တန်းတူညီမျှမှုဟု ဆိုရာဝယ်

လူ့ဘောင်လောက၌ လူသားတို့၏ လိင်ဖြစ်တည်မှုကို ရုပ်ပိုင်းဆိုင်ရာ အဖြစ်သော်လည်းကောင်း၊ စိတ်ပိုင်းဆိုင်ရာ အဖြစ်သော်လည်းကောင်း ခွဲခြားသတ်မှတ်လာကြသည်။ ထိုသတ်မှတ်မှု နှစ်ခုစလုံးကို လက်ခံကျင့်သုံးကြသလို လက်မခံ နိုင်သည့် လူ့အသိုင်းအဝိုင်းများလည်း ရှိနေဆဲ ဖြစ်သည်။ ဖြစ်တည်မှု ခံယူချက်ကို လွတ်လပ်ခွင့် ပေးထားသည်ဟု ဆိုပေမဲ့ လိင် ကွဲပြားချက်တွင် မ, လိင်သည် ဖို, လိင် ထက် အောက်ကျသည့် လူမှုအမြင်များမှာ တည်ရှိ နေကာ ဥပဒေမဲ့ စော်ကား ပိုင်ခွင့်၊ ပြောဆိုပိုင်ခွင့်၊ နိှမ့်ချ ပိုင်ခွင့်များကို အမျိုးသား ဖိုလိင် တို့တွင် စွဲထင် သတ်မှတ်နေဆဲ ဖြစ်သည်။ ထို ထင်မှတ် ဆွဲယူချက်များသည် ယဉ်ကျေးမှု၊ ထုံးတမ်းဓလေ့ အဖြစ် ရောချ၍ အကာအကွယ်ယူကာ ရုပ်၊ စိတ် အရ ခံယူထားသော မ, လိင် များကို ပေါ်ပေါ်ထင်ထင် နှိမ့်ချ စော်ကားမှု များသည် ယနေ့ခေတ် ဆိုရှယ်မီဒီယာများကို အသုံးချ၍ မြန်မာနိုင်ငံ အသိုင်းအဝိုင်း၌ ပိုမို များပြားလာသည်ကို တွေ့ရပြီး ထိုသို့ ဖြစ်စဉ်များကို လူ့အဖွဲ့အစည်းအတွင်း မပြုမူရန် တားမြစ်ချက်များမှာ အစိုးရ သော်လည်းကောင်း လူထုသော်လည်းကောင်း ပျက်ကွက်နေကြသည်။

မိမိ၏ တသီးပုဂ္ဂလ အမြင်၊ ပုတ်ခတ်ချက်၊ စော်ကားချက်၊ မနာလိုချက်၊ ဒေါသအမျက်များကို ဆိုရှယ်မီဒီယာ သုံး၍ ဖော်ပြပိုင်ခွင့် ရှိသည်ကို အကြွင်းမဲ့ ယုံကြည်ပါသည်။  လူ့ သဘာဝအလျောက် ပိတ်ပင်တားဆီး ပိုင်ခွင့်မရှိသော်လည်း ပုတ်ခတ် စော်ကားသည့် အမုန်းစကားများကို ကာကွယ်ပိုင်ခွင့်၊ တရားစွဲ ပိုင်ခွင့်လည်း ရှိနေရမည်။ ယင်းသို့ လူမှုယဉ်ကျေးမှု ဓလေ့များ ပွင့်လင်း မြင်သာသော လူ့အဖွဲ့အစည်းကို ထူထောင်လာနိုင်ရမည်။  ထိုသို့မဟုတ်ဘဲ လူ့ဖြစ်စဉ် ရုပ်၊ နာမ် သဘာဝ ဖြစ်တည်မှုကို သွေဖယ်နေခြင်းအား တော်လှန်နေရမည်။  

