-၂၀၂၅ ဇန်နဝါရီ (၁၀)

ထိုင်းနိုင်ငံအတွင်း အသက် ၂၁ နှစ်အရွယ် တရုတ်နိုင်ငံသူ မစ္စ Wu Jiaqi ပျောက်ဆုံးနေပြီး လူကုန်ကူးခံရမည်ကိုစိုးရိမ်သဖြင့် ရှာဖွေပေးရန် မိဘများက ဇန်နဝါရီ ၈ ရက်နေ့က ထိုင်းရဲတပ်ဖွဲ့ထံ တိုင်ကြားထားကြောင်း Khaosod English သတင်းက ဖော်ပြသည်။

တရုတ်မင်းသား Wang Xing ကဲ့သို့ လူကုန်ကူးသူများ၏ သားကောင်ဖြစ်မည်ကို စိုးရိမ်သဖြင့် မစ္စ Wu Jiaqi ၏ ဖခင်ဖြစ်သူ မစ္စတာ Weidong ကိုယ်တိုင် လာရောက်၍ သုဝဏ္ဏဘူမိလေဆိပ် ရဲစခန်းနှင့် ခရီးသွားရဲများကို တိုင်ကြားခဲ့သည်။

မကြာသေးမီက ကောလိပ်ဘွဲ့ရခဲ့သည့် မစ္စ Wu Jiaqi သည် လူမှုကွန်ယက်မှတဆင့် တစ်လကြာခန့်က သိကျွမ်းခဲ့သည့် တရုတ်သူငယ်ချင်းတစ်ဦးနှင့်အတူ မိဘများမသိရှိစေဘဲ ဇန်နဝါရီ ၆ ရက်နေ့က ထိုင်းနိုင်ငံသို့ ပထမဆုံးအကြိမ် လာရောက်လည်ပတ်ခဲ့ခြင်းဖြစ်ကြောင်း၊ Don Mueang ဒေသရှိ ဟိုတယ်တခု၌ တည်းခိုမည်ဖြစ်ကြောင်း၊ we chat မှတဆင့် မိခင်ထံသို့ သူမ၏တည်နေရာနှင့် အစီအစဉ်များ ပေးပို့ခဲ့ကာ ညနေပိုင်းတွင် အဆက်အသွယ်ပြတ်တောက်သွားကြောင်း၊ လူကုန်ကူးခြင်းခံရမည်ကို စိုးရိမ်ရသောကြောင့် မစ္စ Wu Jiaqi ၏ ဖခင်ဖြစ်သူ က ထိုင်းနိုင်ငံသို့လာရောက်ကာ ထိုင်းရဲတပ်ဖွဲ့ထံ လာရောက်တိုင်ကြားခဲ့ခြင်း ဖြစ်သည်။

သို့ရာတွင် CCTV အချို့ အလုပ်မလုပ်သဖြင့် ထိုင်းရဲတပ်ဖွဲ့အနေဖြင့် စစ်ဆေးမှုများအခက်အခဲဖြစ်နေကြောင်း၊ ဟိုတယ်မှ CCTV များကိုခြေရာခံကာ အသေးစိတ်စစ်ဆေးနေကြောင်း သိရသည်။

တရုတ်မင်းသား Wang Xing လူကုန်ကူးခံရမှုဖြစ်စဉ်ကြောင့် ထိုင်းနိုင်ငံ၏ ခရီးသွားလုပ်ငန်းထိခိုက်မှုကို ကာကွယ်ရန်အတွက် ထိရောက်စွာ စီမံခန့်ခွဲမည်ဟု ဝန်ကြီးချုပ် Shinawatra က ထုတ်ဖော်ပြောဆိုထားပြီး ယခုအခါ တရုတ်နိုင်ငံသူတစ်ဦး ထပ်မံပျောက်ဆုံးခဲ့ခြင်းလည်း ဖြစ်သည်။

Photo-မိဘများက ထိုင်းရဲအရာရှိများအား တွေ့ဆုံရှင်းပြစဥ်။