မွန်ပြည်နယ်၊ သထုံမြို့နယ်၊ ကြာပန်း ရွှေသံလွင်တိုးဂိတ်တွင် ယာဉ်စစ်ဆေးနေစဉ် ယမန်နေ့ (ဇူလိုင်လ ၆ ရက်) က လက်နက်ခဲယမ်းများ ဖမ်းဆီးရမိခဲ့ကြောင်း သိရသည်။
ယမန်နေ့ (ဇူလိုင်လ ၆ ရက်) နံနက် ၉ နာရီခွဲအချိန်ခန့်က ကျိုက်ထိုမြို့နေ ယာဉ်မောင်း အောင်ကျော်မိုး (အသက် ၄၆ နှစ်) မောင်းနှင်သည့် ၎င်း၏ ကားပေါ်မှ တူရဂီနိုင်ငံထုတ် Glock အမျိုးအစား ပစ္စတို တစ်လက်၊ ၎င်းကျည် ၁၀ တောင့်၊ အမေရိကန်နိုင်ငံထုတ် Police Shotgun Model Ten ကိုးလုံးကျည် အမျိုးအစား တစ်လက်၊ ၎င်းကျည် ၁၀ တောင့်တို့အား သိမ်းဆည်းရမိခဲ့ကြောင်း စစ်ကောင်စီမှ သတင်းထုတ်ပြန်ခဲ့သည်။
သထုံမြို့နယ်၊ ကြာပန်း ရွှေသံလွင်တိုးဂိတ်တွင် ယာဉ်စစ်၊ ပိတ်ဆို့ စစ်ဆေးနေစဉ် ဘားအံမြို့ဘက်မှ သထုံမြို့ဘက်သို့ မောင်းနှင်လာသော ယာဉ်အမှတ် YGN-7 / 4P-5792 Honda Fit အမျိုးအစား၊ အနက်ရောင်ယာဥ်ကို စစ်ဆေးခဲ့ရာမှ အဆိုပါ လက်နက်ခဲယမ်းများကို ဖမ်းဆီးရမိကြောင်း၊ အဆိုပါ လက်နက်ခဲ့ယမ်းသယ်ဆောင်လာသည့် ယာဉ်မောင်းဖြစ်သူကို အမှု့ဖွင့်စစ်ဆေးမှုများ ဆောင်ရွက်လျက်ရှိကြောင်း သိရသည်။