လိင်ဖြစ်တည်မှုအရ အမျိုးသမီး၊ မိန်းမ၊ မိန်းမလျာ၊ ဇနီး၊ မိခင်၊ မွေးစားအမေ၊ နိုင်ငံဝန်ထမ်း အမျိုးသမီး၊ ရဲမေ၊ စစ်သမီး၊ အိမ်ထောင်သည် ၊ သမီး၊  ဘုရားတကာမ၊ လိင်ဖြေဖျော်သည့်သူ စသည့် အလုပ်ခွင်၊ လုပ်ငန်း၊ စိတ်ဝင်စားမှု နယ်ပယ်အလိုက် ရုပ်သွင်၏ လိင် ဖြစ်တည်မှုကို ခွဲ၍သော်လည်းကောင်း စိတ်ပိုင်းဆိုင်ရာ တိမ်းညွှန်နေသူတို့၏ ရုပ်အရ၊ စိတ်အရ မ,လိင်ရှိသူများကို ဖို,လိင်ရှိသူများမှ စော်ကား အပုတ်ချမှုများသည် ၂၀၂၃-၂၀၂၄ကာလအတွင်း ခေတ်နည်းပညာကို လွဲမှားစွာ အသုံးချ၍ မိမိတို့၏ အများပိုင် ဖိုဝါဒ၊ တစ်သီးပုဂ္ဂလ စော်ကားမှု၊ တကိုယ်ရေ ဆန္ဒအလျောက် ပုတ်ခတ်မှု၊ ကိုယ်ထိလက်ရောက် ပြစ်မှားခြင်း၊ စောင်းမြောင်း၍ ရေးသားခြင်း၊ အတိအလင်း အပုပ်ချခြင်း၊ အမုန်းစကား ပြောကြားခြင်း စသည့် အပြုအမူ များကို အွန်လိုင်းမှ တဆင့် ဖြန့်ဝေ ပြုလုပ်လာကြသည်။ ထိုသို့ ပြုမှုခြင်းသည် လူသား ဂုဏ်သိက္ခာကို ပျက်ရယ်ပြု ခြင်း ဖြစ်သည်ကို သတိမထားမိဘဲ လူ့အဖွဲ့အစည်း၏ စော်ကားပိုင်ခွင့်၊ ဖို, လိင်တို့၏ လုပ်ပိုင်ခွင့် အဖြစ် မှတ်ယူ နေကြသည်။ ဆိုးဝါးလွန်းသည်။ လူအဖွဲ့အစည်း တန်းတူညီမျှရေး တည်ဆောက်မှုအတွက်လည်း အဟန့်အတားဖြစ်သည်။

ထိုသို့ နောက်ခံ အခြေအနေများတွင် ဖိုဝါဒ ကြီးစိုး၍ အမြစ်ပြတ်နိုင်ရန် ကြိုးစားမှု အရာမထင်နေသော မြန်မာနိုင်ငံတွင် မတူညီသော ခံယူချက်၊ ယူဆချက်၊ သဘောထား၊ ဓလေ့များမှ ဖောက်ထွက်၍ လူမှုအဖွဲ့အစည်းကြား သဟဇာတဖြစ်တည်မှုနှင့် ပဋိပက္ခကို ဟန့်တားနေသည့် ဖြစ်စဉ်မှာ ဆိုရှယ်မီဒီယာကို တလွဲ အသုံးချ၍ အမျိုးသမီးများကို သတင်းတု၊ သတင်းအမှား၊ အမုန်းစကား ဖြန့်ဝေ၍ တိုက်ခိုက်ခံရမှု၊ ခွဲခြားခံနေရမှုသည် တားမရ၊ ဆီးမရ သကဲ့သို့ ဖြစ်ပွားနေသည်။ ၂၀၂၁ မှ ၂၀၂၄ နိုင်ငံတော်အာဏာအား တပ်မတော်မှ ဝင်ရောက် စွက်ဖက်သည့် ကာလအတွင်း အထက်ပါ အချက်များ ပိုမို များပြားလာသည်ကို လေ့လာနိုင်ပါသည်။ လူ့အဖွဲ့အစည်းများကြား သဟဇာတ ဖြစ်တည်မှုနှင့် ပဠိပက္ခများ၊ သတင်းတု၊ သတင်းအမှားများ ထပ်မံ မပေါ်ပေါက်စေရန်အတွက် ဖြစ်ရပ်အခြေအနေများကို လူမှုယဉ်ကျေးမှု ထိန်းညှိရေး အစီအစဉ်အနေဖြင့် လေ့လာစောင့်ကြည့်ရန် အရေးကြီးကိစ္စရပ် ဖြစ်ကြောင်း ထင်မြင်ယူဆပါသည်။

ထိုကြောင့် အထက်တွင် ဖော်ပြခဲ့သည့် နောက်ခံအခြေအနေများနှင့် တန်းတူညီမျှသည့် လူမှုယဉ်ကျေးမှုဓလေ့သစ်တရပ် ထွန်းကားဖြန့်ပွားလာရေးကို တားဆီး ပိတ်ပင်နေသည့်  သတင်းတု၊ သတင်းအမှားဖြင့် အမျိုးသမီးထုအပေါ် တိုက်ခိုက်နေသည့် ဖြစ်ရပ်များအကျဉ်း အချို့ကို တင်ပြပါမည်။ မျောက်တစ်ကောင်အား ရေချိုးပေးနေသော ရုပ်သံတွင် မျောက်၏မျက်နှာ နေရာ၌ ဒေါ်အောင်ဆန်းစုကြည်၏ မျက်နှာအား ထည့်သွင်းထားသောကြောင့် လူအဖြစ်မှ နှိမ့်ချတိုက်ခိုက်ထားခြင်း၊ ဒေါ်အောင်ဆန်းစုကြည်အား သာသနာကို ညစ်ညမ်းအောင် လုပ်ဆောင်နေပြီး ကြက်မတွန်တိုင်း မိုးမလင်းဘူး၊ ကြက်ဖတွန်မှ မိုးလင်းကာ တိုင်းပြည်သာသနာ သန့်ရှင်းစေသည်ဟု လူအဖြစ်မှ နှိမ့်ချ စော်ကားထားခြင်း၊ ဒေါ်အောင်ဆန်းစုကြည်အား အင်္ဂလိပ်နဲ့ယူပြီး မြန်မာပြည်က လူထုခေါင်းဆောင်ဖြစ်သွားပြီး သားတို့သမီးတို့လည်း အင်္ဂလိပ်လိုကောင်းကောင်း မှုတ်နိုင်ဖို့ ဖွားဖွားလို အင်္ဂလိပ်နဲ့ တညလောက် အိပ်လိုက်ရင် Yes or No တတ်သွားလိမ့်မယ်၊ သမီးတို့လည်း ဖွားဖွားလို ခေါင်းဆောင်ဖြစ်ချင်ရင် အင်္ဂလိပ်မယားလုပ်ရမယ်ဟု ဒေါ်အောင်ဆန်းစုကြည် အပေါ် လိင်ပိုင်းဆိုင်ရာ စော်ကားရေးသားထားခြင်း၊ ဒေါ်အောင်းဆန်းစုကြည်အား တစ်တောင်မချ ဖင်‌ထောင်ပြပြီး ကန်တော့သည်မှာ အစ္စလာမ် ဝတ်ပြုနည်းဖြင့် ဝတ်ပြုနေသည်ဟု လိင်ပိုင်ဆိုင်ရာစော်ကားသည့် အပြင် ဘာသာရေးစော်ကားနှိုင်းယှဉ်ခြင်း၊ ငတက်ပြားခိုးတာ နိုင်ငံကျော်ပြီး ဘုရားတည်ကာ၊  NLD မဲခိုးတာ ကမ္ဘာကျော်ကာ ဘာသာ သာသနာ စော်ကားခံရပြီး ဘုန်းကြီးများ အသတ်ခံရသည်ဟု အပြစ်သားအဖြစ် ပုံဖော်တိုက်ခိုက်ထားခြင်း၊ အောက်ခြေစစ်သားများ၏ မိန်းများဖြစ်သူများနှင့် သမီးဖြစ်သူများအား ၎င်းတို့၏ မိန်းမဖြစ်တည်မှုအား လိင်ပိုင်းဆိုင်ရာ စော်ကားထားခြင်း၊ စစ်သားမယားများ/ဗိုလ်ကတော်များ ခင်ပွန်းနှင့် အတူနေရချိန်နည်းပါး၍ တိတ်တိတ်ပုန်း ကြားကားဆွဲနေကြရသည် ဟု စစ်သားမယား/ဗိုလ်ကတော်များ၏ လိင်ပိုင်းဆိုင်ရာနှင့် ပတ်သက်ပြီး စော်ကားခြင်း၊ သာသနာရေးဝန်ကြီးဟောင်း သူရဦးအောင်ကို ဇန်နဝါရီလ ၄ရက်နေ့တွင် လွတ်ငြိမ်းချမ်းသာခွင့်ဖြင့် လွတ်မြောက်လာသည်နှင့် ဆက်စပ်၍ ၎င်း၏ သမီးဖြစ်သူ နှင်းစံပယ်အောင်အား ရိုင်းစိုင်းသော အရေးအသားများဖြင့် အမျိုးသမီးဖြစ်တည်မှုအား လိင်ပိုင်းဆိုင်ရာ တိုက်ခိုက်ရေးသားထားခြင်း၊  တောထဲမှာ ရောက်ရှိနေသော pdf မိန်းကလေးများအား မဲဆောက်ဆေးရုံတွင် ကိုယ်ဝန်ဆောင်တွေ နေ့စေ့လစေ့တွေ တန်းစီနေပြီး တော်လှန်ရေးအောင် မအောင်တော့မသိဘူး၊ ဇီးတွေအောင်ကုန်ပြီဟု မဟုတ်မမှန်ရေးသား၍ အမျိုးသမီးများအပေါ် လိမ်ပိုင်းဆိုင်ရာ တိုက်ခိုက်ထားခြင်း၊ စစ်သားလောက ၌  သေဆုံးသွားသော စစ်သား၏ မိန်းမအား မဲနှိုက်ရွေးချယ်နေသော ပုံစံ သရုပ်ဖော်ကာတွန်းရေးဆွဲထားပြီး စစ်သားများ၏ မိန်းမများအား လိင်ပိုင်းဆိုင်ရာ တိုက်ခိုက်ထားခြင်း၊ အဆိုတော်ချစ်သုဝေ နှင့် ခေတ်သစ်သတင်းထောက် သာလွန်ဇောင်းထက် တို့သည် ဘန်ကောက် ဟိုတယ်တစ်ခုတွင် ချိန်းတွေ့နေသည်ဟု မဟုတ်မမှန်ပြောဆို သတင်းတု ဖန်တီးခြင်း  ၊ ပန်ကိတ်ဒါဒါဆိုသည့် အမျိုးသမီးနှင့် နိုင်ငံခြားသား အမျိုးသားတဦး တွဲလျက်ပုံတင်ထား၍ ဒေါ်စုလိုမျိုး နိုင်ငံခြားသားနဲ့ တော်တော်လှန်နေပြီဟု ရေးထားပြီး အမျိုးသမီးဘဝဖြစ်တည်မှုကို တိုက်ခိုက်ခြင်း ၊ ပုဝါခြုံထားသည့် အမျိုးသမီးတဦးပုံ တင်၍ ဗုဒ္ဓဘာသာအမျိုးသမီးများသည် ငွေ၊ စိတ်ခံစားချက်ကြောင့် ဘာသာခြားကို လင်တော်ပြီး မိမိဂုဏ်သိက္ခာကို ချနေသည်ဟု သတင်းအမှား လွှင့်ကာ အစ္စလာမ်ဘာသာဝင် ထုံးဓလေ့ကို တလွဲ ဆံပင်ကောက်၍ မွတ်ဆလင်ဖြစ်တည်မှုအပေါ် စော်ကားနှိမ့်ချခြင်း၊  အမျိုးသမီးများအနေဖြင့် လူမျိုးခြား ဘာသာခြားများနှင့် အိမ်ထောင်မပြုခြင်းဖြင့် မြန်မာစစ်ဖြစ်ကြောင်း ဂုဏ်ယူပါ မျက်လုံးတွေဖွင့်ကြ နားတွေစွင့်ကြဟု ဘာသာရေးသွေးထိုး လှုံ့ဆော်ထားခြင်း၊ ဗျူဟာအရ ဆိုပီး ကြူကြူလှ $ဖုတ်ကြီးတော့ ဟ မပေးနဲ့နော်၊ Drone ကြီးဝင်သွားလိမ့်မယ်ဟု ဒေါ်ကြူကြူလှ၏ အမျိုးသမီးဖြစ်တည်မှု့အပေါ် လိင်ပိုင်းဆိုင်ရာ စော်ကားတိုက်ခိုက်ခြင်း၊  ဒုရဲအုပ် ဂျက်မ လုပ်ကြံမှုနှင့် ပတ်သက်၍ “ပါကင်တစ်ခုမြေဩဇာဖြစ်” ဟု လိင်ပိုင်းဆိုင်ရာ စော်ကားထားခြင်း၊ ရခိုင်မတို့ ချေချက်ကတော့ မုတ်ဆိတ်တွေကို အိုးပင်းတူ ဒလဟော ဟုတ်မဟုတ် မချေမတို့အသိဆုံးဖြစ်မယ်ဟု ရခိုင်အမျိုးသမီးများအား လိင်ပိုင်းဆိုင်ရာ စော်ကားရေးသားထား ခြင်း၊ မန်းလေးတွင် ပန်းသပိတ်ပြုလုပ်သည့်အမျိုးသမီးများ အကြမ်းဖက်ဖမ်းဆီးခံရပြီး ၎င်းတို့၏ပုံများနှင့်အတူ ပထွေးတွေရဲ့ အစ်နေ့မှာ အသံမထွက်ရဲကြဘဲ အကြမ်းဖက်အားပေးပြီး ပန်းသပိတ်ပြုလုပ်တယ်ဟု ဆိုထားကာ နိုင့်ထက်စီးနင်းစော်ကားပြောဆိုထားခြင်းအပြင်

  သရုပ်ဆောင် ခိုင်သင်းကြည်အား ချီးမြှင့်ထားသည့် လူမှုထူးချွန်တံဆိပ်ကို မင်းအောင်လှိုင်က ပြန်လည်သိမ်းယူသည့်ဖြစ်စဉ်အား ဒေါ်အောင်ဆန်းစုကြည်၏ နိုဘယ်ဆုအား ပြန်လည်သိမ်းယူသည့်ဖြစ်စဉ်နှင့် ဥပမာ ပေး၍ ဘင်္ဂါလီမြည် ဒေါ်ခင်ကြည်သမီးဟု ရေးသားဖြန့်ဝေခြင်း၊  တပ်မတော်ကို အားပေးနေရသာ ဟိုဘက်ရပ်ကွက်က မုဆိုးမချဉ်ပေါင်ရိုးမ ဒုတ်ထိုးမသားသမီးတွေက လာပြီးဟောင်နေကြလို့ ငါတို့လည်း အတော်ဝဠ်ကြီးပါလားဟု စစ်ကောင်စီအား ဆန့်ကျင်သောသူများအား ခွေးနှင့်ခိုင်းနှိုင်းပြီး လူအဖြစ်မှ တိရိစ္ဆာန်အဖြစ် စော်ကားရေးသားထားခြင်း၊ လိင်တူဆက်ဆံခြင်းသည် အမျိုးဂုဏ်ဇာတိဂုဏ် ညှိုးနွမ်းစရာဟု လိင်တူချစ်သူများအား ပုံဖျက်တိုက်ခိုက် အမုန်းတရားဖြန့်ဝေခြင်း၊  ဦးကိုနီ၏ မိန်းမဖြစ်သူကို မမျှတဲ့မျိုးစောင့်ဥပဒေကို ဖျက်ချင်တယ်ဆိုပြီး အမုန်းစကားတွေ ပြောဆိုထားခြင်း၊ CDM လုပ်ထားသော ကျောင်းဆရာမဒေါ်နှင်းအိခိုင်အား NON CDM ပြန်လုပ်ပြီး ဒလန်ရှင်းလင်းရေး အကြမ်းဖက်အဖွဲ့များနှင့် ဆက်သွယ်မှုပြုလုပ်နေတယ်ဆိုပြီး လိပ်စာဖော်ပြ၍ အကြမ်းဖက်ရန်အားပေး လှုံ့ဆော်ထားခြင်း  ၊ တောခို pdf မတွေ အကုန်ဗိုက်ကြီးကုန်ပြီ တော်လှန်ရေးအကြောင်းပြ တောထဲမှာ မိတ်လိုက်တိုင်းကစားနေတာ ကြုံရာလူဝင်စားနေတာ၊ တောထဲမှာငတ်နေတာကြာပြီ သူတိုကြိုက်တာတွေ့ရင်ခေါ်အိပ်နေတာ ခုတော့ ဗိုက်ကြီးကုန်ပြီ ။ ဘယ်သူ့အဖေခေါ်ရမှန်းမသိဘူး။  စသည်ဖြင့် PDF အမျိုးသမီးများအား လိင်ပိုင်းဆိုင်ရာ စော်ကားရေးသားခြင်း၊ မိန်းမ ဒေါ်နီလာသိန်းအား ဂျင်မီကိုစစ်တပ်မှကြိုးပေးလျှင် နစကမှ တာဝန်ယူရမည် မဲဖောက်စနစ်နဲ့လား PR စစ်နစ်လားဆိုပြီး ဒေါ်နီလာသိန်းရဲ့ အမျိုးသမီးဖြစ်တည်မှု့ကို စော်ကားရေးသားထားခြင်း သော်လည်းကောင်း

 ကော့ကရိတ်တွင် စစ်တပ်နှင့် တိုက်ပွဲအတွင်းသေဆုံးခဲ့သော စနိုက်ဘာသမားအား ‘တပ်မတော်ရဲ့ တန်ပြန် Sniper သမား လက်ချက်နဲ့ဂိန်သွားပြီ မိန်းမနဲ့ ကလေးကို ဘယ်သူတာဝန်ယူမလဲမဲနှိုက်ကြဦးဟ’ ဟု ခွေးအဖြစ်နှိမ့်ချထားသည့်အပြင် ၎င်း၏ မိန်းမနှင့် ကလေးဖြစ်သူအား လိင်ပိုင်းဆိုင်ရာ‌ စော်ကားခြင်း၊  NUG ဒုဝန်ကြီး အိသဉ္ဇာမောင်အား AAC ရဲမင်းနှင့် စိတ်လွတ်ကိုယ်လွတ် တော်လှန်ရေးလုပ်တာ ဘာသာခြားနဲ့ လက်ထပ်ထားတဲ့ ဒုဝန်ကြီးက တော်လှန်ရေးနဲ့ လူမှုရေး၊ အချစ်ရေးနဲ့ အိမ်ထောင်ရေး ဘာမှမစဉ်းစားပဲ ဝါဒနာတူ တဲ့သူနဲ့ လက်တွဲပြီး ဒီလိုမျိုးတောထဲမှာ သာသာယာယာ တော်လှန်ရေးလုပ်နေပါပြီး ဇရက်တောင်ပံကျိုးနဲ့ ကြောင်ခံတွင်းပျက် တွေ့နေပြီဟု လိင်ပိုင်းဆိုင်ရာ‌ စော်ကားသော အရေးအသားများဖြင့် တိုက်ခိုက်ရေးသားထားခြင်း တို့ကို တွေ့မြင်ရပါသည်။

ဤသည်မှာ ၂၀၂၁ နိုင်ငံရေး အပြိုအလဲ ဖြစ်သည့် အခြေအနေ တွင် မိမိတို့၏ လွှတ်လပ်သော ခံယူချက် အတိုင်း ရပ်တည်နေကြသည့် လူ့အဖွဲ့အစည်းကြား တစ်ဉီးနှင့် တဉီး အမြင် မကြည်လင်၊ စော်ကား၊ သတင်းအမှား ဖြန့်ဝေမှုများ၏ အကြောင်းအရင်း အခြေခံသည် အမျိုးသမီးထုအား လိင်ပိုင်းဆိုင်ရာ သားကောင်အဖြစ် ထားကာ ဖြစ်စဉ်၊ ဖြစ်ရပ် အမှားများဖြင့် စော်ကား ပုတ်ခတ် သည့် မြန်မာနိုင်ငံ၏ ၊ မ, သဘာဝ ဖြစ်တည်မှု အား သားကောင်၊ လိင်ပိုင်းဆိုင်ရာ အဖြည့်ခံ၊ ယဉ်ကျေးမှု ဖျက်ဆီးသည့် တရားခံ အဖြစ် မြင်ကာ ရုပ်ဝါဒ အရ ဖို, သဘာဝနှင့် မ၊ သဘာဝ ပွန်းတိုက်နေသည့် မြန်မာ လူမှုဝန်းကျင်တို့၏ လိင်ဆိုင်ရာ မသိနားမလည်မှု၊ ကျား၊ မ၊ လိင်စိတ် ကွဲပြားခံယူသည့် ဓလေ့များ ကို သိနားလည် ဆန်းစစ်နိုင်သည့် အခြေအနေ မရှိနေခြင်း နှင့် အသိဉာဏ် မပွင့်သေးသည့် လူအဖွဲ့အစည်းအဖြစ်သို့ တွန်းပို့ ပေးသည့် လက္ခဏာများပင် ဖြစ်နေတော့သည်။

ပြီး

#အမုန်းစကား #သတင်းတု #သတင်းအမှား #လိင်ပိုင်းဆိုင်ရာစော်ကားရေးသားခြင်း #ဘာသာရေးစော်ကားနှိုင်းယှဉ်ခြင်း